حضرت لوط عليه السلام كا قصه

آیت 86:   وَاِسْمٰعِیْلَ وَالْیَسَعَ وَیُوْنُسَ وَلُوْطًا وَکُلاًّ فَضَّلْنَا عَلَی الْعٰلَمِیْنَ:   ’’اور اسماعیل  اور الیَسَع اور یونس  اور لوط  کو بھی (راہ یاب کیا) ،  اور ان سب کو ہم نے تمام جہان والوں  پر فضیلت دی۔،، 

آیت 87:  وَمِنْ اٰبَــآئِہِمْ وَذُرِّیّٰتِہِمْ وَاِخْوَانِہِمْ وَاجْتَـبَیْنٰـہُمْ وَہَدَیْنٰـہُمْ اِلٰی صِرَاطٍ مُّسْتَقِیْمٍ:   ’’اور ان کے آباء و اَجداد میں  سے بھی،  ان کی نسلوں  میں  سے بھی اور ان کے بھائیوں  میں  سے بھی ( ہم نے ہدایت یافتہ بنائے)،  اور ان کو ہم نے چن لیا اور ان کو ہدایت دی سیدھے راستے کی طرف۔،، 

آیت 88:   ذٰلِکَ ہُدَی اللّٰہِ یَہْدِیْ بِہ مَنْ یَّشَآءُ مِنْ عِبَادِہ وَلَوْ اَشْرَکُوْا لَحَبِطَ عَنْہُمْ مَّا کَانُوْا یَعْمَلُوْنَ:   ’’یہ اللہ کی وہ ہدایت ہے جس کے ساتھ وہ راہنمائی فرماتا ہے جس کی چاہتا ہے اپنے بندوں  میں  سے۔ اور اگر (بالفرض) وہ بھی شرک کرتے تو ان کے بھی سارے اعمال ضائع ہو جاتے۔،،

            یہ انداز ہمیں  سمجھانے کی غرض سے اختیار کیا گیا ہے کہ شرک کتنی بری شے ہے۔ ورنہ اس کا کوئی امکان نہیں  تھا کہ ایسے اعلیٰ مراتب پر فائز اللہ کے عظیم الشان انبیاء و رسل شرک میں  مبتلا ہوتے۔ بہر حال اللہ تعالیٰ کے نزدیک شرک ناقابل معافی جرم ہے، جس کے بارے میں  سورۃ النساء میں دو مرتبہ یہ الفاظ آ چکے ہیں:  اِنَّ اللّٰہَ لاَ یَغْفِرُ اَنْ یُّشْرَکَ بِہ وَیَغْفِرُ مَا دُوْنَ ذٰلِکَ لِمَنْ یَّشَآءُ.  (آیت: 48 و116) 

آیت 89:   اُولٰٓئِکَ الَّذِیْنَ اٰتَیْنٰـہُمُ الْکِتٰبَ وَالْحُکْمَ وَالنُّـبُـوَّۃَ:   ’’یہ وہ لوگ ہیں  جن کو ہم نے کتاب،  حکمت، اور نبوت عطا فرمائی۔،،

            فَاِنْ یَّـکْفُرْ بِہَا ہٰٓؤُلَآءِ فَقَدْ وَکَّلْنَا بِہَا قَوْمًا لَّــیْسُوْا بِہَا بِکٰفِرِیْنَ:   ’’پھر اگر یہ لوگ اس کا انکار کر رہے ہیں  تو (کچھ پروا نہیں )  ہم نے کچھ اور لوگ اس کام کے لیے مقرر کر دیے ہیں جو اس کی ناقدری نہیں  کریں  گے۔،،

            مقامِ عبرت ہے! محمد رسول اللہ  جیسا رسول،  مبلغ،  داعی،  مربی،  مزکی اور معلّم پچھلے بارہ سال سے دن رات محنت کر رہا ہے اور اس کے نتیجے میں  اب تک صرف ڈیڑھ، پونے دو سو افراد دائرہ اسلام میں  داخل ہو ئے ہیں ۔ اس پس منظر میں  آپ سے فرمایا جا رہا ہے کہ مکہ کے یہ لوگ اگر اس دعوت کی نا قدری کر رہے ہیں،  اس قرآن کی نا شکری کر رہے ہیں،  اس کا انکار کر رہے ہیں اور آپ کی دس بارہ سال کی محنت کے خاطر خواہ نتائج سامنے نہیں  آئے ہیں  تو آپ دل شکستہ نہ ہوں، عنقریب ایک دوسری قوم بڑے ذوق وشوق سے اس دعوت پر لبیک کہنے جا رہی ہے۔  اس خوش قسمت قوم سے مراد انصارِ مدینہ ہیں۔ اور واقعی اس سلسلے میں  اہل مکہ پیچھے رہ گئے اور اہل مدینہ بازی لے گئے۔ بقولِ شاعر:

گرفتہ چینیاں احرام و مکی خفتہ در بطحا!

            دُنیا کے حالات و اسباب کو دیکھتے ہوئے کچھ نہیں  کہا جا سکتا کہ اللہ تعالیٰ دین کے کام میں  کیسے کیسے اسباب پیدا فرماتے ہیں اور کہاں  کہاں  سے کس کس طرح کے لوگوں  کے دلوں  کو پھیر کر ہدایت کی توفیق دے دیتے ہیں۔ مجھے اپنی دعوت رجوع الی القرآن کے بارے میں  بھی اطمینان ہے کہ پاکستان میں اس کو خاطر خواہ پذیرائی نہیں  ملی تو کیا ہوا،  یہ دعوت مختلف ذرائع سے پوری دنیا میں  پھیل رہی ہے،  اور کچھ نہیں  کہا جا سکتا کہ قرآن کی یہ انقلابی دعوت کس جگہ زمین کے اندر جڑ پکڑ لے اور ایک تناور درخت کی صورت اختیار کر لے۔

آیت 90:  اُولٰٓئِکَ الَّذِیْنَ ہَدَی اللّٰہُ فَبِہُدٰٹہُمُ اقْتَدِہْ:   ’’یہی لوگ ہیں  جن کو اللہ نے ہدایت دی تھی،  تو آپ بھی ان کی ہدایت کی پیروی کیجیے۔،،

            یعنی ابھی جن ابنیاء و رسل کا ذکر ہوا ہے،  سترہ ناموں  کا خوبصورت گلدستہ آپ نے ملاحظہ کیا ہے،  وہ سب کے سب اللہ تعالیٰ کے ہدایت یافتہ تھے۔ اس سلسلے میں  حضور کو فرمایا جا رہا ہے کہ آپ بھی ان کے طریقے کی پیروی کریں۔ اس آیت سے ایک بہت اہم نکتہ اور اصول یہ سامنے آتا ہے کہ سابق انبیاء کی شریعت کا ذکر کرتے ہوئے جن احکام کی نفی نہ کی گئی ہو،  وہ ہمارے لیے بھی قابل اتباع ہیں ۔ مثلاً رجم کی سزا قرآن میں  مذکور نہیں  ہے،  یہ سابقہ شریعت کی سزا ہے،  جس کو حضور نے برقرار رکھا ہے۔ اسی طرح قتل مرتد کی سزا کا ذکر بھی قرآن میں  نہیں  ہے،  یہ بھی سابقہ شریعت کی سزا ہے ، جس کو برقرار رکھا گیا ہے۔ اس نکتے سے یہ اصول سامنے آتا ہے کہ جب تک قرآن و سنت میں  سابقہ شریعت کے کسی حکم کی نفی نہیں  ہوتی وہ حکم اسلامی شریعت میں  برقرار رہتا ہے۔

            قُلْ لَّآ اَسْئَلُکُمْ عَلَیْہِ اَجْرًا اِنْ ہُوَ اِلاَّ ذِکْرٰی لِلْعٰلَمِیْنَ:   ’’کہہ دیجیے میں  تم سے اس پر کسی اجر کا طالب نہیں  ہوں ۔ یہ نہیں  ہے مگر تمام جہان والوں  کے لیے یاد دہانی۔ ،،

            یہ قرآن تو بس اہل عالم کے لیے ایک نصیحت ہے، یاد دہانی ہے،  جو چاہے اس سے کسب ِفیض کرے،  جو چاہے اس سے نور حاصل کرے،  جو چاہے اس سے صراطِ مستقیم کی راہنمائی اخذ کر لے۔ 

آیت 80:  وَلُوْطًا اِذْ قَالَ لِقَوْمِہ:  ’’اور لوط (کو بھی ہم نے بھیجا) جب اُس نے کہا اپنی قوم سے‘‘

            اگرچہ حضرت لوط اس قوم میں سے نہیں تھے، لیکن ان کی طرف مبعوث ہونے اور وہاں جا کر آباد ہو جانے کی وجہ سے ان لوگوں کو آپ کی قوم قرار دیا گیا هے۔

