مياں بيوى كے حقوق اور باهمي حسن معاشرت

آیت 187:     اُحِلَّ لَـکُمْ لَـیْلَۃَ الصِّیَامِ الرَّفَثُ اِلٰی نِسَآءِکُمْ:   حلال کر دیا گیا ہے تمہارے لیے روزے کی راتوں میں بے حجاب ہونا اپنی بیویوں سے۔   

            احکامِ روزہ سے متعلق یہ آیت بڑی طویل ہے۔  یہود کے ہاں شریعت ِموسوی میں روزہ شام کو ہی شروع ہو جاتا تھا اور رات بھی روزے میں شامل تھی۔  چنانچہ تعلق ِزن و شوهر بھی قائم نہیں ہو سکتا تھا۔  ان کے ہاں سحری وغیرہ کا بھی کوئی تصور نہیں تھا۔  جیسے ہی رات کو سوتے روزہ شروع ہو جاتا اور اگلے دن غروبِ آفتاب تک روزہ رہتا۔ ہمارے ہاں روزے میں نرمی کی گئی ہے۔  ایک تو یہ کہ رات کو روزے سے خارج کر دیا گیا۔  روزہ بس دن کا ہے اور رات کے وقت روزے کی ساری پابندیاں ختم ہو جاتی ہیں۔  چنانچہ رات کو تعلق زن و شوهر بھی قائم کیا جا سکتا ہے اور کھانے پینے کی بھی اجازت ہے۔  لیکن بعض مسلمان یہ سمجھ رہے تھے کہ شاید ہمارے ہاں بھی روزے کے وہی احکام ہیں جو یہود کے ہاں ہیں۔  اس لیے ایسا بھی ہوتا تھا کہ روزوں کی راتوں میں بعض لوگ جذبات میں بیویوں سے مقاربت کر لیتے تھے،  لیکن دل میں سمجھتے تھے کہ شاید ہم نے غلط کام کیا ہے۔  یہاں اب ان کو اطمینان دلایا جا رہا ہے کہ تمہارے لیے روزے کی راتوں میں اپنی بیویوں کے پاس جانا حلال کر دیا گیا ہے۔  

             ہُنَّ لِبَاسٌ لَّــکُمْ وَاَنْتُمْ لِبَاسٌ لَّـہُنَّ:   وہ پوشاک ہیں تمہارے لیے اور تم پوشاک ہو اُن کے لیے۔   

            یہ بڑا لطیف کنایہ ہے کہ وہ تمہارے لیے بمنزلہ ٔلباس ہیں اور تم ان کے لیے بمنزلۂ لباس ہو۔  جیسے لباس میں اور جسم میں کوئی پردہ نہیں ایسے ہی بیوی میں اور شوہر میں کوئی پردہ نہیں ہے۔  خود لباس ہی تو پردہ ہے۔ ویسے بھی مرد کے اخلاق کی حفاظت کرنے والی بیوی ہے اور بیوی کے اخلاق کی حفاظت کرنے والا مرد ہے۔  مجھے اقبال کا شعر یاد آ گیا:

نے پردہ نہ تعلیم ،  نئی ہو کہ پرانی 

نسوانیت ِ زن کا نگہباں ہے فقط  مرد

بہرحال مرد و عورت ایک دوسرے کے لیے ایک ضرورت بھی ہیں اور ایک دوسرے کی پردہ پوشی بھی کرتے ہیں۔

             عَلِمَ اللّٰہُ اَنَّـکُمْ کُنْتُمْ تَخْتَانُوْنَ اَنْفُسَکُمْ:   اللہ کے علم میں ہے کہ تم اپنے آپ کے ساتھ خیانت کر رہے تھے ،

            تم ایک کام کر رہے تھے جو گناہ نہیں ہے ، لیکن تم سمجھتے تھے کہ گناہ ہے ،  پھر بھی اس کا ارتکاب کر رہے تھے۔  اس طرح تم اپنے آپ سے خیانت کے مرتکب ہو رہے تھے۔  

             فَتَابَ عَلَیْکُمْ:   تو اللہ نے تم پر نظر ِرحمت فرمائی،  

             وَعَفَا عَنْکُمْ:   اور تمہیں معاف کر دیا۔   

            اس سلسلے میں جو بھی خطائیں ہو گئی ہیں وہ سب کی سب معاف سمجھو۔

             فَالْئٰنَ بَاشِرُوْہُنَّ:   تو اب تم ان کے ساتھ تعلق زن و شو قائم کرو،  

             وَابْتَغُوْا مَا کَتَبَ اللّٰہُ لَـکُمْ:   اور تلاش کرو اس کو جو کچھ اللہ تعالیٰ نے تمہارے لیے لکھ دیا ہے۔   

            یعنی اولاد ،  جو تعلق زن و شو کا اصل مقصد ہے۔  دوسرے یہ کہ اللہ تعالیٰ نے اس تعلق زن و شو کو سکون و راحت کا ذریعہ بنایا ہے۔  جیسے قرآن مجید میں « لِتَسْکُنُوْا اِلَـیْھَا » کے الفاظ آئے ہیں۔ اس تعلق کے بعد اعصاب کے تناؤ میں ایک سکون کی کیفیت پیدا ہو جاتی ہے۔  اور اس میں یہی حکمت ہے کہ رسول اللہ  اپنے ہر سفر میں ایک زوجہ ٔمحترمہ کو ضرور ساتھ رکھتے تھے۔  اس لیے کہ قائد اور سپہ سالار کو کسی وقت کسی ایسی پریشان کن صورت حال میں فیصلے کرنے پڑتے ہیں کہ جذبات پر اور اعصاب پر دباؤ ہوتا ہے۔

             وَکُلُوْا وَاشْرَبُوْا حَتّٰی یَتَـبَـیَّنَ لَـکُمُ الْخَیْطُ الْاَبْیَضُ مِنَ الْخَیْطِ الْاَسْوَدِ مِنَ الْفَجْرِ:   اور کھاؤ پیو یہاں تک کہ واضح ہو جائے تمہارے لیے فجر کی سفید دھاری (رات کی) سیاہ دھاری سے۔   

            یہ پو پھٹنے کے لیے استعارہ ہے۔  یعنی جب سپیدئہ سحر نمایاں ہوتا ہے،  صبح صادق ہوتی ہے اُس وقت تک کھانے پینے کی چھوٹ ہے۔  بلکہ یہاں  « وَکُلُوْا وَاشْرَبُوْا »  اور کھاؤ اور پیو  امر کے صیغے آئے ہیں۔ سحری کرنے کی حدیث میں بھی تاکید آئی ہے اور رسول اللہ  نے یہ بھی فرمایا ہے کہ ہمارے اور یہود کے روزے کے مابین سحری کا فرق ہے۔  ایک حدیث میں آیا ہے: ((تَسَحَّرُوْا فَاِنَّ فِی السَّحُوْرِ بَرَکَۃً))   « سحری ضرور کیا کرو،  اس لیے کہ سحری میں برکت ہے »۔   

