آیت 36:   اِنَّ الَّذِیْنَ کَفَرُوْا لَــوْ اَنَّ لَہُمْ مَّا فِی الْاَرْضِ جَمِیْعًا وَّمِثْلَہ مَعَہ:  ،،یقینا وہ لوگ جنہوں  نے کفر کیا، اگر ان کے پاس وہ ساری دولت ہو جو کہ زمین میں  ہے کل کی کل اور اس کے ساتھ اتنی ہی اور بھی ہو،،

              لِیَفْتَدُوْا بِہ مِنْ عَذَابِ یَوْمِ الْقِیٰمَۃِ:  ،،(اور وہ چاہیں)  کہ وہ اس کے ذریعے سے فدیہ دے کر چھوٹ سکیں قیامت کے دن کے عذاب سے،،

             مَا تُقُبِّلَ مِنْہُمْ:   ،،تو ان سے ہر گز قبول نہیں  کی جائے گی۔ ،،

            یہ حکم گویا «تعلیق بالمحال» ہے کہ نہ ایسا ممکن ہے اور نہ ایسا ہو گا۔  لیکن بات کی سختی واضح کرنے کے لیے یہ انداز اپنایا گیا ہے اور آخری درجے میں  وضاحت کر دی گئی ہے کہ اگر بالفرض ان کے پاس اتنی دولت موجود بھی ہو تب بھی اللہ کے ہاں  اُن کا فدیہ قبول نہیں  ہو گا۔

             وَلَہُمْ عَذَابٌ اَلِیْمٌ:  ،،اور ان کے لیے درد ناک عذاب ہے۔ ،،