            اَتَاْتُوْنَ الْفَاحِشَۃَ مَا سَبَقَکُمْ بِہَا مِنْ اَحَدٍ مِّنَ الْعٰلَمِیْنَ:  ’’کیا تم ایسی بے حیائی کا ارتکاب کر رہے ہو جوتم سے پہلے تمام جہان والوں میں سے کسی نے بھی نہیں کی۔‘‘

            یعنی اجتماعی طور پر پوری قوم کا ایک شرمناک فعل کو اس انداز سے اپنا لینا کہ اسے اپنا شعار بنا لینا‘ کھلم کھلا اس کا ارتکاب کرنا اور اس میں شرمانے کی بجائے فخر کرنا‘ اس سب کچھ کی مثال تاریخ ِانسانی کے اندر کوئی اور نہیں ملتی۔ 

آیت81:  اِنَّکُمْ لَتَاْتُوْنَ الرِّجَالَ شَہْوَۃً مِّنْ دُوْنِ النِّسَآءِ بَلْ اَنْتُمْ قَوْمٌ مُّسْرِفُوْنَ:  ’’تم مردوں کا رُخ کرتے ہو شہوت کے ساتھ عورتوں کو چھوڑ کر‘ بلکہ تم تو ہو ہی حد سے تجاوز کرنے والی قوم۔‘‘

            یعنی تمہارا یہ فعل اصولِ فطرت کے بھی خلاف ہے اور قانونِ طبعی سے بھی متصادم۔ 

آیت82:  وَمَا کَانَ جَوَابَ قَوْمِہ اِلآَّ اَنْ قَالُوْٓا اَخْرِجُوْہُمْ مِّنْ قَرْیَتِکُمْ اِنَّہُمْ اُنَاسٌ یَّتَطَہَّرُوْنَ:  ’’تو نہیں تھا اس کی قوم کا کوئی جواب سوائے اس کے کہ انہوں نے کہا نکالو ان کو اپنی بستی سے، یہ لوگ بڑے پاکباز بنتے ہیں۔‘‘

            ان کے پاس کوئی معقول جواب تو تھا نہیں، شرم و حیا کو وہ لوگ پہلے ہی بالائے طاق رکھ چکے تھے۔ کوئی دلیل‘ کوئی عذر‘ کوئی معذرت، جب کچھ بھی نہ بن پڑا تو وہ حضرت لوط اور آپ کے گھر والوں کو شہر بدر کرنے کے درپے ہو گئے۔ حضرت لوط کی بیوی اس مقامی قوم سے تعلق رکھتی تھی‘ اس لیے وہ آخر وقت تک اپنی قوم کے ساتھ ملی رہی۔ حضرت لوط اللہ کے حکم سے اپنی بیٹیوں کو لے کر عذاب آنے سے پہلے وہاں سے نکل گئے۔ 

آیت 83:  فَاَنْجَیْنٰـہُ وَاَہْلَہ اِلاَّ امْرَاَتَہ کَانَتْ مِنَ الْغٰبِرِیْنَ:  ’’تو ہم نے نجات دے دی اُس کو اور اُس کے گھر والوں کو‘ سوائے اُس کی بیوی کے‘ وہ ہو گئی پیچھے رہنے والوں ہی میں۔‘‘ 

آیت 84:  وَاَمْطَرْنَا عَلَیْہِمْ مَّطَرًا فَانْظُرْ کَیْفَ کَانَ عَاقِبَۃُ الْمُجْرِمِیْن:  ’’اور ہم نے برسائی ان پر ایک بارش‘ تو دیکھو کیا انجام ہوا مجرموں کا!‘‘

            یہ پتھروں کی بارش تھی اور ساتھ شدید زلزلہ بھی تھا جس سے ان کی بستیاں الٹ کر بحیرہ مردار کے اندر دفن ہو گئیں۔ قومِ لوط اہل مکہ سے زمانی اور مکانی لحاظ سے زیادہ دور نہیں تھی‘ اس قوم کے قصے اہل ِعرب کی تاریخی روایات کے اندر موجود تھے۔ چنانچہ اہل مکہ اس قوم کے حسرتناک انجام سے خوب واقف تھے۔ 

 آیت ۷۴:  فَلَمَّا ذَہَبَ عَنْ اِبْرٰہِیْمَ الرَّوْعُ وَجَآءَتْہُ الْـبُشْرٰی یُجَادِلُنَا فِیْ قَوْمِ لُوْطٍ:  «پھرجب ابراہیم  کا خوف جاتا رہا اور یہ بشارت بھی پہنچ گئی، تو آپ  نے جھگڑنا شروع کر دیا ہم سے قومِ لوط  کے بارے میں۔ »

            حضرت ابراہیم کا یہ مجادلہ تورات میں بڑی تفصیل سے بیان ہوا ہے۔  اس کا خلاصہ یہ ہے کہ حضرت ابراہیم نے فرشتوں سے کہا کہ اگر ان بستیوں میں پچاس آدمی بھی راست باز ہوئے تو کیا پھر بھی ان کو ہلاک کر دیا جائے گا؟ فرشتوں نے جواب دیا کہ نہیں، پھر انہیں ہلاک نہیں کیا جائے گا۔  پھر حضرت ابراہیم نے چالیس آدمیوں کا پوچھا، تو انہوں نے کہا کہ پھر بھی اُن کو تباہ نہیں کیا جائے گا۔  چنانچہ اس طرح بات ہوتے ہوتے پانچ آدمیوں پر آ گئی۔  اس پر حضرت ابراہیم کو بتایا گیا کہ آپ  اس بحث کو چھوڑ دیں۔  اب تو آپ  کے رب کا فیصلہ آ چکا ہے، کیونکہ ان بستیوں میں خود حضرت لوط اور اِن کی دو بیٹیوں کے علاوہ کوئی ایک متنفس بھی راست باز نہیں ہے۔  

 آیت ۷۵:  اِنَّ اِبْرٰہِیْمَ لَحَلِیْمٌ اَوَّاہٌ مُّنِیْبٌ:  «یقینا ابراہیم  بہت ہی بردبار، نرم دل اور اللہ کی جناب میں رجوع کرنے والے تھے۔ »

            یہاں حضرت ابراہیم کی یہ تین صفات ایک ساتھ جمع فرما کر آپ  کی بہت قدر افزائی بھی فرمائی گئی ہے اور آپ  کے مجادلہ کرنے کی وجہ بھی بیان فرما دی گئی ہے کہ چونکہ آپ  بہت حلیم الطبع اور دل کے نرم تھے، اسی وجہ سے آپ  نے آخری حد تک کوشش کی کہ عذاب کے ٹلنے کی کوئی صورت پیدا ہو جائے۔  اسی طرح محمد ٌرسول اللہ  کی طبیعت مبارک میں بھی خصوصی نرمی تھی اور حضرت ابو بکر صدیق کو بھی اللہ نے طبیعت کی خاص نرمی عطا کر رکھی تھی۔ 

 آیت ۷۶:  یٰٓــاِبْرٰہِیْمُ اَعْرِضْ عَنْ ہٰذَا اِنَّہ قَدْ جَآءَ اَمْرُ رَبِّکَ:  «اے ابراہیم  چھوڑیے اس معاملے کو، اب تو آپ  کے رب کا فیصلہ آ چکا ہے۔ »

             وَاِنَّہُمْ اٰتِیْہِمْ عَذَابٌ غَیْرُ مَرْدُوْدٍ:  «اور ان پر وہ عذاب آ کر ہی رہے گا جسے لوٹایا نہیں جا سکے گا۔»

 آیت ۷۷:  وَلَمَّا جَآءَتْ رُسُلُنَا لُوْطًا سِیْٓئَ بِہِمْ وَضَاقَ بِہِمْ ذَرْعًا:  «اور جب آئے ہمارے فرستادے لوط  کے پاس تو آپ  ان کی وجہ سے بڑے غمگین ہوئے، اور آپ  کا دل بہت تنگ ہوا»

             وَّقَالَ ہٰذَا یَوْمٌ عَصِیْبٌ:  «اورآپ  کہنے لگے کہ آج تو بہت سختی کا دن ہے۔ »

            چونکہ ان بستیوں کے لوگوں میں اَمرد پرستی عام تھی، لہٰذا ان کی آخری آزمائش کے لیے فرشتوں کو ان کے پاس نوجوان خوبصورت لڑکوں کے روپ میں بھیجا گیا تھا۔  حضرت لوط ان خوبصورت مہمان لڑکوں کو دیکھ کر اسی لیے پریشان ہوئے کہ اب وہ اپنے ان مہمانوں کا دفاع کیسے کریں گے۔  اس لیے کہ آپ  جانتے تھے کہ ان کی قوم کے لوگ کسی اپیل یا دلیل سے باز آنے والے نہیں تھے اور آپ  اکیلے زبردستی انہیں روک نہیں سکتے تھے۔ 