             ثُمَّ اَتِمُّوا الصِّیَامَ اِلَی الَّـیْلِ:   پھر رات تک روزے کو پورا کرو۔   

             رات تک سے اکثر فقہاء کے نزدیک غروبِ آفتاب مراد ہے۔  اہلِ تشیع اس سے ذرا آگے جاتے ہیں کہ غروبِ آفتاب پر چند منٹ مزید گزر جائیں۔  

             وَلاَ تُبَاشِرُوْہُنَّ وَاَنْتُمْ عٰـکِفُوْنَ فِی الْْمَسٰجِدِ:   اور ان سے مباشرت مت کرو جبکہ تم مسجدوں میں حالت ِاعتکاف میں ہو۔   

            یہ رعایت جو تمہیں دی جا رہی ہے اس میں ایک استثناء ہے کہ جب تم مسجدوں میں معتکف ہو تو پھر اپنی بیویوں سے رات کے دوران بھی کوئی تعلق قائم نہ کرو۔  

             تِلْکَ حُدُوْدُ اللّٰہِ فَلاَ تَقْرَبُوْہَا:   یہ اللہ کی (مقرر کی ہوئی ) حدود ہیں،  پس ان کے قریب بھی مت جاؤ۔   

            بعض مقامات پر آتا ہے:  تِلْکَ حُدُوْدُ اللّٰہِ فَلاَ تَعْتَدُوْہَا.   «یہ اللہ کی مقرر کردہ حدود ہیں،  پس ان سے تجاوز نہ کرو، ان کو عبور نہ کرو»۔ اصلاً حرام تو وہی شے ہو گی کہ حدود سے تجاوز کیا جائے ۔ لیکن بہرحال احتیاط اس میں ہے کہ ان حدود سے دور رہا جائے (to keep at a safe distance) آخری حد تک چلے جاؤ گے تو اندیشہ ہے کہ کہیں اس حد کو عبور نہ کر جاؤ۔  

             کَذٰلِکَ یُبَـیِّنُ اللّٰہُ اٰیٰتِہ لِلنَّاسِ:   اسی طرح اللہ واضح کرتا ہے اپنی نشانیاں لوگوں کے لیے  

             لَعَلَّہُمْ یَتَّقُوْنَ:  تاکہ وہ تقویٰ کی روش اختیار کر سکیں۔   

            اب اس رکوع کی آخری آیت میں بتایا جا رہا ہے کہ تقویٰ کا معیار اور اس کی کسوٹی کیا ہے۔  روزہ اس لیے فرض کیا گیا ہے اور یہ سارے احکام تمہیں اسی لیے دیے جا رہے ہیں تاکہ تم میں تقویٰ پیدا ہو جائے،   اور تقویٰ کا لٹمس ٹیسٹ ہے اکل ِحلال ۔  اگر یہ نہیں ہے تو کوئی نیکی نیکی نہیں ہے۔

 آیت 223:    نِسَآؤُکُمْ حَرْثٌ لَّــکُمْ :  «تمہاری بیویاں تمہارے لیے بمنزلہ کھیتی ہیں۔ »

       جیسے کھیت میں بیج بوتے ہو‘ پھر فصل کاٹتے ہو‘ اسی طرح بیویوں کے ذریعے سے اللہ تعالیٰ تمہیں اولاد عطا کرتا ہے۔

       فَاْتُوْا حَرْثَــکُمْ اَنّٰی شِئْتُمْ  :   «تو اپنی کھیتی میں جس طرح چاہو آؤ۔ »

       تم اپنی کھیتی میں جدھر سے چاہو آؤ‘ تمہارے لیے کوئی رکاوٹ نہیں ہے‘ آگے سے یا داہنی طرف سے یا بائیں طرف سے‘ جدھر سے بھی چاہو‘ مگر یہ ضرور ہے کہ تخم ریزی اسی خاص جگہ میں ہو جہاں سے پیداوار کی امید ہو سکتی ہے۔

       وَقَدِّمُوْا لِاَنْفُسِکُمْ :   «اور اپنے آگے کے لیے سامان کرو۔ »

      یعنی اپنے مستقبل کی فکر کرو اور اپنی نسل کو آگے بڑھانے کی کوشش کرو۔  اولاد انسان کا اثاثہ ہوتی ہے اور بڑھاپے میں اس کا سہارا بنتی ہے۔  آج تو الٹی گنگا بہائی جارہی ہے اور اولاد کم سے کم پیدا کرنے کی ترغیب دی جا رہی ہے‘ جبکہ ایک زمانے میں اولاد عصائے پیری شمار ہوتی تھی۔  

      وَاتَّقُوا اللّٰہَ وَاعْلَمُوْٓا اَنَّــکُمْ مُّلٰقُوْہُ :   «اور اللہ کا تقویٰ اختیار کرو اور جان لو کہ تمہیں اس سے مل کر رہنا ہے۔ »

      نوٹ کیجیے کہ قرآن حکیم میں شریعت کے ہر حکم کے ساتھ تقویٰ کا ذکر بار بار آ رہا ہے۔  اس لیے کہ کسی قانون کی لاکھ پیروی کی جا رہی ہو مگر تقویٰ نہ ہو تو وہ قانون مذاق بن جائے گا‘ کھیل تماشا بن جائے گا۔  اس کی بعض مثالیں ابھی آئیں گی۔  

     وَبَشِّرِ الْمُؤْمِنِیْنَ :  «اور (اے نبی !) اہل ایمان کو بشارت دے دیجیے۔ »

 آیت 229:    اَلطَّلاَقُ مَرَّتٰنِ :   «طلاق دو مرتبہ ہے۔ »

     یعنی ایک شوہر کو دو مرتبہ طلاق دے کر رجوع کر لینے کا حق ہے ۔  ایک دفعہ طلاق دی اور عدت کے اندر اندر رجوع کر لیا تو ٹھیک ہے۔  پھر طلاق دے دی اور عدت کے اندر اندر رجوع کر لیا تو بھی ٹھیک ہے ۔  تیسری مرتبہ طلاق دے دی تو اب وہ رجوع نہیں کر سکتا۔  

      فَاِمْسَاکٌ بِمَعْرُوْفٍ اَوْ تَسْرِیْحٌ بِاِحْسَانٍ :   «پھر یا تو معروف طریقے سے روک لینا ہے یا پھر خوبصورتی کے ساتھ رخصت کر دینا ہے۔ »

    یعنی دو مرتبہ طلاق دینے کے بعد اب فیصلہ کرو۔  یا تو اپنی بیوی کو نیکی اور بھلائی کے ساتھ گھر میں روک لو‘ تنگ کرنے اور پریشان کرنے کے لیے نہیں ‘یا پھر بھلے طریقے سے‘ بھلے مانسوں کی طرح اسے رخصت کر دو۔  

      وَلاَ یَحِلُّ لَـکُمْ اَنْ تَاْخُذُوْا مِمَّــآ اٰتَیْتُمُوْہُنَّ شَیْئًا :   «اور تمہارے لیے یہ جائز نہیں ہے کہ جو کچھ تم نے انہیں دیا تھا اس میں سے کچھ بھی واپس لو»

