مهر كا بيان

 آیت 236:    لاَ جُنَاحَ عَلَیْکُمْ اِنْ طَلَّقْتُمُ النِّسَآءَ مَا لَمْ تَمَسُّوْہُنُّ اَوْ تَفْرِضُوْا لَہُنَّ فَرِیْضَۃً :   «تم پر کوئی گناہ نہیں ہے اگر تم ایسی بیویوں کو طلاق دے دو جن کو نہ تو تم نے ابھی چھوا ہو اور نہ ان کے لیے مہر مقرر کیا ہو۔ »

            اگر کوئی شخص اپنی منکوحہ کو اس حال میں طلاق دینا چاہے کہ نہ تو اس کے ساتھ خلوتِ صحیحہ کی نوبت آئی ہو اور نہ ہی اس کے لیے مہر مقرر کیا گیا ہو تو وہ دے سکتا ہے۔  

             وَّمَتِّعُوْہُنَّ :   «اور ان کو کچھ خرچ دو۔ »

            اس صورت میں اگرچہ مہر کی ادائیگی لازم نہیں ہے ‘ لیکن مرد کو چاہیے کہ وہ اسے کچھ نہ کچھ مال و متاعِ دُنیوی کپڑے وغیرہ دے دلا کر فارغ کرے۔

             عَلَی الْمُوْسِعِ قَدَرُہ وَعَلَی الْمُقْتِرِ قَدَرُہ :   «صاحب ِوسعت پر اپنی حیثیت کے مطابق ضروری ہے اور تنگ دست پر اپنی حیثیت کے مطابق۔ »

            جو وسعت والا ہے‘ غنی ہے‘ جس کو کشائش حاصل ہے وہ اپنی حیثیت کے مطابق ادا کرے اور جو تنگ دست ہے وہ اپنی حیثیت کے مطابق ۔

             مَتَاعًا بِالْمَعْرُوْفِ :   «جو خرچ کہ قاعدہ کے موافق ہے۔ »

            یہ ساز و سامانِ دنیا جو ہے یہ بھی بھلے انداز میں دیا جائے‘ ایسا نہ ہو کہ جیسے خیرات دی جا رہی ہو۔  

             حَقًّا عَلَی الْمُحْسِنِیْنَ :   «یہ حق ہے محسنین پر۔ »

            نیکی کرنے والے‘ بھلے لوگ یہ سمجھ لیں کہ یہ ان پر اللہ تعالیٰ کی طرف سے عائد کردہ ایک ذمہ داری ّہے۔  

  آیت 237:    وَاِنْ طَلَّقْتُمُوْہُنَّ مِنْ قَبْلِ اَنْ تَمَسُّوْہُنَّ وَقَدْ فَرَضْتُمْ لَہُنَّ فَرِیْضَۃً :   «اور اگر تم عورتوں کو طلاق دو ان کو ہاتھ لگانے سے پہلے اور تم ٹھہرا چکے تھے ان کے لیے ایک متعین ّمہر»

             فَنِصْفُ مَا فَرَضْتُمْ :   «تو جو مہر تم نے طے کیا تھا اب اُس کا آدھا ادا کرنا لازم ہے»

            اس صورت میں مقرر شدہ مہر کا آدھا تو تمہیں دینا ہی دینا ہے۔

             اِلَّآ اَنْ یَّعْفُوْنَ :   «اِلایہ کہ وہ معاف کر دیں»   

            یعنی کوئی عورت خود کہے کہ مجھے آدھا بھی نہیں چاہیے یا کوئی کہے کہ مجھے چوتھائی دے دیجیے۔

             اَوْ یَعْفُوَا الَّذِیْ بِیَدِہ عُقْدَۃُ النِّکَاحِ :   «یا وہ شخص درگزر سے کام لے جس کے ہاتھ میں نکاح کی گرہ ہے۔ »

            اور یہ گرہ مرد کے ہاتھ میں ہے‘ وہ اسے کھول سکتا ہے۔  عورت از خود طلاق دے نہیں سکتی۔  لہٰذا َمردوں کے لیے ترغیب ہے کہ وہ اس معاملے میں فراخ دلی سے کام لیں۔

             وَاَنْ تَعْفُوْآ اَقْرَبُ لِلتَّقْوٰی :  «اور یہ کہ تم مرد درگزر کرو تو یہ تقویٰ سے قریب تر ہے۔ »

             وَلاَ تَنْسَوُا الْفَضْلَ بَیْنَـکُمْ :   «اور اپنے مابین احسان کرنا مت بھلا دو۔ »