 آیت ۷۸:  وَجَآءَہ قَوْمُہ یُہْرَعُوْنَ اِلَیْہِ وَمِنْ قَبْلُ کَانُوْا یَعْمَلُوْنَ السَّیِّاٰتِ:  «اور آئے آپ  کی قوم کے لوگ دیوانہ وار دوڑتے ہوئے آپ  (کے گھر) کی طرف، اور وہ پہلے سے ہی گندے کاموں میں ملوث تھے۔ »

             قَالَ یٰــقَوْمِ ہٰٓؤُلَآءِ بَنَاتِیْ ہُنَّ اَطْہَرُ لَـکُمْ:  «لوط  نے فرمایا : اے میری قوم کے لوگو! یہ میری بیٹیاں (موجود) ہیں، وہ تمہارے لیے زیادہ پاکیزہ ہیں»

            مفسرین نے اس کے ایک معنی تو یہ مراد لیے ہیں کہ تمہارے گھروں میں تمہاری بیویاں موجود ہیں جو میری بیٹیوں ہی کی مانند ہیں، کیونکہ نبی اپنی پوری قوم کے لیے باپ کی طرح ہوتا ہے۔  جیسے سورۃ الاحزاب (آیت: 6) میں حضور کے بارے میں فرمایا گیا ہے: وَاَزْوَاجُہ اُمَّہٰتُہُمْ.  کہ آپ کی تمام ازواجِ مطہرات مؤمنین کی مائیں ہیں۔ اس کے دوسرے معنی یہ بھی ہو سکتے ہیں کہ حضرت لوط نے اپنی بیٹیوں کے بارے میں فرمایا کہ یہ میری بیٹیاں ہیں، اُن سے جائز اور پاکیزہ طریقے سے نکاح کر لو، میں اس کے لیے تیار ہوں، لیکن میرے ان مہمانوں کے بارے میں مجھے رسوا نہ کرو۔

             فَاتَّقُوا اللّٰہَ وَلاَ تُخْزُوْنِ فِیْ ضَیْفِیْ اَلَیْسَ مِنْکُمْ رَجُلٌ رَّشِیْدٌ:  «تو اللہ کا خوف کرو اور مجھے میرے مہمانوں کے معاملہ میں رسوا نہ کرو۔ کیا تم میں کوئی ایک آدمی بھی نیک چلن نہیں ہے؟»

            کیا تم لوگوں میں کوئی ایک بھی شریف النفس انسان نہیں ہے جو میرا ساتھ دے اور ان سب لوگوں کو بد اخلاقی اور بے حیائی سے روکے۔ 

 آیت ۷۹:  قَالُوْا لَقَدْ عَلِمْتَ مَا لَنَا فِیْ بَنٰتِکَ مِنْ حَقٍّ وَاِنَّکَ لَتَعْلَمُ مَا نُرِیْدُ:  «انہوں نے کہا کہ تمہیں تو معلوم ہی ہے کہ تمہاری ان بیٹیوں پر ہمارا کوئی حق نہیں ہے، اور تم خوب جانتے ہو جو ہم چاہتے ہیں۔ »

            قوم کے لوگوں نے کہا کہ اب آپ  اِدھر اُدھر کی باتیں مت کیجیے، آپ خوب سمجھتے ہیں کہ ہمارا یہاں آنے کا مقصد کیا ہے۔  

 آیت ۸۰:  قَالَ لَوْ اَنَّ لِیْ بِکُمْ قُوَّۃً اَوْ اٰوِیْٓ اِلٰی رُکْنٍ شَدِیْدٍ:  «لوط  نے کہا : کاش میرے پاس تمہارے مقابلہ کے لیے کوئی طاقت ہوتی یا کوئی مضبوط سہارا ہوتا جس کی میں پناہ لے لیتا۔ »

            اس ضمن میں نبی اکرم نے فرمایا: «یَرْحَمُ اللّٰہُ لُوْطًا لَقَدْ کَانَ یَاْوِیْ اِلٰی رُکْنٍ شَدِیْدٍ».«اللہ رحم فرمائے لوط پر، وہ ایک مضبوط قلعہ میں ہی تو تھے۔» یعنی اللہ تعالیٰ کی پشت پناہی اور حفاظت تو حضرت لوط کو حاصل تھی۔  لیکن اس وقت جو صورتِ حال بن گئی تھی اس میں بر بنائے طبع بشری پریشانی اور خوف کا طاری ہو جانا نبوت کی عصمت کے منافی نہیں ہے۔  جیسے حضرت موسیٰ بھی وقتی طور پر جادوگروں کے سانپوں سے ڈر گئے تھے۔ 

 آیت ۸۱:  قَالُوْا یٰـلُوْطُ اِنَّا رُسُلُ رَبِّکَ لَنْ یَّصِلُوْٓا اِلَیْکَ:  « فرشتوں نے کہا: اے لوط! ہم آپ  کے رب کے بھیجے ہوئے (فرشتے) ہیں، یہ لوگ آپ  تک نہیں پہنچ پائیں گے»

            فرشتوں نے اپنا تعارف کراتے ہوئے آپ  کو تسلی دی کہ آپ  اطمینان رکھیں، یہ لوگ آپ  کوکوئی گزند نہیں پہنچا سکیں گے۔ پھر فرشتے نے اپنا ہاتھ ہلایا تو وہ سب نا بکار اندھے ہو گئے۔

             فَاَسْرِ بِاَہْلِکَ بِقِطْعٍ مِّنَ الَّیْلِ وَلاَ یَلْتَفِتْ مِنْکُمْ اَحَدٌ:  «پس آپ  رات کے (اس بقیہ) حصے میں اپنے گھر والوں کو لے کر نکل جائیں اور کوئی بھی آپ میں سے پیچھے مڑکر نہ دیکھے »

            یعنی یہاں سے جاتے ہوئے آپ لوگو ں کو پیچھے رہ جانے والوں کی طرف کسی قسم کی کوئی توجہ کرنے کی ضرورت نہیں ہے۔

             اِلاَّ امْرَاَتَکَ اِنَّہ مُصِیْبُہَا مَآ اَصَابَہُمْ:  «سوائے آپ  کی بیوی کے، اس پر بھی وہی مصیبت آئے گی جو سب پر آنے والی ہے۔ »

            یعنی جب آپ  اپنے گھر والوں کو لے کر یہاں سے نکلیں گے تو اپنی بیوی کو ساتھ لے کر نہیں جائیں گے۔  آپ  کی اس بیوی کا ذکر سورۃ التحریم میں حضرت نوح کی مشرک بیوی کے ساتھ اس طرح ہوا ہے: ضَرَبَ اللّٰہُ مَثَلًا لِّلَّذِیْنَ کَفَرُوا امْرَاَتَ نُوْحٍ وَّامْرَاَتَ لُوْطٍ کَانَتَا تَحْتَ عَبْدَیْنِ مِنْ عِبَادِنَا صَالِحَیْنِ فَخَانَتٰہُمَا فَلَمْ یُغْنِیَا عَنْہُمَا مِنَ اللّٰہِ شَیْئًا وَّقِیْلَ ادْخُلَا النَّارَ مَعَ الدّٰخِلِیْنَ.  «اللہ کافروں کے لیے مثال بیان کرتا ہے نوح  کی بیوی اور لوط  کی بیوی کی۔  وہ دونوں عورتیں ہمارے دو برگزیدہ بندوں کے تحت تھیں لیکن انہوں نے اپنے شوہروں سے خیانت کی، چنانچہ ان کے شوہر انہیں اللہ کے عذاب سے بچا نہیں سکے۔ اور (ان دونوں عورتوں سے) کہہ دیا گیا کہ تم بھی (جہنم میں) داخل ہونے والوں کے ساتھ جہنم میں داخل ہو جاؤ۔ »

             اِنَّ مَوْعِدَہُمُ الصُّبْحُ اَلَیْسَ الصُّبْحُ بِقَرِیْبٍ:  «ان کے وعدے کا وقت صبح کا ہے، کیا صبح قریب نہیں ہے!»

            فرشتوں نے حضرت لوط سے کہا کہ اب آپ لوگوں کے پاس زیادہ وقت نہیں ہے۔ آپ  فوری طور پر اپنی بچیوں کو لے کر یہاں سے نکل جائیں، صبح ہوتے ہی ان بستیوں پر عذاب آ جائے گا۔  اور صبح ہونے میں اب دیر ہی کتنی ہے!

