حضرت زكريا اور يحيى عليه السلام كا قصه

 آیت 38:    ہُنَالِکَ دَعَا زَکَرِیَّا رَبَّہ:  «(حضرت زکریا کو یہ مشاہدہ ہوا تو انہوں نے)  اُسی وقت اپنے پروردگار سے ایک دعا کی۔»

             قَالَ رَبِّ ہَبْ لِیْ مِنْ لَّدُنْکَ ذُرِّیَّۃً طَیِّبَۃً:  «انہوں نے کہا: اے میرے رب! تو مجھے بھی اپنی جناب سے کوئی پاکیزہ اولاد عطا فرما دے۔»

            حضرت زکریا بہت بوڑھے ہو چکے تھے‘ ان کی اہلیہ بھی بہت بوڑھی ہو چکی تھیں اور ساری عمر بانجھ رہی تھیں اور ان کے ہاں کوئی اولاد نہیں ہوئی تھی۔ یہ مضامین سورئہ مریم میں زیادہ تفصیل کے ساتھ بیان ہوئے ہیں۔ مکی دور میں جبکہ مسلمان ہجرتِ حبشہ کے لیے گئے تھے‘ تو وہاں جا کر نجاشی کے دربار میں حضرت جعفر بن ابی طالب نے سورئہ مریم کی آیات پڑھ کر سنائی تھیں۔ اس مناسبت سے یہ مضامین سورئہ مریم میں بھی ملتے ہیں۔ حضرت زکریا ساری عمر بے اولاد رہے تھے‘ لیکن حضرت مریم کے پاس اللہ تعالیٰ کی قدرت کا مشاہدہ کرنے کے بعد اولاد کی جو خواہش ان کے اندر دبی ہوئی تھی وہ چنگاری دفعۃً بھڑک اٹھی۔ انہوں نے عرض کیا کہ اے اللہ! تو اس بچی کو یہ سب کچھ دے سکتا ہے تو اپنی قدرت سے مجھے بھی پاکیزہ اولاد عطا فرما دے!

             اِنَّکَ سَمِیْعُ الدُّعَآءَ:  «یقینا تو دعا کا سننے والا ہے۔» 

 آیت  39:    فَنَادَتْہُ الْمَلٰٓئِکَۃُ وَہُوَ قَــآئِمٌ یُّصَلِّیْ فِی الْْمِحْرَابِ:  «تو فرشتوں نے انہیں ندا دی جبکہ وہ اپنے حجرے میں کھڑے ہوئے نماز پڑھ رہے تھے»

             اَنَّ اللّٰہَ یُـبَشِّرُکَ بِیَحْیٰی:  «کہ اللہ تعالیٰ تمہیں بشارت دیتا ہے یحییٰ کی»

              مُصَدِّقًا بِکَلِمَۃٍ مِّنَ اللّٰہِ: «جو تصدیق کرے گا اللہ کی طرف سے ایک کلمہ کی»

            اس سے مراد حضرت عیسیٰ ہیں‘ جن کے لیے آیت: 44 میں «بِکَلِمَۃٍ مِّنْـہُ» کا لفظ آ رہا ہے۔

             وَسَیِّدًا وَّحَصُوْرًا وَّنَبِیًّا مِّنَ الصّٰلِحِیْنَ:  «اور سردار ہو گا اور تجرد کی زندگی گزارے گا اور نبی ہو گا صالحین میں سے۔»

            یہاں نوٹ کر لیجیے کہ آخری لفظ جو حضرت یحییٰ کی مدح کے لیے آیا ہے وہ «نبی» ہے۔

 آیت 40:    قَالَ رَبِّ اَنّٰی یَکُوْنُ لِیْ غُلٰـمٌ:  «(زکریا نے)  کہا: پروردگار! میرے ہاں لڑکا کیسے ہو جائے گا؟»

            ابھی خود دعا کر رہے تھے‘ لیکن اللہ کی طرف سے بیٹے کی بشارت ملنے پر غالباً اس کی توثیق اور (re-assurance)  چاہ رہے ہیں کہ میرے ہاں کیسے بیٹا ہو جائے گا؟

             وَّقَدْ بَلَغَنِیَ الْکِبَرُ:  «جبکہ میں انتہائی بوڑھا ہو چکا ہوں»

               وَامْرَاَتِیْ عَاقِرٌ:  «اور میری بیوی بانجھ رہی ہے۔»

             قَالَ کَذٰلِکَ اللّٰہُ یَفْعَلُ مَا یَشَآءُ:  «(اللہ نے)  فرمایا: اسی طرح اللہ جو چاہتا ہے کرتا ہے۔»

            اسے اسباب کی احتیاج نہیں ہے۔ اسباب اس کے محتاج ہیں‘ اللہ اسباب کا محتاج نہیں ہے۔

 آیت 41:    قَالَ رَبِّ اجْعَلْ لِّیْ اٰیَۃً:  «انہوں نے عرض کیا: پروردگار! میرے (اطمینان کے)  لیے کوئی نشانی مقرر کر دیں۔»

            مجھے معلوم ہو جائے کہ واقعی ایسا ہونا ہے اور یہ کلام جو میں سن رہا ہوں واقعتا تیری طرف سے ہے۔

             قَالَ اٰیَتُکَ اَلاَّ تُکَلِّمَ النَّاسَ ثَلٰثَۃَ اَیَّامٍ اِلاَّ رَمْزًا:  «(اللہ نے)  فرمایا: تمہارے لیے نشانی یہ ہے کہ اب تم تین دن تک لوگوں سے گفتگو نہیں کر سکو گے سوائے اشارے کنائے کے۔»

