آیت ۳۶:  وَاِذَا رَاٰکَ الَّذِیْنَ کَفَرُوْٓا اِنْ یَّتَّخِذُوْنَکَ اِلَّا ہُزُوًا:   «اور (اے نبی!) یہ کافر لوگ جب بھی آپ کو دیکھتے ہیں تو آپ کا مذاق اڑاتے ہیں۔»

            یہ مشرکین مختلف انداز میں آپ پر استہزائیہ فقرے کستے ہیں، آپ کو دیکھتے ہیں تو ایک دوسرے سے مخاطب ہو کر اس طرح آپ کا تمسخر اڑاتے ہیں :   

            اَہٰذَا الَّذِیْ یَذْکُرُ اٰلِہَتَکُمْ:   «کیا یہ ہے وہ شخص جو تمہارے معبودوں کا ذکر کرتا ہے؟»

            یعنی کہتا ہے کہ ان کی کوئی حقیقت نہیں۔ اور اس طرح ان کی شان میں گستاخی کا ارتکاب کرتا ہے!

            وَہُمْ بِذِکْرِ الرَّحْمٰنِ ہُمْ کٰفِرُوْنَ:   «اور وہ خود رحمن کے ذکر سے منکر ہیں۔»

            انہیں تو اپنے معبودوں کا ذکر اچھا لگتا ہے۔ لات و عزیٰ کا ذکر ہو تو یہ لوگ خوش ہوتے ہیں اور اللہ تعالیٰ کے ذکر سے ان کے دل بجھ جاتے ہیں۔