 آیت ۸۲:  فَلَمَّا جَآءَ اَمْرُنَا جَعَلْنَا عَالِیَہَا سَافِلَہَا:  «پھر جب ہمارا حکم آ پہنچا تو ہم نے اس کے اوپر (کے حصے) کو نیچا کر دیا»

            یعنی ان بستیوں کو تلپٹ کر دیا گیا۔  جب عمارتیں تباہ ہوتی ہیں تو چھت زمیں بوس ہو جاتی ہے اور دیوار یں اس کے اوپر گرتی ہیں، بنیادیں بھی اوپر آ جاتی ہیں۔  

             وَاَمْطَرْنَا عَلَیْہَا حِجَارَۃً مِّنْ سِجِّیْلٍ مَّنْضُوْدٍ :  «اور (مزید) ہم نے ان پر بارش برسائی تہہ بر تہہ کنکریوں کی۔ »

            سِجِّیل: اصل میں فارسی لفظ ہے۔  فارسی میں یہ «سنگ گل» تھا جو عربی میں آ کر سِجِّیل کا تلفظ اختیار کر گیا۔  سنگ کے معنی پتھر اور گل کے معنی مٹی کے ہیں۔  یعنی مٹی کے پتھر جو گیلی مٹی کے دھوپ میں گرم ہو کر پختہ ہو جانے کے بعد بنتے ہیں، جیسے اینٹوں کو بھٹے میں پکایا جاتا ہے۔ ان بستیوں پر عذاب دو صورتوں میں آیا، ایک زمین کے اندر کوئی زور دار دھماکہ ہوا، جس کے نتیجے میں زبردست زلزلہ آیا اور یہ بستیاں الٹ پلٹ ہو گئیں۔  پھر اوپر سے کنکریوں کی بارش ہوئی اور اس طرح انہیں ان پتھروں کے اندر دفن کر دیا گیا۔ 

 آیت ۸۳:  مُّسَوَّمَۃً عِنْدَ رَبِّکَ:  «وہ نشان زدہ تھے تمہارے رب کی طرف سے۔ »

            یعنی ہر پتھر ایک آدمی کے لیے نشان زدہ اور مخصوص تھا۔

             وَمَا ہِیَ مِنَ الظّٰلِمِیْنَ بِبَعِیْدٍ:  «اور یہ ان ظالموں سے کوئی زیادہ دور نہیں۔ »

            یعنی مشرکین مکہ سے قومِ لوط  کی یہ بستیاں زیادہ دور نہیں ہیں۔  قریش کے قافلے جب فلسطین کی طرف جاتے تھے تو پہلے قومِ ثمود اور قومِ مدین کے علاقے سے گزرتے تھے، پھر قومِ لوط کی بستیوں کے آثار بھی اُن کے راستے میں آتے تھے۔  

 آیت ۵۸:  قَالُوْٓا اِنَّآ اُرْسِلْنَآ اِلٰی قَوْمٍ مُّجْرِمِیْنَ: «انہوں نے کہا کہ ہمیں بھیجا گیا ہے ایک مجرم قوم کی طرف۔»

 آیت ۵۹:  اِلآَّ اٰلَ لُوْطٍ اِنَّا لَمُنَجُّوْہُمْ اَجْمَعِیْنَ: «سوائے آل ِلوط  کے، ان سب کو ہم ضروربچا لیں گے۔»

 آیت ۶۰:  اِلاَّ امْرَاَتَہ قَدَّرْنَآ اِنَّہَا لَمِنَ الْغٰبِرِیْنَ: «سوائے اُن کی بیوی کے، ہم نے اندازہ ٹھہرالیا ہے کہ وہ یقینا پیچھے رہنے والوں میں سے ہو گی۔»

 آیت ۶۱:  فَلَمَّا جَاءَ اٰلَ لُوْطِ  ِالْمُرْسَلُوْنَ: «تو جب لوط  کے گھر پہنچے وہ بھیجے ہوئے۔»

 آیت ۶۲:  قَالَ اِنَّکُمْ قَوْمٌ مُّنْکَرُوْنَ : «اُس (لوط) نے کہا کہ یقینا تم اجنبی لوگ ہو۔»

            حضرت لوط نے دیکھا کہ یہ بالکل اجنبی لوگ ہیں، تو انہوں نے پوچھا کہ آپ لوگ کون ہیں، اور کہاں سے تشریف لائے ہیں؟ آپ کی تشریف آوری کا مقصد کیا ہے؟

 آیت ۶۳:  قَالُوْا بَلْ جِئْنٰکَ بِمَا کَانُوْا فِیْہِ یَمْتَرُوْنَ: «انہوں نے کہا : بلکہ ہم تو آپ کے پاس وہ شے لے کر آئے ہیں جس کے بارے میں یہ لوگ شک میں پڑے ہوئے تھے۔»

            حضرت لوط جب اپنی قوم کو متنبہ کرتے تھے کہ اگر تم لوگ شرک سے اور اس فعل خبیث سے باز نہیں آؤ گے تو تم پر اللہ کا عذاب آئے گا، تووہ آپ کا مذاق اڑاتے تھے، کیونکہ انہیں یقین نہیں تھا کہ ان پر واقعی عذاب آجائے گا۔ فرشتوں نے کہا کہ آج ہم وہی عذاب لے کر آ گئے ہیں جس کے بارے میں یہ لوگ شک میں تھے۔

 آیت ۶۴:  وَاَتَیْنٰکَ بِالْحَقِّ وَاِنَّا لَصٰدِقُوْنَ: «اور ہم آئے ہیں آپ کے پاس حق (قطعی فیصلے) کے ساتھ اور یقینا ہم سچے ہیں۔»

 آیت ۶۵:  فَاَسْرِ بِاَہْلِکَ بِقِطْعٍ مِّنَ الَّیْلِ وَاتَّبِعْ اَدْبَارَہُمْ وَلاَ یَلْتَفِتْ مِنْکُمْ اَحَدٌ: «تو آپ اپنے گھر والوں کو لے جائیے رات کے ایک حصے میں، اور آپ ان کے پیچھے پیچھے جائیے، اور آپ لوگوں میں سے کوئی بھی پیچھے مڑ کر نہ دیکھے»

            یعنی آپ لوگ صبح ہونے سے پہلے پہلے یہاں سے نکل جائیں۔پیچھے رہ جانے والوں کے لیے اب دوستی اور ہمدردی جیسے جذبات کا اظہار کسی بھی شکل میں نہیں ہونا چاہیے۔

             وَّامْضُوْا حَیْثُ تُؤْمَرُوْنَ: «اور آپ چلے جائیے جہاں آپ کو حکم ہوا ہے۔»

 آیت ۶۶:  وَقَضَیْنَآ اِلَیْہِ ذٰلِکَ الْاَمْرَ اَنَّ دَابِرَ ہٰٓؤُلَآءِ مَقْطُوْعٌ مُّصْبِحِیْنَ: «اور ہم نے لوط کو اپنے اس فیصلے سے آگاہ کر دیاکہ صبح ہوتے ہی ان لوگوں کی جڑ کاٹ دی جائے گی۔»

            وہاں سے نکلنے سے پہلے حضرت لوط کو بتا دیا گیا کہ اس پوری قوم کو تہس نہس کر دیا جائے گا اور یہاں کوئی ایک متنفس بھی نہیں بچے گا۔ 

 آیت ۶۷:  وَجَآءَ اَہْلُ الْمَدِیْنَۃِ یَسْتَبْشِرُوْنَ: «اور آئے اہل ِشہر خوشیاں مناتے ہوئے۔»

            حضرت لوط کے ہاں خوبصورت لڑکوں کو دیکھ کر بد قماش قسم کے لوگوں نے خوشی خوشی آپ کے گھر پر یلغار کر دی۔ 

 آیت ۶۸:  قَالَ اِنَّ ہٰٓؤُلَآءِ ضَیْفِیْ فَلاَ تَفْضَحُوْنِ: «لوط نے کہا: یہ میرے مہمان ہیں، چنانچہ تم لوگ مجھے رسوا نہ کرو۔»

 آیت ۶۹:  وَاتَّقُوا اللّٰہَ وَلاَ تُخْزُوْنِ: «اللہ سے ڈرو اور مجھے بے آبرو مت کرو۔» 

 آیت ۷۰:  قَالُوْٓا اَوَلَمْ نَنْہَکَ عَنِ الْعٰلَمِیْنَ: «انہوں نے کہا: کیا ہم نے آپ کو سب دنیا والوں (کی حمایت میں کھڑے ہونے) سے منع نہیں کیا تھا؟»

            کیا ہم آپ کو منع نہیں کر چکے کہ آپ ہر کسی کی طرف داری کرتے ہوئے ہمارے معاملے میں دخل اندازی نہ کیا کریں۔ ہم جس کے ساتھ جو چاہیں کریں، آپ بیچ میں آنے والے کون ہوتے ہیں؟

 آیت ۷۱:  قَالَ ہٰٓؤُلَآءِ بَنٰتِیْٓ اِنْ کُنْتُمْ فٰعِلِیْنَ : «آپ نے کہا :یہ میری بیٹیاں ہیں اگر تمہیں کچھ کرنا ہی ہے۔»

            قبل ازیں اس فقرے کی وضاحت ہو چکی ہے۔ یعنی میری قوم کی بیٹیاں جو تمہارے گھروں میں موجود ہیں ان کی طرف رجوع کرو۔ اللہ تعالیٰ نے انہیں تمہارے لیے فطری ساتھی بنایا ہے۔ اس فقرے کا دوسرا مطلب یہ بھی ہو سکتا ہے کہ آپ نے اتمام حجت کے لیے ان میں سے دو سرداروں کو یہاں تک کہہ دیا ہو کہ اگر ایسی ہی بات ہے تو میں اپنی بیٹیوں کا نکاح تم سے کیے دیتا ہوں۔ 