            یعنی ان کی قوتِ گویائی سلب ہو گئی اور اب وہ تین دن کسی سے بات نہیں کر سکتے تھے۔

             وَاذْکُرْ رَّبَّکَ کَثِیْرًا:  «اور (اپنے دل میں)  اپنے رب کو کثرت سے یاد کرتے رہو»

              وَّسَبِّحْ بِالْعَشِیِّ وَالْاِبْکَارِ:  «اور تسبیح کیا کرو شام کے وقت بھی اور صبح کے وقت بھی۔» 

آیت 85:   وَزَکَرِیَّا وَیَحْیٰی وَعِیْسٰی وَاِلْیَاسَ کُلٌّ مِّنَ الصّٰلِحِیْنَ:   ’’اور (اُسی کی اولاد میں  سے)   زکریا،  یحییٰ ،  عیسیٰ  اور الیاس کو بھی۔ یہ سب کے سب نیکوکاروں  میں  سے تھے۔،، 

آیت 86:   وَاِسْمٰعِیْلَ وَالْیَسَعَ وَیُوْنُسَ وَلُوْطًا وَکُلاًّ فَضَّلْنَا عَلَی الْعٰلَمِیْنَ:   ’’اور اسماعیل  اور الیَسَع اور یونس  اور لوط  کو بھی (راہ یاب کیا) ،  اور ان سب کو ہم نے تمام جہان والوں  پر فضیلت دی۔،، 

آیت 87:  وَمِنْ اٰبَــآئِہِمْ وَذُرِّیّٰتِہِمْ وَاِخْوَانِہِمْ وَاجْتَـبَیْنٰـہُمْ وَہَدَیْنٰـہُمْ اِلٰی صِرَاطٍ مُّسْتَقِیْمٍ:   ’’اور ان کے آباء و اَجداد میں  سے بھی،  ان کی نسلوں  میں  سے بھی اور ان کے بھائیوں  میں  سے بھی ( ہم نے ہدایت یافتہ بنائے)،  اور ان کو ہم نے چن لیا اور ان کو ہدایت دی سیدھے راستے کی طرف۔،، 

آیت 88:   ذٰلِکَ ہُدَی اللّٰہِ یَہْدِیْ بِہ مَنْ یَّشَآءُ مِنْ عِبَادِہ وَلَوْ اَشْرَکُوْا لَحَبِطَ عَنْہُمْ مَّا کَانُوْا یَعْمَلُوْنَ:   ’’یہ اللہ کی وہ ہدایت ہے جس کے ساتھ وہ راہنمائی فرماتا ہے جس کی چاہتا ہے اپنے بندوں  میں  سے۔ اور اگر (بالفرض) وہ بھی شرک کرتے تو ان کے بھی سارے اعمال ضائع ہو جاتے۔،،

            یہ انداز ہمیں  سمجھانے کی غرض سے اختیار کیا گیا ہے کہ شرک کتنی بری شے ہے۔ ورنہ اس کا کوئی امکان نہیں  تھا کہ ایسے اعلیٰ مراتب پر فائز اللہ کے عظیم الشان انبیاء و رسل شرک میں  مبتلا ہوتے۔ بہر حال اللہ تعالیٰ کے نزدیک شرک ناقابل معافی جرم ہے، جس کے بارے میں  سورۃ النساء میں دو مرتبہ یہ الفاظ آ چکے ہیں:  اِنَّ اللّٰہَ لاَ یَغْفِرُ اَنْ یُّشْرَکَ بِہ وَیَغْفِرُ مَا دُوْنَ ذٰلِکَ لِمَنْ یَّشَآءُ.  (آیت: 48 و116) 

آیت 89:   اُولٰٓئِکَ الَّذِیْنَ اٰتَیْنٰـہُمُ الْکِتٰبَ وَالْحُکْمَ وَالنُّـبُـوَّۃَ:   ’’یہ وہ لوگ ہیں  جن کو ہم نے کتاب،  حکمت، اور نبوت عطا فرمائی۔،،

            فَاِنْ یَّـکْفُرْ بِہَا ہٰٓؤُلَآءِ فَقَدْ وَکَّلْنَا بِہَا قَوْمًا لَّــیْسُوْا بِہَا بِکٰفِرِیْنَ:   ’’پھر اگر یہ لوگ اس کا انکار کر رہے ہیں  تو (کچھ پروا نہیں )  ہم نے کچھ اور لوگ اس کام کے لیے مقرر کر دیے ہیں جو اس کی ناقدری نہیں  کریں  گے۔،،

            مقامِ عبرت ہے! محمد رسول اللہ  جیسا رسول،  مبلغ،  داعی،  مربی،  مزکی اور معلّم پچھلے بارہ سال سے دن رات محنت کر رہا ہے اور اس کے نتیجے میں  اب تک صرف ڈیڑھ، پونے دو سو افراد دائرہ اسلام میں  داخل ہو ئے ہیں ۔ اس پس منظر میں  آپ سے فرمایا جا رہا ہے کہ مکہ کے یہ لوگ اگر اس دعوت کی نا قدری کر رہے ہیں،  اس قرآن کی نا شکری کر رہے ہیں،  اس کا انکار کر رہے ہیں اور آپ کی دس بارہ سال کی محنت کے خاطر خواہ نتائج سامنے نہیں  آئے ہیں  تو آپ دل شکستہ نہ ہوں، عنقریب ایک دوسری قوم بڑے ذوق وشوق سے اس دعوت پر لبیک کہنے جا رہی ہے۔  اس خوش قسمت قوم سے مراد انصارِ مدینہ ہیں۔ اور واقعی اس سلسلے میں  اہل مکہ پیچھے رہ گئے اور اہل مدینہ بازی لے گئے۔ بقولِ شاعر:

گرفتہ چینیاں احرام و مکی خفتہ در بطحا!