      جب تم طلاق دے رہے ہو تو تم نے انہیں جو مہر دیا تھا اس میں سے کچھ واپس نہیں لے سکتے۔  ہاں اگر عورت خود طلاق مانگے تو اسے اپنے مہر میں سے کچھ چھوڑنا پڑ سکتا ہے۔  لیکن جب مرد طلاق دے رہا ہو تو وہ اس میں سے کچھ بھی واپس نہیں لے سکتا جو وہ اپنی بیوی کو دے چکا ہے۔  سورۃ النساء (آیت: ۲۰) میں یہاں تک الفاظ آئے ہیں کہ اگرچہ تم نے سونے کا ڈھیر (قِنطَار) دے دیا ہو پھر بھی اس میں سے کچھ واپس نہ لو۔

       اِلَّآ اَنْ یَّخَافَـآ اَلاَّ یُـقِیْمَا حُدُوْدَ اللّٰہِ :   «سوائے اس کے کہ دونوں کو اندیشہ ہو کہ وہ حدود اللہ کو قائم نہیں رکھ سکیں گے۔ »

     مراد یہ ہے کہ اللہ تعالیٰ نے ازدواجی زندگی کے ضمن میں جو اہداف و مقاصد معین ّفرمائے ہیں‘ اس کے لیے جو احکام دیے ہیں اور جو آداب بتائے ہیں‘ فریقین اگر یہ محسوس کریں کہ ہم انہیں ملحوظ نہیں رکھ سکتے تو یہ ایک استثنائی صورت ہے‘ جس میں عورت کوئی مال یا رقم فدیہ کے طور پر دے کر ایسے شوہر سے خلاصی حاصل کر سکتی ہے۔

             فَاِنْ خِفْتُمْ اَلاَّ یُقِیْمَا حُدُوْدَ اللّٰہِ فَلاَ جُنَاحَ عَلَیْہِمَا فِیْمَا افْتَدَتْ بِہٖ :   «پس اگر تمہیں یہ اندیشہ ہو کہ وہ دونوں حدودِ الٰہی پر قائم نہیں رہ سکتے‘ تو ان دونوں پر اس معاملے میں کوئی گناہ نہیں ہے جو عورت فدیہ میں دے۔ »

      یعنی ایسی صورت میں عورت اگر فدیہ کے طور پر کچھ دے دلا کر اپنے آپ کو چھڑا لے تو اس میں فریقین پر کوئی گناہ نہیں۔  مثلاً کسی عورت کا مہر دس لاکھ تھا‘ وہ اس میں سے پانچ لاکھ شوہر کو واپس دے کر اس سے خلع لے لے تو اس میں کوئی حرج نہیں ہے۔

      تِلْکَ حُدُوْدُ اللّٰہِ فَلاَ تَعْتَدُوْہَا :   «یہ اللہ کی حدود ہیں‘ پس ان سے تجاوز مت کرو۔ »

      دیکھئے روزے وغیرہ کے ضمن میں حدود اللہ کے ساتھ فَـلَا تَقْرَبُوْھَا.    فرمایا تھا۔ یہاں فرمایا:   فَلاَ تَعْتَدُوْہَا.   اس لیے کہ ان معاملات میں لوگ بڑے دھڑلے سے اللہ کی مقرر کردہ حدود کو پامال کر جاتے ہیں۔  اگرچہ قانون باقی رہ جاتا ہے مگر اس کی روح ختم ہو جاتی ہے۔

      وَمَنْ یَّـتَـعَدَّ حُدُوْدَ اللّٰہِ فَاُولٰٓئِکَ ہُمُ الظّٰلِمُوْنَ :   «اور جو لوگ اللہ کی حدود سے تجاوز کرتے ہیں وہی ظالم ہیں۔ » 

 آیت 231:    وَاِذَا طَلَّقْتُمُ النِّسَآءَ فَـبَـلَغْنَ اَجَلَہُنَّ :   «اور جب تم لوگ اپنی بیویوں کو طلاق دو اور پھر وہ اپنی عدت ّپوری کر لیں»

      فَاَمْسِکُوْہُنَّ بِمَعْرُوْفٍ اَوْ سَرِّحُوْہُنَّ بِمَعْرُوْفٍ :   «تو یا تو معروف طریقے سے انہیں روک لو یا اچھے انداز سے انہیں رخصت کر دو۔ »

      وَلاَ تُمْسِکُوْہُنَّ ضِرَارًا لِّـتَعْتَدُوْا :   «اور تم انہیں مت روکو نقصان پہنچانے کے ارادے سے کہ تم حدود سے تجاوز کرو۔ »

     دیکھو ایسا مت کرو کہ تم انہیں تنگ کرنے کے لیے روک لو کہ میں اس کی ذرا اور خبر لے لوں‘ اگر طلاق ہو جائے گی تو یہ آزاد ہو جائے گی ۔  غصہ اتنا چڑھا ہوا ہے کہ ابھی بھی ٹھنڈا نہیں ہو رہا اور وہ اس لیے رجوع کر رہا ہے تاکہ عورت کو مزید پریشان کرے‘ اسے اور تکلیفیں پہنچائے۔ اس طرح تو اس نے قانون کا مذاق اڑایا اور اللہ کی دی ہوئی اس اجازت کا ناجائز استعمال کیا۔  

      وَمَنْ یَّـفْعَلْ ذٰلِکَ فَقَدْ ظَلَمَ نَفْسَہ :   «اور جو کوئی بھی یہ کام کرے گا وہ اپنی ہی جان پر ظلم ڈھائے گا۔ »

      وَلاَ تَتَّخِذُوْْٓا اٰیٰتِ اللّٰہِ ہُزُوًا :   «اور اللہ کی آیات کو مذاق نہ بنا لو۔ »

    ضروری ہے کہ احکامِ شریعت پر ان کی روح کے مطابق عمل کیا جائے۔  یہی وجہ ہے کہ قرآن حکیم میں خاص طو رپر ازدواجی زندگی کے ضمن میں بار بار اللہ کے خوف اور تقویٰ کی تاکید کی گئی ہے۔  اگر تمہارے دل اس سے خالی ہوں گے تو تم اللہ کی شریعت کو کھیل تماشا بنا دو گے‘ ٹھٹھا اور مذاق بنا دوگے۔

وَاذْکُرُوْا نِعْمَتَ اللّٰہِ عَلَیْکُمْ :   «اور یاد کرو اللہ کے جو انعامات تم پر ہوئے ہیں»

    وَمَآ اَنْزَلَ عَلَیْکُمْ مِّنَ الْکِتٰبِ وَالْحِکْمَۃِ :   «اور جو اُس نے نازل فرمائی تم پر اپنی کتاب اورحکمت۔»

     یَـعِظُکُمْ بِہ :   «وہ اس کے ذریعے سے تمہیں نصیحت کر رہا ہے۔ »

    اللہ تعالیٰ کی ایسی عظیم نعمتیں پانے کے بعد بھی اگر تم نے اس کی حدود کو توڑا اور اس کی شریعت کو مذاق بنایا تو پھر تمہیں اس کی گرفت سے ڈرنا چاہیے۔