 آیت ۷۲:  لَعَمْرُکَ اِنَّہُمْ لَفِیْ سَکْرَتِہِمْ یَعْمَہُوْنَ: «قسم ہے آپ کی جان کی، وہ لوگ اپنی اس بدمستی میں بالکل اندھے ہو گئے تھے۔»

            عمہ کے مادہ میں دل کے اندھے پن کا مفہوم پایا جاتا ہے، یعنی ان لوگوں کے دل بھلائی اور برائی کی تمیز سے بالکل عاری ہو گئے تھے۔ 

 آیت ۷۳:  فَاَخَذَتْہُمُ الصَّیْحَۃُ مُشْرِقِیْنَ: «تو انہیں آ پکڑا ایک چنگھاڑ نے اجالا ہونے کے وقت۔»

            یعنی پو پھٹتے ہی ان پر اللہ کے عذاب کا کوڑا ایک زبردست چنگھاڑ کے ساتھ ٹوٹ پڑا۔

 آیت ۷۴:  فَجَعَلْنَا عَالِیَہَا سَافِلَہَا وَاَمْطَرْنَا عَلَیْہِمْ حِجَارَۃً مِّنْ سِجِّیْلٍ: «پھر ہم نے اس کے اوپر والے حصے کو بنا دیا اس کے نچلے والا، اورہم نے برسائے ان کے اوپر پکی ہوئی مٹی کے کنکر۔»

            یعنی ان آبادیوں کو پوری طرح تلپٹ کر دیا گیا اور ان پر سنگ ِگل کی بارش برسائی گئی۔

 آیت ۷۵:  اِنَّ فِیْ ذٰلِکَ لَاٰیٰتٍ لِّلْمُتَوَسِّمِیْنَ: «یقینا اس میں نشانیاں ہیں ان لوگوں کے لیے جو حق کے متلاشی ہوتے ہیں۔»

            «متوسمین» سے مراد وہ لوگ ہیں جو آیات ِآفاقیہ، آیاتِ تاریخیہ، آیاتِ انفسیہ یا آیاتِ قرآنیہ کے ذریعے سے حقیقت کو جاننا اور پہچاننا چاہیں۔ اسم (اصل مادہ « س م و» ہے، الف اس کے حروف اصلیہ میں سے نہیں ہے) کے معنی علامت کے ہیں۔ اردو میں لفظ «اسم» کو نام کے مترادف کے طور پر جانا جاتا ہے، اس لیے کہ کسی چیز یا شخص کا نام بھی ایک علامت کا کام دیتا ہے، جس سے اس کی پہچان ہوتی ہے۔ لہٰذا جو اصحاب ِبصیرت علامتوں سے متوسم (باب تفعل) ہوتے ہیں، ان کے لیے ایسے واقعات میں سامانِ عبرت موجود ہے۔ 

 آیت ۷۶:  وَاِنَّہَا لَبِسَبِیْلٍ مُّقِیْمٍ: «اور یہ بستیاں ایک سیدھی راہ پر واقع تھیں۔»

            قومِ لوط کی یہ بستیاں اس شاہراہ عام پر واقع تھیں جو یمن (بحیره عرب) اور شام (بحیره روم) کے ساحلوں کو آپس میں ملاتی تھی۔ مشرقی ممالک (ہندوستان، چین، جاوا، ملایا وغیرہ) سے یورپ جانے کے لیے جو سامان آتا تھا وہ یمن کے ساحل پر اتارا جاتا تھا اور پھر اس راستے سے تجارتی قافلے اسے شام اور فلسطین کے ساحل پر پہنچا دیتے تھے۔ اسی طرح یورپ سے مشرقی ممالک کے لیے آنے والا سامان شام کے ساحل پر اترتا تھا اور یہی قافلے اسے یمن کے ساحل پر پہنچانے کا ذریعہ بنتے تھے۔ اُس وقت نہر سویز بھی نہیں بنی تھی اور «راس امید» والا راستہ (Around the Cape of Good Hope) بھی دریافت نہیں ہوا تھا، جو واسکو ڈے گاما نے ۱۴۹۸ء میں تلاش کیا۔ چنانچہ یہ شاہراہ اس زمانے میں مشرق اور مغرب کے درمیان تجارتی رابطے کا واحد ذریعہ تھی۔

 آیت ۷۷:  اِنَّ فِیْ ذٰلِکَ لَاٰیَۃً لِّلْمُؤْمِنِیْنَ: «یقینا اس میں نشانی ہے اہل ِایمان کے لیے۔»

 آیت ۷۴:  وَلُوْطًا اٰتَیْنٰہُ حُکْمًا وَّعِلْمًا:   «اور لوط  کو ہم نے حکم اور علم عطا فرمایا»

             حکم سے حکمت، فہم اور قوتِ فیصلہ مراد ہے۔

            وَّنَجَّیْنٰہُ مِنَ الْقَرْیَۃِ الَّتِیْ کَانَتْ تَّعْمَلُ الْخَبٰٓئِثَ:   «اور ہم نے اسے نجات دی اس بستی سے جو گندے کام کرتی تھی۔»

            یعنی اس بستی کے لوگ گندے کاموں میں مبتلا تھے۔

            اِنَّہُمْ کَانُوْا قَوْمَ سَوْءٍ فٰسِقِیْنَ:   «یقینا وہ نہایت برے اور نافرمان لوگوں کی قوم تھی۔» 

 آیت ۷۵:  وَاَدْخَلْنٰـہُ فِیْ رَحْمَتِنَا اِنَّہُ مِنَ الصّٰلِحِیْنَ:   «اور لوط  کوہم نے اپنی رحمت میں داخل کیا۔ یقینا وہ (ہمارے) صالح بندوں میں سے تھا۔» 

آیت ۱۶۰ کَذَّبَتْ قَوْمُ لُوْطِ الْمُرْسَلِیْنَ: ’’ (اسی طرح) جھٹلایا لوطؑ کی قوم نے بھی مرسلینؑ کو۔‘‘

آیت ۱۶۱ اِذْ قَالَ لَہُمْ اَخُوْہُمْ لُوْطٌ اَلَا تَتَّقُوْنَ: ’’جب کہا ان سے ان کے بھائی لوطؑ نے کہ کیا تم ڈرتے نہیں ہو؟‘‘

آیت ۱۶۲ اِنِّیْ لَکُمْ رَسُوْلٌ اَمِیْنٌ: ’’میں یقینا تمہارے لیے ایک امانت دار رسول ؑہوں۔‘‘

آیت ۱۶۳ فَاتَّقُوا اللّٰہَ وَاَطِیْعُوْنِ: ’’پس تم اللہ کا تقویٰ اختیار کرو اور میری اطاعت کرو۔‘‘

آیت ۱۶۴ وَمَآ اَسْئَلُکُمْ عَلَیْہِ مِنْ اَجْرٍ اِنْ اَجْرِیَ اِلَّا عَلٰی رَبِّ الْعٰلَمِیْنَ: ’’ اور میں تم سے اس پر کسی اُجرت کا طالب نہیں ہوں، نہیں ہے میری اُجرت مگر تمام جہانوں کے ربّ کے ّذمے۔‘‘

آیت ۱۶۵ اَتَاْتُوْنَ الذُّکْرَانَ مِنَ الْعٰلَمِیْنَ: ’’کیا تمام جہانوں میں تم ہی (شہوت کے لیے) مردوں کے پاس جاتے ہو؟‘‘

      دنیا جہان میں ایک تم ہی ایسے لوگ ہو جو شہوت رانی کی غرض سے َمردوں کے پاس جاتے ہو۔ ورنہ انسانوں میں کوئی دوسری قوم یہ حرکت نہیں کرتی، بلکہ یہ کام تو جانور بھی نہیں کرتے۔

آیت ۱۶۹ رَبِّ نَجِّنِیْ وَاَہْلِیْ مِمَّا یَعْمَلُوْنَ: ’’پروردگار! تو ُنجات دے مجھے اور میرے گھر والوں کو ان کے عمل سے۔‘‘

آیت ۱۷۲ ثُمَّ دَمَّرْنَا الْاٰخَرِیْنَ: ’’پھر ہم نے اُٹھا کر پٹخ دیا باقیوں کو۔‘‘

آیت ۱۷۳ وَاَمْطَرْنَا عَلَیْہِمْ مَّطَرًا فَسَآءَ مَطَرُ الْمُنْذَرِیْنَ: ’’اور ہم نے برسائی ان پر ایک بارش، تو بہت ہی بری تھی وہ بارش جو ان لوگوں پر برسی جنہیں خبردار کر دیا گیا تھا۔‘‘