            دُنیا کے حالات و اسباب کو دیکھتے ہوئے کچھ نہیں  کہا جا سکتا کہ اللہ تعالیٰ دین کے کام میں  کیسے کیسے اسباب پیدا فرماتے ہیں اور کہاں  کہاں  سے کس کس طرح کے لوگوں  کے دلوں  کو پھیر کر ہدایت کی توفیق دے دیتے ہیں۔ مجھے اپنی دعوت رجوع الی القرآن کے بارے میں  بھی اطمینان ہے کہ پاکستان میں اس کو خاطر خواہ پذیرائی نہیں  ملی تو کیا ہوا،  یہ دعوت مختلف ذرائع سے پوری دنیا میں  پھیل رہی ہے،  اور کچھ نہیں  کہا جا سکتا کہ قرآن کی یہ انقلابی دعوت کس جگہ زمین کے اندر جڑ پکڑ لے اور ایک تناور درخت کی صورت اختیار کر لے۔

آیت 90:  اُولٰٓئِکَ الَّذِیْنَ ہَدَی اللّٰہُ فَبِہُدٰٹہُمُ اقْتَدِہْ:   ’’یہی لوگ ہیں  جن کو اللہ نے ہدایت دی تھی،  تو آپ بھی ان کی ہدایت کی پیروی کیجیے۔،،

            یعنی ابھی جن ابنیاء و رسل کا ذکر ہوا ہے،  سترہ ناموں  کا خوبصورت گلدستہ آپ نے ملاحظہ کیا ہے،  وہ سب کے سب اللہ تعالیٰ کے ہدایت یافتہ تھے۔ اس سلسلے میں  حضور کو فرمایا جا رہا ہے کہ آپ بھی ان کے طریقے کی پیروی کریں۔ اس آیت سے ایک بہت اہم نکتہ اور اصول یہ سامنے آتا ہے کہ سابق انبیاء کی شریعت کا ذکر کرتے ہوئے جن احکام کی نفی نہ کی گئی ہو،  وہ ہمارے لیے بھی قابل اتباع ہیں ۔ مثلاً رجم کی سزا قرآن میں  مذکور نہیں  ہے،  یہ سابقہ شریعت کی سزا ہے،  جس کو حضور نے برقرار رکھا ہے۔ اسی طرح قتل مرتد کی سزا کا ذکر بھی قرآن میں  نہیں  ہے،  یہ بھی سابقہ شریعت کی سزا ہے ، جس کو برقرار رکھا گیا ہے۔ اس نکتے سے یہ اصول سامنے آتا ہے کہ جب تک قرآن و سنت میں  سابقہ شریعت کے کسی حکم کی نفی نہیں  ہوتی وہ حکم اسلامی شریعت میں  برقرار رہتا ہے۔

            قُلْ لَّآ اَسْئَلُکُمْ عَلَیْہِ اَجْرًا اِنْ ہُوَ اِلاَّ ذِکْرٰی لِلْعٰلَمِیْنَ:   ’’کہہ دیجیے میں  تم سے اس پر کسی اجر کا طالب نہیں  ہوں ۔ یہ نہیں  ہے مگر تمام جہان والوں  کے لیے یاد دہانی۔ ،،

            یہ قرآن تو بس اہل عالم کے لیے ایک نصیحت ہے، یاد دہانی ہے،  جو چاہے اس سے کسب ِفیض کرے،  جو چاہے اس سے نور حاصل کرے،  جو چاہے اس سے صراطِ مستقیم کی راہنمائی اخذ کر لے۔ 

آیت ۲:  ذِکْرُ رَحْمَتِ رَبِّکَ عَبْدَہُ زَکَرِیَّا:    «یہ ذکر ہے آپ کے رب کی رحمت کا جو اُس نے اپنے بندے زکریا پر کی۔»

            یہاں ذکر تو حضرت عیسیٰ کا کرنا مقصود ہے مگر آپ کے ذکر سے پہلے حضرت یحییٰ کا ذکر کیا جا رہا ہے، کیونکہ حضرت یحییٰ کی ولادت بھی تو ایک بہت بڑا معجزہ تھی۔ حضرت زکریا بہت بوڑھے ہو چکے تھے اور آپ کی اہلیہ بھی نہ صرف بوڑھی تھیں بلکہ عمر بھر بانجھ بھی رہی تھیں۔ ان حالات میں ان کے ہاں بیٹے کی پیدائش کوئی معمول کا واقعہ نہیں تھا۔ یہی وجہ ہے کہ اس واقعہ کو یہاں اللہ تعالیٰ کی رحمت ِخاص کا مظہر قرار دیا گیا ہے۔ 

آیت ۳:  اِذْ نَادٰی رَبَّہُ نِدَآءً خَفِیًّا:    «جب اُس نے پکارا اپنے رب کو چپکے چپکے۔»

            یعنی حضرت زکریا نے دل ہی دل میں اپنے رب سے دعا کی۔ 

 آیت ۴:  قَالَ رَبِّ اِنِّیْ وَہَنَ الْعَظْمُ مِنِّیْ:    «اُس نے عرض کیا: اے میرے پروردگار! بلا شبہ میری ہڈیاں کمزور ہو گئی ہیں»

            وَاشْتَعَلَ الرَّاْسُ شَیْبًا:    «اور میرا سر بھڑک اُٹھا ہے بڑھاپے سے»

            یعنی بڑھاپے کے سبب میرے سر کے بال مکمل طور پر سفید ہو گئے ہیں۔

            وَّلَمْ اَکُنْ بِدُعَآئِکَ رَبِّ شَقِیًّا:    «اور اے میرے پروردگار! میں تجھے پکار کر کبھی بھی نامراد نہیں رہا۔»

