آیت ۱۹   فَلَمَّآ اَنْ اَرَادَ اَنْ یَّبْطِشَ بِالَّذِیْ ہُوَ عَدُوٌّ لَّہُمَا: ’’پھر جب اُس نے پکڑنا چاہا اُس کو جو ان دونوں کا دشمن تھا‘‘

      حضرت موسیٰ آگے تو بڑھے تھے اس قبطی کو پکڑنے کے لیے تاکہ اُسے اپنے اسرائیلی بھائی کو مارنے سے روک سکیں ، لیکن چونکہ آپ کے غصے کا رخ اسرائیلی کی طرف تھا اور اس کو سختی سے ڈانٹتے ہوئے آپ نے اِنَّکَ لَغَوِیٌّ مُّبِیْنٌ کہا تھا، اس لیے وہ سمجھا کہ آپ اس کی پٹائی کرنا چاہتے ہیں، چنانچہ:

      قَالَ یٰمُوْسٰٓی اَتُرِیْدُ اَنْ تَقْتُلَنِیْ کَمَا قَتَلْتَ نَفْسًا بِالْاَمْسِ: ’’وہ چیخ اٹھا: اے موسیٰ! کیا تم مجھے بھی قتل کرنا چاہتے ہو جس طرح تم نے کل ایک شخص کو مار ڈالا تھا!‘‘

      گویا اس نے اپنی حماقت سے بھانڈا ہی پھوڑ دیا کہ کل والا قتل موسیٰ نے کیا تھا۔

      اِنْ تُرِیْدُ اِلَّآ اَنْ تَکُوْنَ جَبَّارًا فِی الْاَرْضِ: ’’تم صرف یہ چاہتے ہو کہ تم اس ملک میں بڑے جابر بن جاؤ‘‘

      وَمَا تُرِیْدُ اَنْ تَکُوْنَ مِنَ الْمُصْلِحِیْنَ: ’’اور تم نہیں چاہتے کہ تم اصلاح کرنے والوں میں سے بنو۔‘‘

      گویا اس مکالمے سے اُس اسرائیلی نے ثابت کر دیا کہ وہ خود ایک منفی سوچ کا حامل اور گھٹیا کردار کا مالک شخص تھا۔