آیت ۵۴   وَلُوْطًا اِذْ قَالَ لِقَوْمِہٖٓ اَتَاْتُوْنَ الْفَاحِشَۃَ وَاَنْتُمْ تُبْصِرُوْنَ: ’’اور لوطؑ کو بھی (ہم نے بھیجا) جب اُس نے اپنی قوم سے کہا کہ کیا تم فحش کام کرتے ہو اور تم دیکھتے بھی ہو! ‘‘

      اس سے معلوم ہوتا ہے کہ وہ لوگ علی الاعلان اپنی مجالس کے اندر ایسی فحش حرکات کا ارتکاب کرتے تھے۔

آیت ۵۵   اَئِنَّکُمْ لَتَاْتُوْنَ الرِّجَالَ شَہْوَۃً مِّنْ دُوْنِ النِّسَآءِ بَلْ اَنْتُمْ قَوْمٌ تَجْہَلُوْنَ: ’’کیا تم َمردوں کا رخ کرتے ہو شہوت رانی کے لیے عورتوں کو چھوڑ کر! بلکہ تم بڑے ہی جاہل لوگ ہو۔‘‘

آیت ۵۶   فَمَا کَانَ جَوَابَ قَوْمِہٖٓ اِلَّآ اَنْ قَالُوْٓا اَخْرِجُوْٓا اٰلَ لُوْطٍ مِّنْ قَرْیَتِکُمْ اِنَّہُمْ اُنَاسٌ یَّتَطَہَّرُوْنَ: ’’تو اُس ؑکی قوم کا کوئی جواب نہیں تھا مگر یہ کہ انہوں نے کہا: نکال باہر کرو لوط کے گھر والوں کو اپنے شہر سے۔ یہ لوگ بڑے پاکباز بنتے ہیں!‘‘

آیت ۵۷   فَاَنْجَیْنٰہُ وَاَہْلَہٗٓ اِلَّا امْرَاَتَہٗ قَدَّرْنٰہَا مِنَ الْغٰبِرِیْنَ: ’’تو ہم نے نجات دی اُس ؑکو اور اُس ؑکے گھر والوں کو سوائے اس کی بیوی کے، جس کے بارے میں ہم نے طے کر دیا تھا کہ وہ پیچھے رہ جانے والوں میں ہوگی۔‘‘

آیت ۵۸   وَاَمْطَرْنَا عَلَیْہِمْ مَّطَرًا فَسَآءَ مَطَرُ الْمُنْذَرِیْنَ: ’’اور ان کے اوپر ہم نے ایک بارش برسائی، تو بہت ہی ُبری بارش تھی جو اُن لوگوں پر برسائی گئی جن کو خبردار کر دیا گیا تھا۔‘‘

      یہاں پر اس سورت کا انباء الرسل کا حصہ بھی اختتام پذیر ہوا۔ اب اس کے بعد کچھ حصہ التذکیر بآلاء اللہ پر مشتمل ہے اور یہ اس سورت کا بالکل منفرد انداز ہے۔

آیت ۲۸   وَلُوْطًا اِذْ قَالَ لِقَوْمِہٖٓ اِنَّکُمْ لَتَاْتُوْنَ الْفَاحِشَۃَ مَا سَبَقَکُمْ بِہَا مِنْ اَحَدٍ مِّنَ الْعٰلَمِیْنَ: ’’اور (ہم نے بھیجا) لوط کو، جب اُس نے اپنی قوم سے کہا کہ تم لوگ ایسی بے حیائی کا ارتکاب کر رہے ہو جو تم سے پہلے تمام جہان والوں میں سے کسی نے نہیں کی۔‘‘

      حضرت لوط کو عامورہ اور سدوم کے شہروں کی طرف مبعوث کیا گیا تھا۔ ان شہروں کے لوگ آپ کی قوم میں سے نہیں تھے، چنانچہ آیت زیر نظر میں انہیں مجازاً آپ کی قوم (قَوْمِہٖ) کہا گیا ہے۔ اس سلسلے میں اللہ تعالیٰ کا قاعدہ یہی رہا ہے کہ کسی بھی قوم کی طرف رسول ہمیشہ اس قوم کے اندر سے مبعوث کیا جاتا رہا ہے۔ اس قاعدے اور قانون میں حضرت لوط کے حوالے سے یہ واحد استثناء ہے اور یہ استثناء بھی دراصل اللہ تعالیٰ کے اس فیصلے کا حصہ ہے کہ حضرت ابراہیم کے بعد جو کوئی بھی پیغمبر ہو گا وہ آپ کی قوم سے ہی ہو گا۔ یاد رہے کہ حضرت لوط حضرت ابراہیم کے بھتیجے تھے۔ 

آیت ۲۹   اَئِنَّکُمْ لَتَاْتُوْنَ الرِّجَالَ وَتَقْطَعُوْنَ السَّبِیْلَ: ’’کیا تم آتے ہو َمردوں کے پاس (شہوت رانی کے لیے) اور (فطری) راستہ منقطع کرتے ہو‘‘

      یعنی فطرت نے اس مقصد کے لیے مرد اور عورت کے ملاپ کا جو طریقہ رکھا ہے اور اسے اولاد پیدا کرنے کا ذریعہ بنایا ہے، تم اس راہ کو کاٹ رہے ہو۔

      وَتَاْتُوْنَ فِیْ نَادِیْکُمُ الْمُنْکَرَ: ’’اور یہ مذموم فعل تم اپنی مجلسوں کے اندر کرتے ہو!‘‘

      ان کی بے حیائی اور ڈھٹائی کی انتہا یہ تھی کہ وہ اس گھناؤنے فعل کا ارتکاب کھلے عام اپنی مجالس کے اندر کیا کرتے تھے۔

      فَمَا کَانَ جَوَابَ قَوْمِہٖٓ اِلَّآ اَنْ قَالُوا ائْتِنَا بِعَذَابِ اللّٰہِ اِنْ کُنْتَ مِنَ الصّٰدِقِیْنَ: ’’تو اس کی قوم کا کوئی جواب اس کے سوا نہیں تھا کہ انہوں نے کہا : تم لے آؤ ہم پر اللہ کا عذاب اگر تم سچے ہو!‘‘

آیت ۳۰   قَالَ رَبِّ انْصُرْنِیْ عَلَی الْقَوْمِ الْمُفْسِدِیْنَ: ’’اُس نے دعا کی : اے میرے پروردگار! میری مدد فرما اس مفسد قوم کے خلاف۔‘‘ 

آیت ۳۳   وَلَمَّآ اَنْ جَآءَتْ رُسُلُنَا لُوْطًا سِیْٓئَ بِہِمْ وَضَاقَ بِہِمْ ذَرْعًا: ’’اور جب ہمارے فرستادے لوط کے پاس پہنچے تو وہ اُن کی وجہ سے بہت پریشان اور دل تنگ ہوا‘‘

      حضرت لوط کی پریشانی کی اصل وجہ یہ تھی کہ فرشتے خوبصورت لڑکوں کے روپ میں وارد ہوئے تھے اور حضرت لوط اپنی قوم کے اخلاق و کردار سے واقف تھے۔

      وَّقَالُوْا لَا تَخَفْ وَلَا تَحْزَنْ اِنَّا مُنَجُّوْکَ وَاَہْلَکَ: ’’انہوں نے کہا کہ آپ خوف نہ کھائیں اور نہ آپ رنجیدہ ہوں ، ہم تونجات دینے والے ہیں آپ کو بھی اور آپ کے اہل ِخانہ کو بھی‘‘

      اِلَّا امْرَاَتَکَ کَانَتْ مِنَ الْغٰبِرِیْنَ: ’’سوائے آپ کی بیوی کے، وہ ہو گی پیچھے رہ جانے والوں میں سے۔‘‘

آیت۳۴   اِنَّا مُنْزِلُوْنَ عَلٰٓی اَہْلِ ہٰذِہِ الْقَرْیَۃِ رِجْزًا مِّنَ السَّمَآءِ بِمَا کَانُوْا یَفْسُقُوْنَ: ’’ہم نازل کرنے والے ہیں اس بستی والوں پر ایک عذاب آسمان سے، بسبب اس فسق و فجور کے جو وہ کر رہے تھے۔‘‘

آیت ۳۵   وَلَقَدْ تَّرَکْنَا مِنْہَآ اٰیَۃً بَـیِّنَۃً لِّقَوْمٍ یَّعْقِلُوْنَ: ’’اور ہم نے چھوڑ دی اس (بستی) میں سے ایک واضح نشانی ان لوگوں کے لیے جو عقل رکھتے ہیں ۔‘‘

      قومِ لوط کی بستی کے کھنڈرات قریش کی تجارتی شاہراہ پر موجود تھے، لہٰذا قرآن میں اہل مکہ کو بار بار مخاطب کر کے یاد دلایا گیا ہے کہ تم لوگ ان عذاب زدہ بستیوں کے کھنڈرات پر سے گزرتے ہو اور پھر بھی عبرت حاصل نہیں کرتے ہو!اس کے علاوہ بحیرئہ مردار (جسے بحر ِلوط بھی کہا جاتاہے) بھی قومِ لوط کی بربادی کی کھلی نشانی ہے۔

آیت ۱۳۳   وَاِنَّ لُوْطًا لَّمِنَ الْمُرْسَلِیْنَ : ’’اور یقینا لوطؑ بھی رسولوں میں سے تھا۔‘‘ 

آیت ۱۳۴   اِذْ نَجَّیْنٰہُ وَاَہْلَہٗٓ اَجْمَعِیْنَ : ’’جب ہم نے نجات دی اُس کو اور اس کے گھر والوں کو‘ سب کو۔‘‘

        اگرچہ تورات کے مطابق آپؑ صرف اپنی دو بیٹیوں کو اپنے ساتھ لے کر نکلے تھے‘ یعنی ان کے علاوہ اس قوم میں کوئی اور اہل ایمان نہیں تھے‘ لیکن یہاں پر اَہْلَہٗٓ اَجْمَعِیْنَ (سب گھر والوں کو) کے الفاظ سے معلوم ہوتا ہے کہ آپؑ کا گھرانہ خاصا بڑا ہوگا‘ جس میں سے آپؑ کی صرف ایک بیوی پیچھے رہ گئی تھی۔ (واللہ اعلم!) 