            چنانچہ آج میں بڑی ہمت کر کے تجھ سے ایک بہت ہی غیر معمولی دعا کرنے جا رہا ہوں۔ دُنیوی حالات اور طبیعی قوانین کے اعتبار سے تو ایسا ہونا ممکن نہیں، مگر تو چاہے تو نا ممکن بھی ممکن ہو جاتا ہے۔ 

 آیت ۵:  وَاِنِّیْ خِفْتُ الْمَوَالِیَ مِنْ وَّرَآئِیْ:    «اور مجھے اندیشہ ہے اپنے بھائی بندوں سے اپنے بعد»

            مجھے اپنے ورثاء میں کوئی ایسا شخص نظر نہیں آتا جو میرے بعد ہیکل ِسلیمانی کا متولی اور میرا جانشین بننے کی صلاحیت رکھتا ہو۔

            وَکَانَتِ امْرَاَتِیْ عَاقِرًا فَہَبْ لِیْ مِنْ لَّدُنْکَ وَلِیًّا:    «اور میری بیوی بانجھ ہے، تو تو مجھے خاص اپنے پاس سے ایک ولی عطا کر۔»

            یہاں «ولی» لفظ بہت اہم ہے، یعنی مجھے ایسا ساتھی عطا کر جو میرے مشن میں میرا دوست و بازو بن سکے۔ 

 آیت ۶:  یَّرِثُنِیْ وَیَرِثُ مِنْ اٰلِ یَعْقُوْبَ:    «جو وارث ہو میرا اور آلِ یعقوب کا»

            مجھے ایک ایسے ساتھی کی ضرورت ہے جو میری دینی و روحانی وراثت کو سنبھال سکے، اور میری وراثت کیا! یہ تو آلِ یعقوب کی وراثت ہے۔ اس مقدس مشن کو آگے بڑھانے کے لیے مجھے ایک ایسا وارث عطا کر جو واقعی اس منصب کا اہل ہو۔

            وَاجْعَلْہُ رَبِّ رَضِیًّا:    «اور اے میرے پروردگار! اس کو بنائیو پسندیدہ۔»

            رَضِیٌّ: فعیل کے وزن پر ہے، چنانچہ اس میں راضی (وہ جو راضی ہو) اور مرضِیّ (جس کو راضی کر دیا گیا ہو) دونوں کیفیتوں کا مفہوم پایا جاتا ہے۔ جیسے سورۃ البینہ (آیت: ۸) میں فرمایا گیا: رَضِیَ اللّٰہُ عَنْہُمْ وَرَضُوْا عَنْہُ:    کہ اللہ ان سے راضی ہو گیا اور وہ اس سے راضی ہو گئے۔ اسی طرح سورۃ الفجر میں نفس ِمطمئنہ کے حوالے سے فرمایا گیا:  ارْجِعِیْٓ اِلٰی رَبِّکِ رَاضِیَۃً مَّرْضِیَّۃً :   «تو لوٹ جا اپنے پروردگار کی طرف اس حال میں کہ تو اس سے راضی، وہ تجھ سے راضی» ---- اس دعا کے جواب میں حضرت زکریا کو بشارت دی گئی:

 آیت ۷:  یٰزَکَرِیَّآ اِنَّا نُبَشِّرُکَ بِغُلٰمِ  اسْمُہُ یَحْیٰیلا لَمْ نَجْعَلْ لَّہُ مِنْ قَبْلُ سَمِیًّا:    «اے زکریا! ہم تمہیں بشارت دیتے ہیں ایک لڑکے کی جس کا نام یحییٰ ہو گا، ہم نے اس سے پہلے اس کا کوئی ہم نام نہیں بنایا۔»

            اس کا دوسرا مفہوم یہ بھی ہو سکتا ہے کہ ہم نے اس سے پہلے اس کا کوئی نظیر نہیں بنایا، یعنی اس جیسی صفات کسی میں پیدا نہیں کیں۔ 

 آیت ۸:  قَالَ رَبِّ اَ نّٰی یَکُوْنُ لِیْ غُلٰـمٌ:    «اُس نے کہا: اے میرے پروردگار! میرے ہاں بیٹا کیسے ہو جائے گا»

            یہ وہی بات ہے جو حضرت زکریا کے حوالے سے ہم سوره آل عمران (آیت: ۴۰) میں بھی پڑھ چکے ہیں۔

            وَّکَانَتِ امْرَاَتِیْ عَاقِرًا وَّقَدْ بَلَغْتُ مِنَ الْکِبَرِ عِتِیًّا:    «جبکہ میری بیوی بانجھ ہے اور میں پہنچ چکا ہوں بڑھاپے کے باعث سوکھ جانے کی حالت کو!»

            یعنی بڑھاپے کی وجہ سے میرے جسم میں حیات کے سارے سوتے خشک ہو چکے ہیں۔ 

 آیت ۹:  قَالَ کَذٰلِکَج قَالَ رَبُّکَ ہُوَ عَلَیَّ ہَیِّنٌ:   «فرمایا: ایسے ہی ہو گا! تمہارے پروردگار نے فرمایا ہے کہ یہ مجھ پر آسان ہے»

            وَّقَدْ خَلَقْتُکَ مِنْ قَبْلُ وَلَمْ تَکُ شَیْئًا:    «اور تمہیں بھی تو میں نے پیدا کیا اس سے پہلے جبکہ تم کچھ بھی نہیں تھے۔» 

 آیت ۱۰:  قَالَ رَبِّ اجْعَلْ لِّیْٓ اٰیَۃً:    «عرض کیا: اے میرے پروردگار! میرے لیے کوئی نشانی مقرر فرمادے۔»