            اس کا ترجمہ یوں بھی کیا گیا ہے : «اور تمہارے درمیان ایک کو دوسرے پر جو فضیلت ہے اس کو مت بھولو»۔ یعنی اللہ نے جو فضیلت تم َمردوں کو عورتوں پر دی ہے اس کو مت بھولو۔  چنانچہ تمہارا طرزِ عمل بھی ایسا ہوناچاہیے کہ تم اپنے بڑے ہونے کے حساب سے ان کے ساتھ نرمی کرو اور ان کو زیادہ دو۔  تم نے ان کا جتنا بھی مہر مقرر کیا تھا وہ نصف کے بجائے پورا دے دو اور انہیں معروف طریقے سے عزت و تکریم کے ساتھ رخصت کرو۔

             اِنَّ اللّٰہَ بِمَا تَعْمَلُوْنَ بَصِیْرٌ :   «یقینا جو کچھ تم کر رہے ہو اللہ اسے دیکھ رہا ہے۔ »

 آیت 24:    وَّالْمُحْصَنٰتُ مِنَ النِّسَآءِ: ’’اور وہ عورتیں (بھی تم پر حرام ہیں) جو کسی اور کے نکاح میں ہوں‘‘

            چونکہ وہ کسی اور کے نکاح میں ہیں اس لیے آپ پر حرام ہیں۔ ایک عورت کو اگر اس کا شوہر طلاق دے دے تو آپ اس سے نکاح کر سکتے ہیں۔ چنانچہ یہ حرمت ابدی نوعیت کی نہیں ہے۔ ’’مُحْصَنٰت‘‘ اُن عورتوں کو کہا جاتا ہے جو کسی کی قید نکاح میں ہوں۔ ’’حِصن‘‘ قلعے کو کہتے ہیں اور ’’اِحصان‘‘ کے معنی کسی شے کو اپنی حفاظت میں لینے کے بھی اور کسی کی حفاظت میں ہونے کے بھی ۔ چنانچہ ’’مُحْصَنٰت‘‘ وہ عورتیں ہیں جو ایک خاندان کے قلعے کے اندر محفوظ ہیں اور شوہر والیاں ہیں۔ نیز یہ لفظ لونڈیوں کے مقابل آزاد خاندانی شریف زادیوں کے لیے بھی استعمال ہوتا ہے۔

             اِلاَّ مَا مَلَـکَتْ اَیْمَانُکُمْ:’’سوائے اس کے کہ جو تمہاری مِلکِ یمین بن جائیں۔‘‘

            یعنی جنگ کے نتیجے میں تمہارے ہاں کنیزیں بن کر آ جائیں۔ یہ عورتیں اگرچہ مشرکوں کی بیویاں ہیں لیکن وہ لونڈیوں کی حیثیت سے آپ کے لیے جائز ہوں گی۔

             کِتٰبَ اللّٰہِ عَلَـیْـکُمْ: ’’یہ تم پر اللہ کا لکھا ہوا فریضہ ہے۔‘‘

            یہ اللہ کا قانون ہے جس کی پابندی تم پر لازم کر دی گئی ہے۔

             وَاُحِلَّ لَـکُمْ مَّا وَرَآء ذٰلِکُمْ: ’’ان کے سوا جو عورتیں ہیں وہ تمہارے لیے حلال ہیں‘‘

            آپ نے دیکھا کہ کتنی تھوڑی سی تعداد میں محرمات ہیں‘ جن سے نکاح حرام قرار دے دیا گیا ہے‘ باقی کثیر تعداد حلال ہے۔ یعنی مباحات کا دائرہ بہت وسیع ہے جبکہ محرمات کا دائرہ بہت محدود ہے۔

             اَنْ تَـبْـتَغُوْا بِاَمْوَالِکُمْ: ’’کہ تم اپنے مال کے ذریعے ان کے طالب بنو‘‘

            یعنی ان کے مہر ادا کر کے ان کے ساتھ نکاح کرو۔

             مُّحْصِنِیْنَ غَیْرَ مُسٰفِحِیْنَ: ’’بشرطیکہ حصارِ نکاح میں ان کو محفوظ کرو‘ نہ یہ کہ آزاد شہوت رانی کرنے لگو۔‘‘

            یعنی نیت گھر بسانے کی ہو‘ صرف مستی نکالنے کی نہیں۔ اس کو محض ایک کھیل اور مشغلہ نہ بنا لو۔

             فَمَا اسْتَمْتَعْتُمْ بِہ مِنْہُنَّ فَاٰتُوْہُنَّ اُجُوْرَہُنَّ فَرِیْضَۃً: ’’پس جو بھی تم نے ان سے تمتع کیا ہو تو اس کے بدلے ان کے مہر ادا کرو‘  جو مقرر ہوئے تھے۔‘‘