     وَاتَّـقُوا اللّٰہَ :   «اور اللہ کا تقویٰ اختیار کرو»

    وَاعْلَمُوْٓا اَنَّ اللّٰہَ بِکُلِّ شَیْئٍ عَلِیْمٌ :   «اور جان لو کہ اللہ تعالیٰ کو ہر چیز کا حقیقی علم حاصل ہے۔ »

 آیت 233:   وَالْوَالِدٰتُ یُرْضِعْنَ اَوْلاَدَہُنَّ حَوْلَـیْنِ کَامِلَیْنِ :   «اور مائیں اپنی اولاد کو دودھ پلائیں پورے دو سال»

             لِمَنْ اَرَادَ اَنْ یُّتِمَّ الرَّضَاعَۃَ :   «اُس شخص کے لیے جو مدتِ رضاعت پوری کرانا چاہتا ہو۔ »

            اگر طلاق دینے والا شوہر یہ چاہتا ہے کہ مطلقہ ّعورت اُس کے بچے کو دودھ پلائے اور رضاعت کی مدت پوری کرے تو دو سال تک وہ عورت اس ذمہ ّداری سے انکار نہیں کر سکتی۔  

             وَعَلَی الْمَوْلُوْدِ لَـہ رِزْقُہُنَّ وَکِسْوَتُہُنَّ بِالْمَعْرُوْفِ :   «اور بچے والے کے ذمے ّہے بچوں کی ماؤں کا کھانا اور کپڑا دستور کے مطابق۔ »

            اس مدت میں بچے کے باپ پر مطلقہ ّکے کھانے اور کپڑے کی ذمہ داری ہے‘ جسے ہم نان نفقہ کہتے ہیں‘ اس لیے کہ قانوناً اولاد شوہر کی ہے۔  اس سلسلے میں دستور کا لحاظ رکھنا ہو گا۔  یعنی مرد کی حیثیت اور عورت کی ضروریات کو پیش نظر رکھنا ہوگا۔ ایسا نہ ہو کہ مرد کروڑ پتی ہو لیکن وہ مطلقہ بیوی کو اپنی خادماؤں کی طرح کا نان نفقہ دینا چاہے۔  

             لَا تُکَلَّفُ نَفْسٌ اِلاَّ وُسْعَہَا :  «کسی پر ذمہ ّداری نہیں ڈالی جاتی مگر اس کی وسعت کے مطابق۔ »

             لاَ تُضَآرَّ وَالِدَۃٌ بِوَلَدِہَا :   «نہ تو تکلیف پہنچائی جائے کسی والدہ کو اپنے بچے کی وجہ سے»

             وَلاَ مَوْلُـوْدٌ لَّہ بِوَلَدِہ :   «اور نہ اُس کو جس کا وہ بچہ ہے (یعنی باپ) اُس کے بچے کی وجہ سے۔»

            یعنی دونوں کے ساتھ منصفانہ سلوک کیا جائے‘ جیسا کہ حدیث نبوی ہے : ((لَا ضَرَرَ وَلَا ضِرَارَ))   یعنی نہ تو نقصان پہنچانا ہے اور نہ ہی نقصان اٹھانا ہے۔  

             وَعَلَی الْوَارِثِ مِثْلُ  ذٰلِکَ :   «اور وارث پر بھی اسی طرح کی ّذمہ داری ہے۔ »

            اگر بچے کا باپ فوت ہو جائے تو بچے کودودھ پلانے والی مطلقہ عورت کا نان نفقہ مرحوم کے وارثوں کے ذمے ّرہے گا۔  

             فَاِنْ اَرَادَا فِصَالاً عَنْ تَرَاضٍ مِّنْہُمَا وَتَشَاوُرٍ :   «پھر اگر ماں باپ چاہیں کہ دودھ چھڑا لیں (دو برس کے اندر ہی) باہمی رضامندی اور صلاح سے»

             فَلاَ جُنَاحَ عَلَیْہِمَا :   «تو ان دونوں پر کچھ گناہ نہیں۔ »

             وَاِنْ اَرَدْتُّمْ اَنْ تَسْتَرْضِعُوْٓا اَوْلاَدَکُمْ :   «اور اگر تم اپنے بچوں کو کسی اور سے دودھ  پلوانا چاہو»

             فَلاَ جُنَاحَ عَلَیْکُمْ :   «تو بھی تم پر کچھ گناہ نہیں»

            اگر بچے کا باپ یا اُس کے ورثاء بچے کی والدہ کی جگہ کسی اور عورت سے بچے کو دودھ پلوانا چاہتے ہوں تو بھی کوئی حرج نہیں‘ انہیں اس کی اجازت ہے‘ بشرطیکہ …

             اِذَا سَلَّمْتُمْ مَّــآ اٰتَیْتُمْ بِالْمَعْرُوْفِ :   «جب کہ تم (بچے کی ماں کو) وہ سب کچھ دے دو جس کا کہ تم نے دینا ٹھہرایا تھا دستور کے موافق۔ »

            یہ نہ ہو کہ نان نفقہ بچانے کے لیے اب تم مدتِ رضاعت کے درمیان بچے کی ماں کے بجائے کسی اور عورت سے اس لیے دودھ پلوانے لگو کہ اُسے معاوضہ کم دینا پڑے گا۔  اگر تم کسی دایہ وغیرہ سے دودھ پلوانا چاہتے ہو تو پہلے بچے کی ماں کو بھلے طریقے پر وہ سب کچھ ادا کر دو جو تم نے طے کیا تھا۔

             وَاتَّقُوا اللّٰہَ وَاعْلَمُوْٓا اَنَّ اللّٰہَ بِمَا تَعْمَلُوْنَ بَصِیْرٌ :   «اور اللہ کا تقویٰ اختیار کرو اور جان رکھو کہ جو کچھ تم کر رہے ہو اللہ اسے دیکھ رہا ہے۔ » 

 آیت 3:    وَاِنْ خِفْتُمْ اَلاَّ تُقْسِطُوْا فِی الْْیَتٰمٰی: ’’اور اگر تمہیں اندیشہ ہو کہ تم یتیم بچیوں کے بارے میں انصاف نہیں کر سکو گے‘‘

             فَانْـکِحُوْا مَـا طَابَ لَــکُمْ مِّنَ النِّسَآءِ مَثْنٰی وَثُلٰثَ وَرُبٰعَ: ’’تو (انہیں اپنے نکاح میں نہ لاؤ بلکہ) جو عورتیں تمہیں پسند ہوں ان سے نکاح کر لو دو دو‘ تین تین‘ چار چار تک۔‘‘