            قَالَ اٰیَتُکَ اَلَّا تُکَلِّمَ النَّاسَ ثَلٰثَ لَیَالٍ سَوِیًّا:    «فرمایا: تمہارے لیے نشانی یہ ہے کہ تم گفتگو نہیں کر سکو گے لوگوں سے تین راتیں متواتر۔»

            گویا بطور نشانی اللہ تعالیٰ نے تین دنوں تک حضرت زکریا کی قوتِ گویائی سلب کر لی۔ سوره آلِ عمران ( آیت: ۴۱) میں اس مضمو ن کو اس طرح بیان کیا گیا ہے:  قَالَ اٰیَتُکَ اَلاَّ تُکَلِّمَ النَّاسَ ثَلٰثَۃَ اَیَّامٍ اِلاَّ رَمْزًا:    یعنی آپ تین دن تک لوگوں سے گفتگو نہیں کر سکو گے مگر اشاروں کنایوں میں۔ 

 آیت ۱۱:  فَخَرَجَ عَلٰی قَوْمِہِ مِنَ الْمِحْرَابِ:    «پھر وہ حجرے سے نکل کر اپنی قوم کی طرف آیا»

            اپنی عبادت، رازو نیاز اور مناجات کے بعد حضرت زکریا اپنے حجرے سے نکل کر اپنی قوم کے لوگوں کی طرف آئے۔

            فَاَوْحٰٓی اِلَیْہِمْ اَنْ سَبِّحُوْا بُکْرَۃً وَّعَشِیًّا:    «اور انہیں اشارے سے کہا کہ تم لوگ تسبیح بیان کرو صبح وشام۔»

            آپ نے لوگوں کو اشاروں کنایوں سے سمجھایا کہ اس وقت اللہ تعالیٰ کی طرف سے ایک بہت اہم فیصلہ ہونے جا رہا ہے، لہٰذا تم لوگ صبح وشام کثرت سے اللہ کی تسبیح و تحمید کرتے رہو۔ عربی میں «وحی» کے لغوی معنی ہیں: الاعلام بالسِّر والخِفاء، یعنی کسی کو اشارے سے کوئی بات اس طرح بتانا کہ دوسروں کو پتا نہ چلے۔ انبیاء ورسل کی طرف جو وحی آتی ہے اس کی کیفیت بھی یہی ہوتی ہے۔ وحی کی مختلف صورتوں کا تذکرہ (بیان القرآن، جلد اول کے آغاز میں) «تعارفِ قرآن» کے ضمن میں آ چکا ہے۔ آگے سورۃ الشوریٰ میں بھی اس کا ذکر آئے گا۔

            حضرت یحییٰ کی ولادت کے بعد اب ان کو براہِ راست مخاطب کیا جا رہا ہے:

 آیت ۱۲:  یٰیَحْیٰی خُذِ الْکِتٰبَ بِقُوَّۃٍ:    «اے یحییٰ کتاب کو مضبوطی سے تھام لو!»

            کتاب سے مراد یہاں زبور، تورات اور دیگر صحائف ہیں جو اُس وقت بنی اسرائیل کے درمیان موجود تھے۔

            وَاٰتَیْنٰہُ الْحُکْمَ صَبِیًّا:    «اور ہم نے اُس کو عطا کر دی حکمت و دانائی بچپن ہی میں۔»

            اب حضرت یحییٰ کے خصوصی اوصاف بیان کیے جا رہے ہیں۔ یوں سمجھئے کہ حضرت عیسیٰ اور حضرت یحییٰ (d (John the Baptist and Jesus of Nazarat دونوں ایسی غیر معمولی شخصیات ہیں کہ ان جیسے اوصاف دوسرے انبیاء و رسل میں بھی نہیں پائے گئے۔ چنانچہ حضرت یحییٰ کو بچپن ہی میں حکمت عطا کر دی گئی۔ 

 آیت ۱۳:  وَّحَنَانًا مِّنْ لَّدُنَّا وَزَکٰوۃً وَکَانَ تَقِیًّا:    «اور ہماری طرف سے سوز وگداز والی محبت اور پاکیزگی (اُسے عطا ہوئی) اور وہ بہت متقی تھا۔» 

 آیت ۱۴:  وَّبَرًّا بِوَالِدَیْہِ وَلَمْ یَکُنْ جَبَّارًا عَصِیًّا:    «اور وہ اپنے والدین کے ساتھ حسن سلوک کرنے والا تھا، اور خود سر ونافرمان نہیں تھا۔»

            یہ اوصاف اللہ تعالیٰ کی خصوصی عطا کے طور پر حضرت یحییٰ کی گھٹی میں ڈال دیے گئے۔ 

 آیت ۱۵:  وَسَلٰـمٌ عَلَیْہِ یَوْمَ وُلِدَ وَیَوْمَ یَمُوْتُ وَیَوْمَ یُبْعَثُ حَیًّا:    «اور سلام اُس پر جس دن اُس کی ولادت ہوئی، جس دن اُسے موت آئے اور جس دن وہ اٹھایا جائے زندہ کر کے۔»

            یہاں پر حضرت زکریا اورحضرت یحییٰ کا قصہ اختتام کو پہنچا اور اب آگے حضرت مریم اور حضرت عیسیٰ کا قصہ بیان کیا جا رہا ہے۔ 

 آیت ۸۰:  وَعَلَّمْنٰـہُ صَنْعَۃَ لَبُوْسٍ لَّکُمْ:   «اور ہم نے انہیں تمہارے لیے لباس کی صنعت سکھائی»

