آیت ۵:  وَاِنْ تَعْجَبْ فَعَجَبٌ قَوْلُہُمْ أَاِذَا کُنَّا تُرٰبًا أَاِنَّا لَفِیْ خَلْقٍ جَدِیْدٍ: «اور اگر تمہیں تعجب کرنا ہے تو قابل تعجب ہے ان کا یہ قول کہ کیا جب ہم (مر کر) مٹی ہو جائیں گے تو کیا ہم از سر ِنو وجود میں آئیں گے؟»

            یعنی کفار کا مرنے کے بعد دوبارہ جی اٹھنے پرتعجب کرنا، بذاتِ خود باعث ِتعجب ہے۔ جس اللہ نے پہلی مرتبہ تم لوگوں کو تخلیق کیا، پوری کائنات اور اس کی ایک ایک چیز ُپر حکمت طریقے سے بنائی اُس کے لیے یہ تعجب کرنا کہ وہ ہمیں دوبارہ کیسے زندہ کرے گا، یہ سوچ اور یہ نظریہ اپنی جگہ بہت ہی مضحکہ خیز اور باعث ِتعجب ہے۔

             اُولٰٓئِکَ الَّذِیْنَ کَفَرُوْا بِرَبِّہِمْ: «یہی وہ لوگ ہیں جنہوں نے اپنے رب کا انکار کیا۔»

            دوبارہ جی اٹھنے کے عقیدے سے ان کا یہ انکار دراصل اللہ کے وجود کا انکار ہے۔ اُس کی قدرت اور اس کے عَلٰی کُلِّ شَیٌ قَدِیْـر ہونے کا انکار ہے۔

             وَاُولٰٓئِکَ الْاَغْلٰلُ فِیْٓ اَعْنَاقِہِمْ وَاُولٰٓئِکَ اَصْحٰبُ النَّارِ ہُمْ فِیْہَا خٰلِدُوْنَ: «اور یہی وہ لوگ ہیں جن کی گردنوں میں طوق پڑے ہوئے ہیں ، اور یہی جہنمی ہیں، اس میں رہیں گے ہمیشہ ہمیش۔»