آیت ۱۳۵   اِلَّا عَجُوْزًا فِی الْغٰبِرِیْنَ: ’’سوائے ایک بڑھیا کے جو پیچھے رہ جانے والوں میں تھی۔‘‘ 

آیت ۱۳۶   ثُمَّ دَمَّرْنَا الْاٰخَرِیْنَ: ’’پھر ہم نے جڑ سے اکھاڑ کر پٹخ دیا باقیوں کو۔‘‘ 

آیت ۱۳۷‘ ۱۳۸   وَاِنَّکُمْ لَتَمُرُّوْنَ عَلَیْہِمْ مُّصْبِحِیْنَ  وَبِالَّـیْلِ اَفَلَا تَعْقِلُوْنَ: ’’اور تم لوگ گزرتے ہو ان (کے کھنڈرات) پر صبح کے وقت بھی اور رات کو بھی‘ تو کیا تم عقل سے کام نہیں لیتے؟‘‘

        قومِ لوطؑ کی تباہ ہونے والی بستیوں میں سے سدوم اور عامورہ کے شہر معروف تھے۔ حال ہی میں برطانیہ سے تعلق رکھنے والے آرکیالوجی کے کچھ ماہرین کی تحقیق کے نتیجے میں ان شہروں کے کھنڈرات اور آثار بحر ِمردار ُ کے پانی کے نیچے دریافت ہوئے ہیں‘ جس سے تورات اور قرآن میں مذکور تفصیلات کی تصدیق ہو گئی ہے۔ اسی طرح جب اللہ کو منظور ہو گاحضرت نوح  کی کشتی بھی دنیا کی نگاہوں کے سامنے آ جائے گی۔ سورۃ القمر‘ آیت: ۱۵ میں اس حوالے سے اشارہ موجود ہے کہ کسی وقت یہ کشتی ایک بڑی نشانی کے طور پر ظاہر ہو گی۔ ہمارا ایمان ہے کہ وقت گزرنے کے ساتھ ساتھ قرآن کی بیان کردہ تاریخ کے ثبوت ایک ایک کر کے دنیا کے سامنے آتے چلے جائیں گے۔ ان شاء اللہ!

آیت ۱۳۷‘ ۱۳۸   وَاِنَّکُمْ لَتَمُرُّوْنَ عَلَیْہِمْ مُّصْبِحِیْنَ  وَبِالَّـیْلِ اَفَلَا تَعْقِلُوْنَ: ’’اور تم لوگ گزرتے ہو ان (کے کھنڈرات) پر صبح کے وقت بھی اور رات کو بھی‘ تو کیا تم عقل سے کام نہیں لیتے؟‘‘

        قومِ لوطؑ کی تباہ ہونے والی بستیوں میں سے سدوم اور عامورہ کے شہر معروف تھے۔ حال ہی میں برطانیہ سے تعلق رکھنے والے آرکیالوجی کے کچھ ماہرین کی تحقیق کے نتیجے میں ان شہروں کے کھنڈرات اور آثار بحر ِمردار ُ کے پانی کے نیچے دریافت ہوئے ہیں‘ جس سے تورات اور قرآن میں مذکور تفصیلات کی تصدیق ہو گئی ہے۔ اسی طرح جب اللہ کو منظور ہو گاحضرت نوح  کی کشتی بھی دنیا کی نگاہوں کے سامنے آ جائے گی۔ سورۃ القمر‘ آیت۱۵ میں اس حوالے سے اشارہ موجود ہے کہ کسی وقت یہ کشتی ایک بڑی نشانی کے طور پر ظاہر ہو گی۔ ہمارا ایمان ہے کہ وقت گزرنے کے ساتھ ساتھ قرآن کی بیان کردہ تاریخ کے ثبوت ایک ایک کر کے دنیا کے سامنے آتے چلے جائیں گے۔ ان شاء اللہ!

آيت 32:  قَالُوا إِنَّا أُرْسِلْنَا إِلَى قَوْمٍ مُجْرِمِينَ:  «انهوں نے كها: هم بھيجے گئے هيں ايك مجرم قوم كى طرف».

آيت 33:  لِنُرْسِلَ عَلَيْهِمْ حِجَارَةً مِنْ طِينٍ:  «تاكه هم ان پر بارش برسائيں كنكريوں كى».

آيت 34:  مُسَوَّمَةً عِنْدَ رَبِّكَ لِلْمُسْرِفِينَ:  «جو نشان زده هيں آپ كے رب كے پاس حد سے بڑھ جانے والوں كے ليے».

الله تعالى نے هر كنكرى كو ان كے ايك خاص فرد كے ليے مخصوص كر ركھا هے جو اس كے ليے گولى (bullet) كا كام كرے گى.

آيت 35:  فَأَخْرَجْنَا مَنْ كَانَ فِيهَا مِنَ الْمُؤْمِنِينَ:  «پھر هم نے نكال ديا جو بھى اس بستى ميں تھے اهلِ ايمان».

آيت 36:  فَمَا وَجَدْنَا فِيهَا غَيْرَ بَيْتٍ مِنَ الْمُسْلِمِينَ:  «تو نهيں پايا هم نے اس ميں سوائے ايك گھر كے كسى كو مسلمانوں ميں سے».

يعنى حضرت لوط عليه السلام كے ايك گھر كے سوا اس پورى قوم ميں اور كوئى بھى مسلمان نهيں تھا.

آيت 37:  وَتَرَكْنَا فِيهَا آيَةً لِلَّذِينَ يَخَافُونَ الْعَذَابَ الْأَلِيمَ:  «اور هم نے اس ميں ايك نشانى چھوڑ دى ان لوگوں كے ليے جو ڈرتے هوں درد ناك عذاب سے».

قومِ لوط كى بستياں (سدوم اور عاموره) سمندر كے كنارے پر آباد تھيں، جو اب بحيره مردار (dead sea) كهلاتا هے. ان بستيوں كے بارے ميں يهى اندازه تھا كه جب زلزلے سے يه علاقه تلپٹ هوا هو گا تو يه بستياں سمندر ميں غرق هو گئى هوں گى. اب اس كى تصديق بھى هو گئى هے اور بحيره مردار كى تهه ميں ان شهروں كے كھنڈرات كو دريافت بھى كر ليا گيا هے. يهاں نشانى سے مراد يهى كھنڈرات هيں جنهيں الله تعالى نے رهتى دنيا تك لوگوں كى عبرت كے ليے ظاهر فرما ديا هے.

آيت 33:  كَذَّبَتْ قَوْمُ لُوطٍ بِالنُّذُرِ:  «لوط كى قوم نے بھى خبردار كرنے والوں كو جھٹلايا».

آيت 34:  إِنَّا أَرْسَلْنَا عَلَيْهِمْ حَاصِبًا إِلَّا آلَ لُوطٍ نَجَّيْنَاهُمْ بِسَحَرٍ:  «هم ان پر بھيج دى ايك ايسى تيز آندھى جس ميں پتھر تھے، سوائے لوط كے گھر والوں كے. ان كو هم نے نجات دے دى صبح كے وقت».

آيت 35:  نِعْمَةً مِنْ عِنْدِنَا كَذَلِكَ نَجْزِي مَنْ شَكَرَ:  «وه نعمت تھى همارے پاس سے. اسى طرح هم بدله ديتے هيں اس كو جو شكر كرتا هے».

آيت 36:  وَلَقَدْ أَنْذَرَهُمْ بَطْشَتَنَا فَتَمَارَوْا بِالنُّذُرِ:  «اور لوط نے ان كو خبردار كرديا تھا همارى پكڑ سے، ليكن انهوں نے شك كيا ان چيزوں پر جن كے بارے ميں انهيں خبردار كيا گيا تھا».