            یہاں لباس سے مراد جنگی لباس یعنی زرہ بکتر ہے۔ گویا زرہ حضرت داؤد کی ایجاد ہے۔ اللہ تعالیٰ نے حضرت داؤد کے لیے لوہے کو نرم کر دیا تھا اور انہیں یہ ہنر براہِ راست سکھایا تھا۔

            لِتُحْصِنَکُمْ مِّنْ بَاْسِکُمْ فَہَلْ اَنْتُمْ شَاکِرُوْنَ:   «تا کہ وہ تمہیں بچائے تمہاری جنگ سے، تو کیا تم شکر گزار بنتے ہو؟»

            جنگ کے دوران زرہ بکتر تلوار، نیزے اور تیروں سے ایک سپاہی کی حفاظت کرتی ہے۔

 آیت ۸۱:  وَلِسُلَیْمٰنَ الرِّیْحَ عَاصِفَۃً تَجْرِیْ بِاَمْرِہِٓ اِلَی الْاَرْضِ الَّتِیْ بٰرَکْنَا فِیْہَا:   «اور (ہم نے مسخر کر دیا تھا) سلیمان کے لیے تیز چلنے والی ہوا کو، جو اُس کے حکم سے چلتی تھی اس سرزمین کی طرف کہ جس میں ہم نے برکت عطا کی تھی۔»

            وَکُنَّا بِکُلِّ شَیْئٍ عٰلِمِیْنَ:   «اور ہم تمام چیزوں کا علم رکھنے والے ہیں۔» 

 آیت ۸۲:  وَمِنَ الشَّیٰطِیْنِ مَنْ یَّغُوْصُوْنَ لَہ:   «اور شیاطین میں سے (بھی ہم نے بہت سوں کو مسخر کر دیا تھا) جو اس کے لیے (سمندروں میں) غوطہ خوری کرتے تھے»

            یعنی ِجنات حضرت سلیمان کے حکم سے سمندروں میں غوطے لگاتے تھے اور ان کی تہوں سے موتی اور دوسری مفید چیزیں نکال کر لاتے تھے۔

            وَیَعْمَلُوْنَ عَمَلًا دُوْنَ ذٰلِکَ:   «اور وہ اس کے علاوہ بہت سے دوسرے کام بھی کرتے تھے۔»

            وَکُنَّا لَہُمْ حٰفِظِیْنَ:   «اور ہم ہی ان پر نگران تھے۔»

            گویا وہ ِجن حضرت سلیمان کے تابع تھے تو یہ بھی ہماری ہی قدرت کا کمال تھا۔

 آیت ۸۳:    وَاَیُّوْبَ اِذْ نَادٰی رَبَّہُٓ:   «اور ایوب (پر بھی ہمارا فضل ہوا) جب اُس نے اپنے پروردگار کو پکارا»

            حضرت ایوب بھی جلیل القدر نبی ہیں اور قرآن میں آپ کو صابر کہا گیا ہے۔ اللہ تعالیٰ نے شدید بیماریوں کے ذریعے آپ کی آزمائش کی مگر آپ ہر حال میں صابر اور شاکر رہے۔ یہی وجہ ہے کہ «صبر ایوب» ضرب المثل کی حیثیت اختیار کر گیا ہے۔ واضح رہے کہ شکو ہ وشکایت اور جزع فزع صبر کے منافی ہے، جس کا اظہار آپ نے کبھی نہیں کیا، البتہ دعا صبر کے منافی نہیں ہے۔

            اَنِّیْ مَسَّنِیَ الضُّرُّ وَاَنْتَ اَرْحَمُ الرّٰحِمِیْنَ:   «کہ مجھے بہت زیادہ تکلیف پہنچی ہے اور تو تمام رحم کرنے والوں سے بڑھ کر رحم کرنے والا ہے۔» 

 آیت ۸۴:  فَاسْتَجَبْنَا لَہُ فَکَشَفْنَا مَا بِہِ مِنْ ضُرٍّ:   «تو ہم نے اُس کی دعا قبول کی اور اُس کو جو تکلیف تھی اسے دور کر دیا»

            آپ ایک ایسی بیماری میں مبتلا تھے جس سے آپ کی جلد میں تعفن پیدا ہو جاتا تھا۔ زخموں اور پھوڑوں سے بدبو آتی تھی جس کی وجہ سے آپ کے اہل خانہ تک آپ کو چھوڑ گئے تھے۔

            وَّاٰتَیْنٰـہُ اَہْلَہُ وَمِثْلَہُمْ مَّعَہُمْ:   «اور ہم نے اسے عطا کیے اُس کے گھر والے اور ان کے ساتھ اتنے ہی اور بھی۔»

            یعنی آپ کے اہل خانہ بھی آپ کے پاس واپس آ گئے اور آپ کو اتنی ہی مزید اولاد بھی عطا فرمائی۔

            رَحْمَۃً مِّنْ عِنْدِنَا وَذِکْرٰی لِلْعٰبِدِیْنَ:   «اپنی طرف سے خاص رحمت کے طور پر، اور تاکہ نصیحت (یاد دہانی) ہو عبادت کرنے والوں کے لیے۔» 

 آیت ۸۵:  وَاِسْمٰعِیْلَ وَاِدْرِیْسَ وَذَا الْکِفْلِ کُلٌّ مِّنَ الصّٰبِرِیْنَ:   «اور (اسی طرح) اسماعیل اور ادریس اور ذو الکفل (پر بھی ہم نے فضل کیا)۔ وہ سب صابرین میں سے تھے۔»