            اس آیت میں ’’یَتَامٰی‘‘ سے مراد یتیم بچیاں اور خواتین ہیں۔ یتیم لڑکے تو عمر کی ایک خاص حد کو پہنچنے کے بعد اپنی آزاد مرضی سے زندگی گزار لیتے تھے‘ لیکن یتیم لڑکیوں کا معاملہ یہ ہوتا تھا کہ ان کے ولی اور سرپرست ان کے ساتھ نکاح بھی کر لیتے تھے۔ اس طرح یتیم لڑکیوں کے مال بھی ان کے قبضے میں آ جاتے تھے‘ اور یتیم لڑکیوں کے پیچھے ان کے حقوق کی نگہداشت کرنے والا بھی کوئی نہیں ہوتا تھا۔ اگر ماں باپ ہوتے تو ظاہر ہے کہ وہ بچی کے حقوق کے بارے میں بھی کوئی بات کرتے ۔لہٰذا ان کا کوئی پرسانِ حال نہیں ہوتا تھا۔ چنانچہ فرمایا گیا کہ اگر تمہیں اندیشہ ہو کہ تم ان کے بارے میں انصاف نہیں کر سکو گے تو پھر تم ان یتیم بچیوں سے نکاح مت کرو‘ بلکہ دوسری عورتیں جو تمہیں پسند ہوں ان سے نکاح کرو۔ اگر ضرورت ہو تو دو دو‘ تین تین‘ چار چار کی حد تک نکاح کر سکتے ہو‘ اس کی تمہیں اجازت ہے۔ لیکن تم یتیم بچیوں کے ولی بن کر ان کی شادیاں کہیں اور کرو تاکہ تم ان کے حقوق کے پاسبان بن کر کھڑے ہو سکو۔ ورنہ اگر تم نے ان کو اپنے گھروں میں ڈال لیا تو کون ہو گا جو ان کے حقوق کے بارے میں تم سے باز پرس ُکر سکے؟ ---- منکرین سنت اور منکرین حدیث نے اس آیت کی مختلف تعبیرات کی ہیں‘ جو یہاں بیان نہیں کی جا سکتیں۔ اس کا صحیح مفہوم یہی ہے جو سلف سے چلا آ رہا ہے اور جو حضرت عائشہ صدیقہkسے مروی ہے۔ مزید برآں تعددِ ازدواج کے بارے میں یہی ایک آیت قرآن مجید میں ہے۔ اس آیت کی رو سے تعددِ ازدواج کو محدود کیا گیا ہے اور چار سے زائد بیویاں رکھنے کو ممنوع کر دیا گیا ہے۔     ّ

             فَاِنْ خِفْتُمْ اَلاَّ تَعْدِلُوْا فَوَاحِدَۃً: ’’لیکن اگر تمہیں اندیشہ ہو کہ ان کے درمیان عدل نہ کر سکو گے تو پھر ایک ہی پر بس کرو‘‘

            یہ جو ہم نے اجازت دی ہے کہ دو دو‘ تین تین‘ چار چار عورتوں سے نکاح کر لو‘ اس کی شرطِ لازم یہ ہے کہ بیویوں کے درمیان عدل کرو۔ اگر تمہیں اندیشہ ہو کہ اس شرط کو پورا نہیں کر سکو گے اور ان میں برابری نہ کر سکو گے تو پھر ایک ہی شادی کرو‘ اس سے زائد نہیں ۔بیویوں کے مابین عدل و انصاف میں ہر اُس چیز کا اعتبار ہو گا جو شمار میں آ سکتی ہے۔ مثلاً ہر بیوی کے پاس جو وقت گزارا جائے اس میں مساوات ہونی چاہیے۔ نان نفقہ‘ زیورات‘ کپڑے اور دیگر مال و اسباب‘ غرضیکہ تمام مادّی چیزیں جو دیکھی بھالی جا سکتی ہیں ان میں انصاف اور عدل لازم ہے۔البتہ دلی میلان اور رجحان جس پر انسان کو قابو نہیں ہوتا‘ اس میں گرفت نہیں ہے۔

             اَوْ مَا مَلَکَتْ اَیْمَانُکُمْ: ’’یا وہ عورتیں جو تمہاری ملک ِیمین ہوں۔‘‘   ِ

            یعنی وہ عورتیں جو جنگوں میں گرفتار ہو کر آئیں اور حکومت کی طرف سے لوگوں میں تقسیم کر دی جائیں۔ وہ ایک علیحدہ معاملہ ہے اور ان کی تعداد پر کوئی تحدید نہیں ہے۔

              ذٰلِکَ اَدْنٰٓی اَلاَّ تَعُوْلُوْا: ’’یہ اس سے قریب تر ہے کہ تم ایک ہی طرف کو نہ جھک پڑو۔‘‘

            کہ بس ایک ہی بیوی کی طرف میلان ہے اور جیسا کہ آگے آئے گا‘ دوسری معلق ہو کر رہ گئی ہیں کہ نہ وہ شوہر والیاں ہیں اور نہ آزاد ہیں کہ کہیں اور نکاح کر لیں۔

 آیت 4:    وَاٰتُوا النِّسَآء صَدُقٰـتِہِنَّ نِحْلَۃً: ’’اور عورتوں کو ان کے مہر خوشدلی کے ساتھ دیا کرو۔‘‘

            عورتوں کے مہر تاوان سمجھ کر نہ دیا کرو‘ بلکہ فرض جانتے ہوئے ادا کیا کرو۔ صَدُقَاتٌ صِدَاقٌ کی جمع ہے‘ جبکہ صَدَقَۃٌ   کی جمع صَدَقَاتٌ  آتی ہے۔

             فَاِنْ طِبْنَ لَــکُمْ عَنْ شَیْئٍ مِّنْہُ نَفْسًا: ’’پھر اگر وہ خود اپنی رضامندی سے اس  میںسے کوئی چیز تمہیں چھوڑ دیں‘‘

            تم نے جو مہر مقرر کیا تھا وہ انہیں ادا کر دیا‘ اب وہ تمہیں اس میں سے کوئی چیز ہدیہ کر رہی ہیں‘ تحفہ دے رہی ہیں تو کوئی حرج نہیں۔

             فَـکُلُوْہُ ھَنِیْـئًا مَّرِیْئًا: ’’تو تم اس کو کھاؤ مزے سے خوشگواری سے۔‘‘

            تم اسے بے کھٹکے استعمال میں لا سکتے ہو‘ اس میں کوئی حرج نہیں ہے۔ لیکن یہ ہو ان کی مرضی سے‘ زبردستی اور جبر کر کے نہ لے لیا جائے۔ 

 آیت 19:   یٰٓـــاَیـُّــہَا الَّذِیْنَ اٰمَنُوْا لاَ یَحِلُّ لَــکُمْ اَنْ تَرِثُوا النِّسَآء کَرْہًا: ’’اے اہل ِایمان! تمہارے لیے جائز نہیں کہ تم عورتوں کو زبردستی وراثت میں لے لو۔‘‘   ّ