             وَلاَ جُنَاحَ عَلَـیْکُمْ فِیْمَا تَرٰضَیْتُمْ بِہ مِنْ بَعْدِ الْفَرِیْضَۃِ: ’’البتہ اس کا تم پر کوئی گناہ نہیں ہے کہ مہر مقرر ہونے کے بعد باہمی رضامندی سے کوئی کمی بیشی کرلو۔‘‘

              اِنَّ اللّٰہَ کَانَ عَلِیْمًا حَکِیْمًا: ’’یقینا اللہ تعالیٰ علیم اور حکیم ہے۔‘‘ 

آیت ۲۷   قَالَ اِنِّیْٓ اُرِیْدُ اَنْ اُنْکِحَکَ اِحْدَی ابْنَتَیَّ ہٰتَیْنِ: ’’اُس نے (موسیٰ سے) کہا کہ میں چاہتا ہوں کہ اپنی ان دونوں بیٹیوں میں سے ایک کا نکاح تمہارے ساتھ کر دوں۔‘‘

      چنانچہ شیخ مدین اپنی بیٹی کے مشورے کی روشنی میں جو ارادہ کر چکے تھے اس بارے میں انہوں نے حضرت موسیٰ کو اعتماد میں لینا چاہا کہ وہ اپنی ایک بیٹی ان کے نکاح میں دینا چاہتے ہیں۔

      عَلٰٓی اَنْ تَاْجُرَنِیْ ثَمٰنِیَ حِجَجٍ:’’اس شرط پر کہ تم آٹھ سال تک میری ملازمت کرو۔ ‘‘

      ممکن ہے اس وقت اس علاقے میں نکاح کے بدلے لڑکے سے معاوضہ لینے کا رواج ہو۔ بہر حال شیخ مدین نے حضرت موسیٰ سے کہا کہ اگر وہ آٹھ سال تک ان کی خدمت کریں، ان کی بھیڑ بکریاں چرائیں اور گھر کے دوسرے کام کاج کریں تو اس کے بدلے میں وہ اپنی ایک بیٹی ان کے نکاح میں دے دیں گے۔

      فَاِنْ اَتْمَمْتَ عَشْرًا فَمِنْ عِنْدِکَ:’’پھر اگر تم دس سال پورے کر دو تو یہ تمہاری طرف سے ہے۔‘‘

      یعنی اگر تم آٹھ سال کے بجائے دس سال پورے کر دو یہ تمہاری طرف سے ایک طرح کا احسان ہو گا۔

      وَمَآ اُرِیْدُ اَنْ اَشُقَّ عَلَیْکَ:’’اور میں تمہیں مشقت میں ڈالنے کا کوئی ارادہ نہیں رکھتا۔ ‘‘

      یعنی تمہیں اطمینان ہونا چاہیے کہ اس دوران میری طرف سے تم پر کوئی بے جا سختی نہیں کی جائے گی اور بہت بھاری کام کے باعث کسی بے جا مشقت میں نہیں ڈالا جائے گا۔

      سَتَجِدُنِیْٓ اِنْ شَآءَ اللّٰہُ مِنَ الصّٰلِحِیْنَ:’’ان شاء اللہ تم مجھے نیک آدمی پاؤ گے۔ ‘‘

      معاملات کے سلسلے میں ان شاء اللہ تم مجھے ایک راست باز اور کھرا آدمی پاؤ گے۔

آیت ۲۸   قَالَ ذٰلِکَ بَیْنِیْ وَبَیْنَکَ: ’’موسیٰ نے کہا: (ٹھیک ہے) یہ بات میرے اور آپ کے درمیان طے ہو گئی۔ ‘‘

      اَیَّمَا الْاَجَلَیْنِ قَضَیْتُ فَلَا عُدْوَانَ عَلَیَّ:’’ ان دونوں میں سے جو مدت بھی میں پوری کردوں تو مجھ پر کوئی زیادتی نہ ہو۔ ‘‘

      یعنی آپ کا مطالبہ مجھ سے آٹھ سال کا ہی ہو گا۔ اگر میں دس سال پورے کر دوں تو یہ میرا اختیار ہو گا، آپ مجھے اس پر مجبور نہیں کریں گے۔

      وَاللّٰہُ عَلٰی مَا نَقُوْلُ وَکِیْلٌ:’’اور جو کچھ (اس وقت) ہم کہہ رہے ہیں ، اللہ اس پر وکیل ہے۔ ‘‘

      یعنی ہمارے اس قول و قرار اور معاہدے کا گواہ اور ضامن اللہ تعالیٰ ہے۔

آیت ۵۰     یٰٓــاَیُّہَا النَّبِیُّ اِنَّآ اَحْلَلْنَا لَکَ اَزْوَاجَکَ الّٰتِیْٓ اٰتَیْتَ اُجُوْرَہُنَّ: ’’اے نبی !ہم نے آپ کے لیے حلال ٹھہرایا ہے آپ کی ان تمام ازواج کو جن کے مہر آپ نے ادا کیے ہیں‘‘