وه همارى تنبيهات كو مشكوك سمجھ كر باتوں ميں اُڑاتے رهے.

آيت 37:  وَلَقَدْ رَاوَدُوهُ عَنْ ضَيْفِهِ فَطَمَسْنَا أَعْيُنَهُمْ:  «اور انهوں نے اس سے اس كے مهمانوں كو لے جانا چاها تو هم نے ان آنكھوں كو مٹا ديا»

حضرت لوط عليه السلام كى قوم كے بد كردار لوگ ان خوبصورت مهمان لڑكوں كو حاصل كرنا چاهتے تھے جو اصل ميں فرشتے تھے. اس پر الله تعالى نے ان سب كو اندھا كر ديا. بائبل ميں اس كى تفصيل يوں بيان هوئى هے كه ان ميں سے ايك فرشتے نے ان لوگوں كى طرف اپنا هاتھ پھيلايا تو وه سب كے سب اندهے هو گئے.

    فَذُوقُوا عَذَابِي وَنُذُرِ:  «تو مزا چكھو اب ميرے عذاب كا اور ميرے خبردار كرنے كا».

آيت 38:  وَلَقَدْ صَبَّحَهُمْ بُكْرَةً عَذَابٌ مُسْتَقِرٌّ:  «اور ان پر صبح هى صبح آ دھمكا ايك عذاب جوكه ٹههر چكا تھا».

آيت 10: ان آيات ميں عورتوں كا معامله ايك اور پهلو سے زير بحث آرها هے. واضح رهے كه ان سورتوں (الطلاق اور التحريم) كى ايك مشتركه خصوصيت يه بھى هے كه ان دونوں ميں عورتوں كے معاملات بيان هوئے هيں. چناں چه اب عورتوں پر واضح كيا جارها هے كه وه خود كو اپنے شوهروں كے تابع سمجھتے هوئے آخرت كے حساب سے نچنت نه هوجائيں. اسلام ميں عورت اور مرد كا درجه انسان هونے كى حيثيت سے برابر هے. لهذا عورتيں اپنے دين و ايمان اور اعمال و فرائض كى خود ذمه دار هيں. اگر ان كا ايمان درست هوگا اور اعمال صالحه كا پلڑا بھارى هوگا تبھى نجات كى كوئى صورت بنے گى. ان كے شوهر خواه الله كے كتنے هى برگزيده بندے كيوں نه هوں اس معاملے ميں وه ان كے كچھ كام نهيں آسكيں گے. اس حقيقت كو واضح كرنے كے ليے ان آيات ميں چار خواتين كى مثاليں دى گيى هيں:

ضَرَبَ اللَّهُ مَثَلًا لِلَّذِينَ كَفَرُوا امْرَأَتَ نُوحٍ وَامْرَأَتَ لُوطٍ: «الله نے مثال بيان كى هے كافروں كے ليے نوح عليه السلام كى بيوى اور لوط عليه السلام كى بيوى كى.»

كَانَتَا تَحْتَ عَبْدَيْنِ مِنْ عِبَادِنَا صَالِحَيْنِ: «وه دونوں همارے بهت صالح بندوں كے عقد ميں تھيں»

فَخَانَتَاهُمَا فَلَمْ يُغْنِيَا عَنْهُمَا مِنَ اللَّهِ شَيْئًا: «تو انهوں نے ان سے خيانت كى، تو وه دونوں الله كے مقابل ان كے كچھ كام نه آسكے»

وه جليل القدر پيغمبر اپنى بيويوں كو الله كے عذاب سے نه تو دنيا ميں بچا سكے اور نه هى آخرت ميں بچا سكيں گے. حضرت نوح عليه السلام كى بيوى سيلاب ميں غرق هوگئى اور حضرت لوط عليه السلام كى بيوى بھى اپنى قوم كے لوگوں كے ساتھ پتھراؤ كے عذاب ميں هلاك هوئى. واضح رهے كه يهاں جس خيانت كا ذكر هوا هے اس سے مراد كردار كى خيانت نهيں هے، اس ليے كه كسى نبى عليه السلام كى بيوى كبھى بد چلن اور بدكار نهيں رهى هے. ان كى خيانت اور بے وفائى دراصل دين كے معاملے ميں تھى كه وه دونوں اپنے شوهروں كى جاسوسى كرتى تھيں اور ان كے راز اپنى قوم كے لوگوں تك پهنچاتى تھيں. اس ميں كوئى شك نهيں كه ايك شادى شده عورت كى عصمت اس كے شوهر كى عزت و ناموس هے جس كى حفاظت كرنا شوهر كى طرف سے اس پر فرض هے، ليكن اس كے علاوه ايك بيوى اپنے شوهر كے رازوں اور اس كے مال وغيره كى محافظ بھى هوتى هے. سورة النساء كى آيت 34 ميں نيك اور مثالى بيويوں كى جو صفات بيان كى گئى هيں ان ميں ايك صفت حَافِظَاتٌ لِّلْغَيْبِ بھى هے. اس كا مفهوم يهى هے كه نيك بيوياں اپنے شوهروں كى غير حاضرى ميں ان كے گھر بار اور حقوق كى محافظ هوتى هيں. اب ظاهر هے اس حفاظت ميں شوهر كى عزت و ناموس كے ساتھ ساتھ اس كے مال اور اس كے رازوں وغيره كى حفاظت بھى شامل هے. چناں چه يهاں خيانت سے صرف عزت و ناموس هى كى خيانت مراد لينا درست نهيں.

وَقِيلَ ادْخُلَا النَّارَ مَعَ الدَّاخِلِينَ: «اور (آخرت ميں) كه ديا جائے گا كه تم دونوں داخل هوجاؤ آگ ميں دوسرے سب داخل هونے والوں كے ساتھ.»

ان دو عبرت انگيز مثالوں سے يه حقيقت واضح هوجانى چاهيے كه الله تعالى كے وه اولوا العزم پيغمبر جنهوں نے ساڑھے نو سو سال الله تعالى كے پيغام كى دعوت ميں صرف كيے وه اگر اپنى بيوى كو برے انجام سے نهيں بچا سكا تو اور كون هوگا جو الله تعالى كے حضور اپنے كسى عزيز رشتے دار كى سفارش كرسكے گا؟ نبى اكرم صلى الله عليه وسلم نے اپنى دعوت كے آغاز ميں قبيله قريش بالخصوص اپنے قريبى عزيز و اقارب كو جمع كركے فرمايا تھا:

«يَا مَعْشَرَ قُرَيْشٍ اشْتَرُوا أَنْفُسَكُمْ، لاَ أُغْنِي عَنْكُمْ مِنَ اللَّهِ شَيْئًا، يَا بَنِي عَبْدِ مَنَافٍ لاَ أُغْنِي عَنْكُمْ مِنَ اللَّهِ شَيْئًا، يَا عَبَّاسُ بْنَ عَبْدِ المُطَّلِبِ لاَ أُغْنِي عَنْكَ مِنَ اللَّهِ شَيْئًا، وَيَا صَفِيَّةُ عَمَّةَ رَسُولِ اللَّهِ لاَ أُغْنِي عَنْكِ مِنَ اللَّهِ شَيْئًا، وَيَا فَاطِمَةُ بِنْتَ مُحَمَّدٍ سَلِينِي مَا شِئْتِ مِنْ مَالِي لاَ أُغْنِي عَنْكِ مِنَ اللَّهِ شَيْئًا»

«اے قريش كے لوگو! اپنے آپ كو الله (كى گرفت) سے بچانے كى كوشش كرو، ميں الله كے مقابلے ميں تمهارے كچھ بھى كام نه آسكوں گا. اے بنى عبد المطلب! ميں الله كے مقابلے ميں تمهارے كچھ بھى كام نه آسكوں گا. اے عباس بن عبد المطلب! ميں الله كے مقابلے ميں تمهارے كچھ بھى كام نه آسكوں گا. اے صفيه، الله كے رسول كى پھوپھى! ميں الله كے مقابله ميں تمهارے كچھ بھى كام نه آسكوں گا. اے فاطمه، الله كے رسول كى بيٹى! تم مجھ سے (ميرے مال ميں سے) جو چاهو طلب كرلو، ليكن ميں الله كے مقابله ميں تمهارے كچھ بھى كام نه آسكوں گا.»

        ايك روايت ميں يه الفاظ بھى آئے هيں:

«يَا فَاطِمَةُ، أَنْقِذِي نَفْسَكِ مِنَ النَّارِ، فَإِنِّي لَا أَمْلِكُ لَكُمْ مِنَ اللهِ شَيْئًا»

«اے محمد (صلى الله عليه وسلم) كى لخت جگر فاطمه رضى الله عنها! اپنے آپ كو آگ سے بچاؤ، كيوں كه مجھے تمهارے بارے ميں الله كے هاں كوئى اختيار نهيں هوگا.»