            یہ بھی عرب جاہلیت کی ایک مکروہ رسم تھی جس میں عورتوں کے طبقے پر شدید ظلم ہوتا تھا۔ ہوتا یوں تھا کہ ایک شخص فوت ہوا ہے‘  اس کی چار پانچ بیویاں ہیں‘ تو اس کا بڑا بیٹا وارث بن گیا ہے۔ اب اس کی حقیقی ماں تو ایک ہی ہے‘ باقی سوتیلی مائیں ہیں‘ تو وہ ان کو وراثت میں لے لیتا تھا کہ یہ میرے قبضے میں رہیں گی‘ بلکہ ان سے شادیاں بھی کر لیتے تھے یا بغیر نکاح اپنے گھروں میں ڈالے رکھتے تھے‘ یا پھر یہ کہ اختیار اپنے ہاتھ میں رکھ کر ان کی شادیاں کہیں اور کرتے تھے تو مہر خود لے لیتے تھے۔ چنانچہ فرمایا کہ اے اہل ایمان! تمہارے لیے جائز نہیں ہے کہ تم عورتوں کے زبردستی وارث بن بیٹھو! جس عورت کا شوہر فوت ہو گیا وہ آزاد ہے۔ عدت گزار کر جہاں چاہے جائے اور جس سے چاہے نکاح کر لے۔   ّ  ِ

             وَلاَ تَعْضُلُوْہُنَّ لِتَذْہَبُوْا بِبَعْضِ مَـآ اٰتَـیْتُمُوْہُنَّ: ’’اور نہ یہ جائز ہے کہ تم انہیں روکے رکھو تاکہ تم ان سے واپس لے لو اس کا کچھ حصہ جو کچھ تم نے ان کو دیا ہے‘‘

            نکاح کے وقت تو بڑے چاؤ تھے‘  بڑے لاڈ اٹھائے جا رہے تھے اور کیا کیا دے دیا تھا‘ اور اب وہ سب واپس ہتھیانے کے لیے طرح طرح کے ہتھکنڈے استعمال ہو رہے ہیں‘ انہیں تنگ کیا جا رہا ہے‘ ذہنی طور پر تکلیف پہنچائی جا رہی ہے۔

              اِلَّآ اَنْ یَّـاْتِیْنَ بِفَاحِشَۃٍ مُّـبَــیِّنَۃٍ: ’’ہاں اگر وہ صریح بد کاری کی مرتکب ہوئی ہوں (تو تمہیں ان کو تنگ کرنے کا حق ہے)۔‘‘

            اگر کسی سے صریح حرام کاری کا فعل سرزد ہو گیا ہو اور اس پر اسے کوئی سزا دی جائے (جیسے کہ اوپر آ چکا ہے فَاٰذُوْہُمَا ) اس کی تو اجازت ہے۔ اس کے بغیر کسی پر زیادتی کرنا جائز نہیں ہے۔ خاص طور پر اگر نیت یہ ہو کہ میں اس سے اپنا مہر واپس لے لوں‘ یہ انتہائی کمینگی ہے۔

             وَعَاشِرُوْہُنَّ بِالْمَعْرُوْفِ: ’’اور عورتوں کے ساتھ اچھے طریقے پر معاشرت اختیار کرو۔‘‘

            ان کے ساتھ بھلے طریقے پر‘ خوش اسلوبی سے‘ نیکی اور راستی کے ساتھ گزر بسر کرو۔

             فَاِنْ کَرِہْتُمُوْہُنَّ فَـعَسٰٓی اَنْ تَـکْرَہُوْا شَیْئًا وَّیَجْعَلَ اللّٰہُ فِیْہِ خَیْرًا کَثِیْرًا: ’’اگر وہ تمہیں ناپسند ہوں تو بعید نہیں کہ ایک چیز تمہیں ناپسند ہو اور اس میں اللہ نے تمہارے لیے بہت کچھ بہتری رکھ دی ہو۔‘‘

            اگر تمہیں کسی وجہ سے اپنی عورتیں ناپسند ہو گئی ہوں تو ہو سکتا ہے کہ کسی شے کو تم ناپسند کرو‘ درآنحالیکہ اللہ نے اسی میں تمہارے لیے خیر کثیر رکھ دیا ہو۔ ایک عورت کسی ایک اعتبار سے آپ کے دل سے اُتر گئی ہے‘ طبیعت کا میلان نہیں رہا ہے‘ لیکن پتا نہیں اس میں اور کون کون سی خوبیاں ہیں اور وہ کس کس اعتبار سے آپ کے لیے خیر کا ذریعہ بنتی ہے۔ تو اس معاملے کو اللہ کے حوالے کرو‘ اور ان کے حقوق ادا کرتے ہوئے‘ ان کے ساتھ خوش اسلوبی سے گزر بسرکرو۔ البتہ اگر معاملہ ایسا ہو گیا ہے کہ ساتھ رہنا ممکن نہیں ہے تو طلاق کا راستہ کھلا ہے‘ شریعت اسلامی نے اس میں کوئی تنگی نہیں رکھی ہے۔ یہ مسیحیت کی طرح کا کوئی غیر معقول نظام نہیں ہے کہ طلاق ہو ہی نہیں سکتی۔ 

 آیت 20:    وَاِنْ اَرَدْتُّمُ اسْتِبْدَالَ زَوْجٍ مَّـکَانَ زَوْجٍ: ’’اور اگر تمہارا ارادہ ایک بیوی کی جگہ دوسری بیوی لے آنے کا ہو‘‘

            اگر تم نے فیصلہ کر ہی لیا ہو کہ ایک بیوی کی جگہ دوسری بیوی لانی ہے۔

             وَّاٰتَـیْتُمْ اِحْدٰٹہُنَّ قِنْطَارًا: ’’اور ان میں سے کسی ایک کو تم نے ڈھیروں مال دیا ہو‘‘

              فَلاَ تَاْخُذُوْا مِنْہُ شَیْئًا: ’’تو اس میں سے کوئی بھی شے واپس نہ لو۔‘‘

            عورتوں کو تم نے جو مہر دیا تھا وہ ان کا ہے‘ اب اس میں سے کچھ واپس نہیں لے سکتے۔

              اَتَـاْخُذُوْنَـہ بُہْتَاناً وَّاِثْمًا مُّبِیْنًا: ’’کیا تم اسے واپس لو گے بہتان لگا کر اور صریح گناہ کے مرتکب ہو کر؟‘‘ 

 آیت 21:   وَکَیْفَ تَاْخُذُوْنَہ وَقَدْ اَفْضٰی بَعْضُکُمْ اِلٰی بَعْضٍ: ’’اور تم اسے کیسے واپس لے سکتے ہو جبکہ تم ایک دوسرے کے ساتھ صحبت کر چکے ہو؟‘‘

            کچھ عقل کے ناخن لو‘ کچھ شعور اور شرافت کا ثبوت دو۔ تم ان سے وہ مال کس طرح واپس لینا چاہتے ہو جبکہ تمہارے مابین دنیا کا انتہائی قریبی تعلق قائم ہو چکا ہے۔

             وَّاَخَذْنَ مِنْکُمْ مِّیْـثَاقًا غَلِیْظًا: ’’اور وہ تم سے مضبوط قول و قرار لے چکی ہیں۔‘‘

            یہ قول و قرار نکاح کے وقت ہوتا ہے جب مرد عورت کے مہر و نفقہ کی پوری ذمہ داری لیتا ہے۔