        وَمَا مَلَکَتْ یَمِیْنُکَ مِمَّآ اَفَآءَ اللّٰہُ عَلَیْکَ:’’اور (ان کو بھی) جو آپؐ کی ملک یمین (باندیاں) ہیں، ان سے جو اللہ نے آپؐ کو بطورِ ’فے، عطا کیں‘‘

        جیسے مصر کے فرمانروا مقوقس نے حضرت ماریہ قبطیہk کو آپؐ کی خدمت میں بطور ہدیہ بھیجا تھا۔

        وَبَنٰتِ عَمِّکَ وَبَنٰتِ عَمّٰتِکَ وَبَنٰتِ خَالِکَ وَبَنٰتِ خٰلٰتِکَ: ’’(اسی طرح آپؐ کو نکاح کرنا جائز ہے) اپنے چچا کی بیٹیوں سے اور اپنی پھوپھیوں کی بیٹیوں سے، اور اپنی ماموؤں کی بیٹیوں اور اپنی خالاؤں کی بیٹیوں سے‘‘

        الّٰتِیْ ہَاجَرْنَ مَعَکَ: ’’جنہوں نے آپؐ کے ساتھ ہجرت کی۔‘‘

        وَامْرَاَۃً مُّؤْمِنَۃً اِنْ وَّہَبَتْ نَفْسَہَا لِلنَّبِیِّ: ’’اور وہ مؤمن عورت بھی جو ہبہ کرے اپنا آپ نبیؐ کے لیے‘‘

        اِنْ اَرَادَ النَّبِیُّ اَنْ یَّسْتَنْکِحَہَا: ’’اگر نبیؐ اسے اپنے نکاح میں لانا چاہیں۔‘‘

        یعنی وہ مسلمان خاتون جو مہر کا تقاضا کیے بغیر خود کو آپؐ کی زوجیت کے لیے پیش کرے اور آپؐ اسے قبول فرمائیں۔

        خَالِصَۃً لَّکَ مِنْ دُوْنِ الْمُؤْمِنِیْنَ: ’’یہ (رعایت) خالص آپؐ کے لیے ہے، مؤمنین سے علیحدہ۔‘‘

        اس سلسلے میں نبی مکرم  کوعام قانون سے مستثنیٰ قرار دیا جا رہا ہے۔

        قَدْ عَلِمْنَا مَا فَرَضْنَا عَلَیْہِمْ فِیْٓ اَزْوَاجِہِمْ وَمَا مَلَکَتْ اَیْمَانُہُمْ : ’’ہمیں خوب معلوم ہے جو ہم نے ان (عام مسلمانوں) پر ان کی بیویوں اور ان کی باندیوں کے ضمن میں فرض کیا ہے‘‘

        ایک عام مسلمان ایک وقت میں چار سے زیادہ بیویاں اپنے نکاح میں نہیں رکھ سکتا۔ اسی طرح باندیوں کے بارے میں بھی ان پر طے شدہ قواعد و ضوابط کی پابندی لازم ہے۔

        لِکَیْلَا یَکُوْنَ عَلَیْکَ حَرَجٌ وَکَانَ اللّٰہُ غَفُوْرًا رَّحِیْمًا: ’’تا کہ آپؐ پر کوئی تنگی نہ رہے۔ اور اللہ بہت بخشنے والا، نہایت رحم کرنے والا ہے۔‘‘

        اس موضوع کے حوالے سے ایک اہم نکتہ یہ بھی مد نظر رہنا چاہیے کہ حضور  کے متعدد نکاح کرنے میں بہت سی حکمتوں اور مصلحتوں کا عمل دخل تھا۔ مثلاً حضرت عائشہ اٹھارہ سال کی عمر میں بیوہ ہو گئیں اور اس کے بعد آپؓ ایک طویل مدت تک خواتین اُِمت کے لیے ایک معلمہ کا کردار ادا کرتی رہیں۔ اسی طرح حضور نے بہت سے ایسے نکاح بھی کیے جن کی وجہ سے متعلقہ قبائل کے ساتھ مسلمانوں کے تعلقات مضبوط بنیادوں پر استوار ہوئے اور اس طرح اسلامی حکومت او رریاست کو تقویت ملی۔ یہ مصلحتیں اس بات کی متقاضی تھیں کہ حضور  کے لیے نکاح کے معاملے میں کوئی تنگی باقی نہ رکھی جائے، تاکہ جو عظیم کام آپؐ کے سپرد کیا گیا تھا اس کی ضروریات کے لحاظ سے آپ جتنے نکاح کرنا چاہیں کر لیں۔