الرّعد

الٓمّٓرٰ۔ یہ (اﷲ کی) کتا ب کی آیتیں ہیں ۔ اور (اے پیغمبر !) جو کچھ تم پر تمہارے پروردگار کی طرف سے نازل کیا گیا ہے، برحق ہے، لیکن اکثر لوگ ایمان نہیں لارہے

اﷲ وہ ہے جس نے ایسے ستونوں کے بغیر آسمانوں کو بلند کیا جو تمہیں نظر آسکیں ، پھر اُس نے عرش پر استوا ء فرمایا، اور سورج اور چاند کو کام پر لگادیا۔ ہر چیز ایک معین میعاد تک کیلئے رواں دواں ہے۔ وہی تمام کاموں کی تدبیر کرتا ہے۔ وہی ان نشانیوں کو کھول کھول کر بیان کرتا ہے، تاکہ تم اس بات کا یقین کر لو کہ (ایک دن) تمہیں اپنے پروردگار سے جاملنا ہے

اور وہی ذات ہے جس نے یہ زمین پھیلائی، اُس میں پہاڑ اور دریا بنائے، اور اُس میں ہر قسم کے پھلوں کے دودو جوڑے پیدا کئے۔ وہ دن کر رات کی چادر اُڑھا دیتا ہے۔ حقیقت یہ ہے کہ ان ساری باتوں میں اُن لوگوں کیلئے نشانیاں ہیں جو غوروفکر کریں

اور زمین میں مختلف قطعے ہیں جو پاس پاس واقع ہوئے ہیں ، اور انگور کے باغ اور کھجور کے درخت ہیں ، جن میں سے کچھ دُہرے تنے والے ہیں ، اور کچھ اکہرے تنے والے۔ سب ایک ہی پانی سے سیراب ہوتے ہیں ، اور ہم ان میں سے کسی کو ذائقے میں دوسرے پر فوقیت دے دیتے ہیں ۔ یقینا ان سب باتوں میں اُن لوگوں کیلئے نشانیاں ہیں جو عقل سے کام لیں

اور اگر تمہیں (ان کافروں پر) تعجب ہوتا ہے تو ان کا یہ کہنا (واقعی) عجیب ہے کہ : ’’ کیا جب ہم مٹی ہو جائیں گے تو کیا سچ مچ ہم نئے سرے سے پیدا ہوں گے ؟ ‘‘ یہ وہ لوگ ہیں جنہوں نے اپنے رَبّ (کی قدرت) کا انکار کیا ہے، اور یہی وہ لوگ ہیں جن کے گلوں میں طوق پڑے ہوئے ہیں ، اور وہ دوزخ کے باسی ہیں ۔ وہ ہمیشہ اُسی میں رہیں گے

اور یہ لوگ خوشحالی (کی میعاد ختم ہونے) سے پہلے بدحالی کی جلدی مچائے ہوئے ہیں ، حالانکہ ان سے پہلے ایسے عذاب کے واقعات گذر چکے ہیں جس نے لوگوں کو رُسوا کر ڈالا تھا۔ اور یہ حقیقت ہے کہ لوگوں کیلئے اُن کی زیادتی کے باوجود تمہارے رَبّ کی ذات ایک معاف کرنے والی ذات ہے، اور یہ بھی حقیقت ہے کہ اُس کا عذاب بڑا سخت ہے

اور جن لوگوں نے کفر اپنا لیا ہے وہ کہتے ہیں کہ : ’’ بھلا ان پر (یعنی آنحضرت ﷺ پر) ان کے رَبّ کی طرف سے کوئی معجزہ کیوں نہیں اُتارا گیا ؟ ‘‘ (اے پیغمبر !) بات یہ ہے کہ تم تو صرف خطرے سے ہوشیار کرنے والے ہو، اور ہر قوم کیلئے کوئی نہ کوئی ایسا شخص ہوا ہے جو ہدایت کا راستہ دکھائے

جس کسی مادہ کو جو حمل ہوتا ہے، اﷲ اُس کو بھی جانتا ہے، اور ماؤں کے رحم میں جوکوئی کمی بیشی ہوتی ہے، اُس کو بھی۔ اور ہر چیز کا اُس کے ہاں ایک اندازہ مقرر ہے

وہ غائب و حاضر تمام باتوں کا جاننے والا ہے، اُس کی ذات بہت بڑی ہے، اُس کی شان بہت اُونچی

تم میں سے کوئی چپکے سے بات کرے یا زور سے، کوئی رات وقت چھپا ہوا ہو، یا دن کے وقت چل پھر رہاہو، وہ سب (اﷲ کے علم کے لحاظ سے) برابر ہیں