آیت ۱۴:  اِذْ جَآءَتْہُمُ الرُّسُلُ مِنْ بَیْنِ اَیْدِیْہِمْ وَمِنْ خَلْفِہِمْ: ’’جبکہ ان کے پاس رسول ؑآئے ان کے سامنے سے بھی اور ان کے پیچھے سے بھی‘‘

        یہاں پر قومِ عاد اور قومِ ثمود کا ذکر کر کے عرب کا وہ پورا علاقہ مراد لیا گیا ہے جہاں مختلف قوموں کی طرف پے در پے پیغمبر آئے۔ ان پیغمبروں اور ان کی اقوام کا ذکر قرآن میں بہت تکرار سے آیا ہے۔

         اَلَّا تَعْبُدُوْٓا اِلَّا اللّٰہَ: ’’ (اس دعوت کے ساتھ ) کہ اللہ کے سوا کسی اور کی بندگی نہ کرو۔‘‘

         قَالُوْا لَوْ شَآءَ رَبُّنَا لَاَنْزَلَ مَلٰٓئِکَۃً: ’’ (جواب میں ہر قوم کے) لوگوں نے یہی کہا کہ اگر ہمارا رب چاہتا تو فرشتوں کو نازل کر دیتا‘‘

         فَاِنَّا بِمَآ اُرْسِلْتُمْ بِہٖ کٰفِرُوْنَ: ’’پس جو چیز دے کر آپ بھیجے گئے ہیں ہم تو اس کا انکار کرتے ہیں۔‘‘

        آپ کا دعویٰ ہے کہ آپ کو اللہ نے کوئی خاص پیغام دے کر ہماری طرف بھیجا ہے تو آپ اس حوالے سے ہمارا جواب بھی سن لیں اور وہ یہ کہ آپ کے دعوے کے مطابق جس چیز کے ساتھ بھی آپ کو بھیجا گیا ہے ہم اسے ماننے سے انکار کرتے ہیں۔