            حضرت ادریس کا ذکر سورۂ مریم کی آیت: ۵۶ کے ضمن میں بھی آ چکا ہے کہ آپ حضرت آدم کے بعد اورحضرت نوح سے پہلے مبعوث ہوئے تھے۔ ان سے قبل حضرت شیث کی بعثت بھی ہو چکی تھی۔ حضرت ذوالکفل کے بارے میں کہیں سے کوئی معلومات دستیاب نہیں ہیں کہ آپ کب اور کس علاقے میں مبعوث ہوئے۔ احادیث میں بھی آپ کا تذکرہ نہیں ملتا۔ البتہ موجودہ دور کے ایک عالم اور محقق مولانا مناظر احسن گیلانی کا خیال ہے کہ ذوالکفل سے مراد گوتم بدھ ہیں اور یہ کہ گوتم بدھ اللہ کے نبی تھے۔ ان کے اس دعویٰ کے بارے میں یقین سے تو کچھ نہیں کہا جا سکتا، لیکن اس سلسلے میں مولانا کے دلائل میں بہرحال بہت وزن ہے۔ گوتم بدھ کے بارے میں تاریخی اعتبار سے ہمیں اس قدر معلومات ملتی ہیں کہ وہ ریاست «کپل وستو» کے شہزادے تھے۔ مولانا کے مطابق «کپل» ہی دراصل «کفل» ہے یعنی ہندی کی «پ» عربی کی «ف» سے بدل گئی ہے۔ اس طرح ذوالکفل کا مطلب ہے :  «کفل (کپل) والا»۔ یعنی کپل ریاست کا والی (سدھار کا بدھا یا گوتم بدھا)۔

            آج جو عقائد گوتم بدھ سے منسوب کیے جاتے ہیں، ان میں یقینابہت کچھ تحریف بھی شامل ہو چکی ہو گی۔ جیسے حضرت عیسیٰ کی تعلیمات میں بھی آپ کے پیروکاروں نے بہت سے من گھڑت عقائد شامل کر لیے ہیں۔ ممکن ہے کہ گوتم بدھ کی اصل تعلیمات الہامی ہی ہوں اور بعد کے زمانے میں ان میں تحریف کر دی گئی ہو۔ بہر حال میں سمجھتا ہوں کہ اس ضمن میں مولانا مناظر احسن گیلانی کے دلائل کافی معقول اور ٹھوس ہیں۔ 

 آیت ۸۶:  وَاَدْخَلْنٰہُمْ فِیْ رَحْمَتِنَا اِنَّہُمْ مِّنَ الصّٰلِحِیْنَ:   «اور ہم نے ان کو اپنی رحمت میں داخل کیا۔ یقینا وہ سب صالحین میں سے تھے۔» 

 آیت ۸۷:  وَذَا النُّوْنِ اِذْ ذَّہَبَ مُغَاضِبًا:   «اور مچھلی والے کو بھی (ہم نے نوازا) جب وہ چل دیا غصے میں بھرا ہوا»

            یعنی حضرت یونس۔ آپ کو «مچھلی والا» اس لیے فرمایا گیا ہے کہ آپ کو مچھلی نے نگل لیا تھا۔ آپ کو شہر نینوا کی طرف مبعوث فرمایا گیا تھا۔ آپ نے اپنی قوم کو بت پرستی سے روکا اور حق کی طرف بلایا۔ آپ نے بار بار دعوت دی، ہر طرح سے تبلیغ و تذکیر کا حق ادا کیا، مگر اس قوم نے آپ کی کسی بات کو نہ مانا۔ بالآخر اللہ تعالیٰ کی طرف سے ان پر عذاب بھیجنے کا فیصلہ ہو گیا۔ اس موقع پر آپ حمیت حق کے جوش میں قوم سے برہم ہو کر ان کو عذاب کی خبر سنا کر وہاں سے نکل آئے۔ اس سلسلے میں بنیادی طور پر آپ سے ایک «سہو» سرزد ہو گیا کہ آپ نے اللہ تعالیٰ کی طرف سے اجازت آنے سے پہلے ہی اپنے مقامِ بعثت سے ہجرت کر لی، جبکہ اللہ کی باقاعدہ اجازت کے بغیر کوئی رسول اپنے مقامِ بعثت کو چھوڑ نہیں سکتا۔ اسی اصول اور قانون کے تحت ہم دیکھتے ہیں کہ حضور نے تمام مسلمانوں کو مکہ سے مدینہ ہجرت کرنے کی اجازت دے دی تھی، مگر آپ نے خود اس وقت تک ہجرت نہیں فرمائی جب تک اللہ تعالیٰ کی طرف سے باقاعدہ اس کی اجازت نہیں مل گئی۔

            بلاشبہ اللہ تعالیٰ کے قوانین بہت سخت ہیں اور اللہ کے مقرب بندوں کا معاملہ تواللہ کے ہاں خصوصی اہمیت کا حامل ہوتا ہے۔ ان آیات کا مطالعہ اور ترجمہ کرتے ہوئے ہمیں یہ بات اپنے ذہن میں رکھنی چاہیے کہ یہ معاملہ اللہ عزوجل اور اس کے ایک جلیل القدر رسول کے مابین ہے۔ اسے ہم الفاظ کے بظاہر مفہوم پر محمول نہیں کر سکتے۔ حضرت یونس وہ رسول ہیں جن کے بارے میں حضور نے فرمایا:    «مجھے یونس ابن متیّٰ پر بھی فضیلت نہ دو»۔ بہر حال حضرت یونس حمیت ِحق کے باعث اپنی قوم پر غضبناک ہو کر وہاں سے نکل کھڑے ہوئے۔

            فَظَنَّ اَنْ لَّنْ نَّقْدِرَ عَلَیْہِ:   «اور اُس نے گمان کیا کہ ہم اسے پکڑ نہیں سکیں گے»