            اب آ رہی ہے اصل میں وہ کانٹے دار آیت جو عورتوں کے حلق سے بہت مشکل سے اُترتی ہے‘ کانٹا بن کر اٹک جاتی ہے۔ اب تک اس ضمن میں جو باتیں آئیں وہ دراصل اس کی تمہید کی حیثیت رکھتی ہیں۔ پہلی تمہید سورۃ البقرۃ میں آ چکی ہے:  وَلَـھُنَّ مِثْلُ الَّذِیْ عَلَیْھِنَّ بِالْمَعْرُوْفِ وَلِلرِّجَالِ عَلَیْھِنَّ دَرَجَۃٌ: (آیت: 228)  ’’اور عورتوں کے لیے اسی طرح حقوق ہیں جس طرح ان پر ذمہ داریاں ہیں دستور کے مطابق‘ البتہ مردوں کے لیے اُن پر ایک درجہ فوقیت کا ہے‘‘۔  یہ کہہ کر بات چھوڑ دی گئی۔ اس کے بعد ابھی ہم نے پڑھا: وَلاَ تَتَمَنَّوْا مَا فَضَّلَ اللّٰہُ بِہ بَعْضَکُمْ عَلٰی بَعْضٍ. یہ ہدایت عورتوں کے لیے مزید ذہنی تیاری کی غرض سے دی گئی۔ اور اب دو ٹوک انداز میں ارشاد ہو رہا ہے:   ّ   ُ

 آیت 34:  اَلرِّجَالُ قَوّٰمُوْنَ عَلَی النِّسَآءِ: ’’مرد عورتوں پر حاکم ہیں‘‘   َ

            یہ ترجمہ میں زور دے کر کر رہا ہوں۔ اس لیے کہ یہاں «قَامَ»  «عَلٰی» کے صلہ کے ساتھ آ رہا ہے۔ قَامَ  ’بِ‘ کے ساتھ آئے گا تو معنی ہوں گے ’’کسی شے کو قائم کرنا‘‘۔ اسی سورہ مبارکہ میں آگے چل کر یہ الفاظ آئیں گے:  کُوْنُوْا قَوّٰمِیْنَ بِالْقِسْطِ. ’’عدل کو قائم کرنے والے بن کر کھڑے ہو جاؤ!‘‘ جبکہ قَامَ عَلٰی کا مفہوم ہے کسی کے اوپر مسلط ہونا۔ّ یعنی حاکم اور منتظم ہونا۔ چنانچہ آیت زیر مطالعہ سے یہ واضح ہدایت ملتی ہے کہ گھر کے ادارے میں حاکم ہونے کی حیثیت مرد کو حاصل ہے‘ سربراہِ خاندان مرد ہے‘ عورت نہیں ہے۔ عورت کو بہرحال اس کے ساتھ ایک وزیر کی حیثیت سے کام کرنا ہے۔ یوں تو ہر انسان یہ چاہتا ہے کہ میری بات مانی جائے۔ گھر کے اندر مرد بھی یہ چاہتا ہے اور عورت بھی۔ لیکن آخر کار کس کی بات چلے گی؟ یا تو دونوں باہمی رضامندی سے کسی مسئلے میں متفق ہو جائیں‘ بیوی اپنے شوہر کو دلیل سے‘ اپیل سے‘ جس طرح ہو سکے قائل کرلے تو معاملہ ٹھیک ہوگیا۔ لیکن اگر معاملہ طے نہیں ہو رہا تو اب کس کی رائے فیصلہ کن ہو گی؟ مرد کی! عورت کی رائے جب ُمسترد ہو گی تو اُسے اس سے ایک صدمہ تو پہنچے گا۔ اسی صدمے کا اثر کم کرنے کے لیے اللہ تعالیٰ نے عورت میں نسیان کا مادہ زیادہ رکھ دیا ہے‘ جو ایک safety valve کا کام دیتا ہے۔ یہی وجہ ہے کہ قانونِ شہادت میں ایک مرد کی جگہ دو عورتوں کا نصاب رکھا گیا ہے ’’تاکہ ان میں سے کوئی ایک بھول جائے تو دوسری یاد کرا دے‘‘۔ اس پر ہم سورۃ البقرۃ: (آیت: 282) میں بھی گفتگو کر چکے ہیں۔ بہرحال اللہ تعالیٰ نے گھر کے ادارے کا سربراہ مرد کو بنایا ہے۔ اب یہ دوسری بات ہے کہ مرد اگر اپنی اس حیثیت کا غلط استعمال کرتا ہے‘  عورت پر ظلم کرتا ہے اور اس کے حقوق ادا نہیں کرتا تو اللہ کے ہاں بڑی سخت پکڑ ہو گی۔ آپ کو ایک اختیار دیا گیا ہے اور آپ اس کا غلط استعمال کر رہے ہیں‘ اس کو ظلم کا ذریعہ بنا رہے ہیں تو اس کی سزا اللہ تعالیٰ کے ہاں آپ کو مل جائے گی۔

             بِمَا فَضَّلَ اللّٰہُ بَعْضَہُمْ عَلٰی بَعْضٍ: ’’بسبب اُس فضیلت کے جو اللہ نے بعض کو بعض پر دی ہے‘‘

            مرد کو بعض صفات میں عورت پر نمایاں تفوق حاصل ہے‘ جن کی بنا پر قوامیت کی ذمہ داری اس پر ڈالی گئی ہے۔

             وَّبِمَآ اَنْفَقُوْا مِنْ اَمْوَالِہِمْ: ’’اور بسبب اس کے کہ جو وہ خرچ کرتے ہیں اپنے مال۔‘‘

            اسلام کے معاشرتی نظام میں کفالتی ذمہ داری تمام تر مرد کے اوپر ہے۔ شادی کے آغاز ہی سے مرد اپنا مال خرچ کرتا ہے۔ شادی اگرچہ مرد کی بھی ضرورت ہے اور عورت کی بھی‘ لیکن مرد مہر دیتا ہے‘ عورت مہر وصول کرتی ہے۔ پھر گھر میں عورت کا نان نفقہ مرد کے ذمے ہے۔

             فَالصّٰلِحٰتُ قٰنِتٰتٌ: ’’پس جو نیک بیویاں ہیں وہ اطاعت شعار ہوتی ہیں‘‘

            مرد کو قوامیت کے منصب پر فائز کرنے کے بعد اب نیک بیویوں کا رویہ بتایاجا رہا ہے۔  یوں سمجھئے کہ قرآن کے نزدیک ایک خاتونِ خانہ کی جو بہترین روش ہونی چاہیے وہ یہاں تین الفاظ میں بیان کر دی گئی ہے:   فَالصّٰلِحٰتُ قٰنِتٰتٌ حٰفِظٰتٌ لِّلْغَیْبِ:۔

