آیت 172:   لَـنْ یَّسْتَنْکِفَ الْمَسِیْحُ اَنْ یَّــکُوْنَ عَبْدًا لِّـلّٰہِ وَلاَ الْمَلٰٓئِکَۃُ الْمُقَرَّبُوْنَ: ’’مسیح  کو تو اس میں ہر گز کوئی عار نہیں ہے کہ وہ بنے اللہ کا بندہ اور نہ ہی ملائکہ مقربین کو اس میں کوئی عار ہے (کہ انہیں اللہ کا بندہ سمجھا جائے)۔‘‘

            مسیح کو تو اللہ کا بندہ ہونے میں اپنی شان محسوس ہو گی۔ جیسے ہم بھی حضور کے بارے میں کہتے ہیں:  وَنَشْہَدُ اَنَّ مُحَمَّدًا عَبْدُہ وَرَسُوْلُـہ۔ تو عبدیت کی شان تو بہت بلند و بالا ہے‘ رسالت سے بھی اعلیٰ اور اَرفع۔ (یہ ایک علیحدہ مضمون ہے‘ جس کی تفصیل کا یہ محل نہیں ہے۔) چنانچہ حضرت مسیح  کے لیے یہ کوئی عار کی بات نہیں ہے کہ وہ اللہ کے بندے ہیں۔

             وَمَنْ یَّسْتَنْکِفْ عَنْ عِبَادَتِہ وَیَسْتَـکْبِرْ فَسَیَحْشُرُہُمْ اِلَـیْہِ جَمِیْعًا: ’’اور جو کوئی بھی عار سمجھے گا اُس کی بندگی میں اور تکبر کرے گا تو اللہ ان سب کو اپنے پاس جمع کر لے گا۔‘‘