            واللہ اعلم! یہ الفاظ بہت سخت ہیں۔ مولانا شبیر احمد عثمانی نے ان الفاظ کی وضاحت کرتے ہوئے لکھا ہے کہ یہ مطلب نہیں کہ معاذ اللہ، یونس فی الواقع ایسا سمجھتے تھے کہ وہ بستی سے نکل کر گویا اللہ تعالیٰ کی قدرت سے ہی نکل گئے، بلکہ آپ کے طرزِ عمل سے یوں لگتا تھا۔ یعنی صورت حال ایسی تھی کہ دیکھنے والا یہ سمجھ سکتا تھا کہ شاید آپ نے ایسا سمجھا تھا کہ اللہ ان کو پکڑ نہیں سکے گا، لیکن ظاہر ہے کہ اس کا کوئی امکان نہیں کہ حضرت یونس کے دل میں ایسا کوئی خیال گزرا ہو۔ واقعہ یہ ہے کہ اللہ تعالیٰ اپنے کامل بندوں کی ادنیٰ ترین لغزش کا ذکر بھی بہت سخت پیرایہ میں کرتا ہے۔ مولانا شبیر احمد عثمانی نے لکھا ہے کہ اس سے کاملین کی تنقیص نہیں ہوتی، بلکہ جلالت ِشان ظاہر ہوتی ہے کہ اتنے بڑے ہو کر ایسی چھوٹی سی فروگزاشت بھی کیوں کرتے ہیں! ع «جن کے رُتبے ہیں سوا، اُن کی سوا مشکل ہے!»

            فَنَادٰی فِی الظُّلُمٰت:   «پس اُس نے (اللہ تعالیٰ کو) تاریکیوں کے اندر پکارا»

            آپ اپنے علاقے سے نکلنے کے بعد ایک کشتی میں سوار ہوئے اور وہاں ایسی صورت حال پیدا ہوئی کہ آپ کو دریا میں چھلانگ لگانا پڑی اور ایک بڑی مچھلی نے آپ کو نگل لیا۔ مچھلی کے پیٹ اور قعر دریا کی تاریکیوں میں آپ تسبیح کرتے اور اللہ کو پکارتے رہے:   

            اَنْ لَّآ اِلٰہَ اِلَّآ اَنْتَ سُبْحٰنَکَ اِنِّیْ کُنْتُ مِنَ الظّٰلِمِیْنَ:   «کہ تیر ے سوا کوئی معبود نہیں، تو پاک ہے اور یقینا میں ہی ظالموں میں سے ہوں۔»

            اے اللہ! مجھ سے غلطی ہو گئی ہے، میں خطاکار ہوں، تو مجھے معاف کر دے! یہ آیت «آیت کریمہ» کہلاتی ہے۔ روایات میں اس آیت کے بہت فضائل بیان ہوئے ہیں۔ کسی مصیبت یا پریشانی کے وقت یہ دعا صدق ِدل سے مانگی جائے تو کبھی قبولیت سے محروم نہیں رہتی۔

 آیت ۸۸:  فَاسْتَجَبْنَا لَہُ وَنَجَّیْنٰہُ مِنَ الْغَمِّ:   «تو ہم نے اُس کی دعا قبول فرمائی اور اُسے غم سے نجات دی۔»

            وَکَذٰلِکَ نُنْجِی الْمُؤْمِنِیْنَ:   «اور اسی طرح ہم نجات دیا کرتے ہیں اہل ایمان کو۔»

            یعنی یہ معاملہ حضرت یونس کے ساتھ مخصوص نہیں۔ جو اہل ایمان بھی ہم کو اسی طرح پکاریں گے ہم ان کو مصائب سے نجات دیں گے۔ 

 آیت ۸۹:  وَزَکَرِیَّآ اِذْ نَادٰی رَبَّہ:   «اور زکریا  کو، جب اُس نے پکارا اپنے رب کو»

            اس بارے میں تفصیل سورۂ مریم میں گزر چکی ہے۔

            رَبِّ لَا تَذَرْنِیْ فَرْدًا وَّاَنْتَ خَیْرُ الْوٰرِثِیْنَ:   «پروردگار! مجھے اکیلا نہ چھوڑ، اور یقینا تو ہی بہترین وارث ہے۔»

            اے میرے پروردگار! مجھے کوئی ایسا وارث عطا فرما جو میرے اس مشن کو زندہ رکھ سکے۔

 آیت ۹۰:  فَاسْتَجَبْنَا لَہُ وَوَہَبْنَا لَہُ یَحْیٰی وَاَصْلَحْنَا لَہُ زَوْجَہُ:   «تو ہم نے اُس کی دعا قبول فرمائی اور اسے یحییٰ (جیسا بیٹا) عطا فرمایا اور اس کی بیوی کو اُس کے لیے صحت مند بنا دیا۔»

            اِنَّہُمْ کَانُوْا یُسٰرِعُوْنَ فِی الْْخَیْرٰتِ وَیَدْعُوْنَنَا رَغَبًا وَّرَہَبًا:   «یقینا یہ لوگ ہیں جو بھلائی کے کاموں میں بہت جلدی کرتے تھے اورہمیں پکارتے تھے رغبت اور خوف سے۔»

            اللہ تعالیٰ کے ساتھ ان کا معاملہ بین الخوف والرجاء (خوف اور امید کے درمیان) والا ہوتا تھا۔ اللہ کے مواخذے سے ڈرتے بھی تھے اور اس کی رحمت کے امیدوار بھی رہتے تھے۔

            وَکَانُوْا لَنَا خٰشِعِیْنَ:   «اور وہ سب ہمارے سامنے عاجزی اختیار کرنے والے تھے۔»

            اوصافِ انبیاء کے اس خوبصورت گلدستے کے آخر میں اب حضرت مریم (سلامٌ علیہا) کا ذکر آ رہا ہے۔