             حٰفِظٰتٌ لِّلْغَیْبِ: ’’غیب میں حفاظت کرنے والیاں‘‘

            َوہ مردوں کی غیر موجودگی میں ان کے اموال اور حقوق کی حفاظت کرتی ہیں۔ ظاہر ہے مرد کا مال تو گھر میں ہی ہوتا ہے‘ وہ کام پر چلا گیا تو اب وہ بیوی کی حفاظت میں ہے۔ اسی طرح بیوی کی عصمت درحقیقت مرد کی عزت ّہے۔ وہ اس کی غیر موجودگی میں اس کی عزت کی حفاظت کرتی ہے۔ اسی طرح مرد کے راز ہوتے ہیں‘  جن کی سب سے زیادہ بڑھ  کر رازدان بیوی ہوتی ہے۔ تو یہ حفاظت تین اعتبارات سے ہے‘ شوہر کے مال کی‘  شوہر کی عزت و ناموس کی‘ اور شوہر کے رازوں کی ۔

              بِمَا حَفِظَ اللّٰہُ: ’’اللہ کی حفاظت سے۔‘‘

            اصل حفاظت و نگرانی تو اللہ کی ہے‘ لیکن انسان کو اپنی ذمہ داری ادا کرنی پڑتی ہے۔ جیسے رازق تو اللہ ہے‘  لیکن انسان کو کام کر کے رزق کمانا پڑتا ہے۔

             وَالّٰتِیْ تَخَافُوْنَ نُشُوْزَہُنَّ: ’’اور وہ خواتین جن کے بارے میں تمہیں سرکشی کا اندیشہ ہو‘‘

            ّاگر کسی عورت کے رویے سے ظاہر ہو رہا ہو کہ یہ سرکشی‘ سرتابی‘ ضد اور ہٹ دھرمی کی روش پر چل پڑی ہے‘ شوہر کی بات نہیں مان رہی بلکہ ہر صورت میں اپنی بات منوانے پر مصر ہے اور اس طرح گھر کی فضا خراب کی ہوئی ہے تو یہ نشوز ہے۔ اگر عورت اپنی اس حیثیت کو ذہنا ً تسلیم نہ کرے کہ وہ شوہر کے تابع ہے تو ظاہر بات ہے کہ مزاحمت (friction) ہو گی اور اس کے نتیجے میں گھر کے اندر ایک فساد پیدا ہو گا۔ ایسی صورت حال میں مرد کو قوّام ہونے کی حیثیت سے بعض تادیبی اختیارات دیے گئے ہیں‘ جن کے تین مراحل ہیں:  ُ  

             فَعِظُوْہُنَّ: ’’پس ان کونصیحت کرو‘‘

            پہلا مرحلہ سمجھانے بجھانے کا ہے‘ جس میں ڈانٹ ڈپٹ بھی شامل ہے۔

             وَاہْجُرُوْہُنَّ فِی الْْمَضَاجِع: ’’اور ان کو ان کے بستروں میں تنہا چھوڑ دو‘‘

            اگر نصیحت و ملامت سے کام نہ چلے تو دوسرا مرحلہ یہ ہے کہ ان سے اپنے بستر علیحدہ کر لو اور اس کے ساتھ تعلق زن و شو کچھ عرصہ کے لیے منقطع کر لو۔   َ

              وَاضْرِبُوْہُنَّ: ’’اور ان کو مارو۔‘‘

            اگر اب بھی وہ اپنی روش نہ بدلیں تو مرد کو جسمانی سزا دینے کا بھی اختیار ہے۔ اس ضمن میں آنحضور  نے ہدایت فرمائی ہے کہ چہرے پر نہ مارا جائے اور کوئی ایسی مار نہ ہو جس کا مستقل نشان جسم پر پڑے۔ مذکورہ بالا تادیبی ہدایات اللہ کے کلام کے اندر بیان فرمائی گئی ہیں اور انہیں بیان کرنے میں ہمارے لیے کوئی جھجک نہیں ہونی چاہیے۔ معاشرتی زندگی کو درست رکھنے کے لیے ان کی ضرورت پیش آئے تو انہیں اختیار کرنا ہو گا۔

             فَاِنْ اَطَعْنَـکُمْ فَلاَ تَـبْغُوْا عَلَـیْہِنَّ سَبِیْلاً: ’’پھر اگر وہ تمہاری اطاعت کریں تو ان کے خلاف (خواہ مخواہ زیادتی کی) راہ مت تلاش کرو۔‘‘

            اگر عورت سرکشی و سرتابی کی روش چھوڑ کر اطاعت کی راہ پر آ جائے تو پچھلی کدورتیں بھلا دینی چاہئیں۔ اس سے انتقام لینے کے بہانے تلاش نہیں کرنے چاہئیں۔

             اِنَّ اللّٰہَ کَانَ عَلِیًّا کَبِیْرًا: ’’یقینا اللہ تعالیٰ بہت بلند ہے‘ بہت بڑا ہے۔‘‘ 

 آیت 35:   وَاِنْ خِفْتُمْ شِقَاقَ بَیْـنِـہِمَا: ’’اور اگر تم کو میاں بیوی کے درمیان افتراق کا اندیشہ ہو‘‘

            ’’اب اگر کوئی تدبیر نتیجہ خیز نہ ہو اور ان دونوں کے مابین ضدم ضدا کی کیفیت پیدا ہو چکی ہو کہ عورت بھی اکڑ گئی ہے‘ مرد بھی اکڑا ہوا ہے‘ اور اب ان کا ساتھ چلنا مشکل نظر آتا ہو تو اصلاحِ احوال کے لیے ایک دوسری تدبیر اختیار کرنے کی ہدایت فرمائی گئی ہے۔  ّ  َ

             فَابْعَثُوْا حَکَمًا مِّنْ اَہْلِہ وَحَکَمًا مِّنْ اَہْلِہَا: ’’تو ایک حَکَم مرد کے خاندان سے مقرر کرو اور ایک حَکَم عورت کے خاندان سے۔‘‘

             اِنْ یُّرِیْدَآ اِصْلاَحًا یُّـوَفِّقِ اللّٰہُ بَـیْـنَہُمَا: ’’اگر وہ دونوں اصلاح چاہیں گے تو اللہ تعالیٰ ان کے درمیان موافقت پیدا کر دے گا۔‘‘    َ 

            ’’اِنْ یُّرِیْدَآ اِصْلاَحًا‘‘ میں مراد زَوجین بھی ہو سکتے ہیں اور حکمین بھی۔ یعنی ایک تو یہ کہ اگر واقعتا شوہر اور بیوی موافقت چاہتے ہیں تو اللہ ان کے درمیان سازگاری پیدا فرما دے گا۔ بعض اوقات ایسا ہوتا ہے کہ شوہر اور بیوی دونوں کی خواہش ہوتی ہے کہ معاملہ درست ہوجائے‘  لیکن کوئی نفسیاتی گرہ ایسی بندھ جاتی ہے جسے کھولنا ان کے بس میں نہیں ہوتا۔ اب اگر دونوں کے خاندانوں میں سے ایک ایک ثالث آ جائے گا اور وہ دونوں مل بیٹھ کر خیر خواہی کے جذبے سے اصلاحِ احوال کی کوشش کریں گے تو اس گرہ کو کھول سکیں گے۔ یہ دونوں اسبابِ اختلاف کی تحقیق کریں گے‘ میاں بیوی دونوںکے گلے شکوے اور وضاحتیں سنیں گے اوردونوں کو سمجھا بجھا کر تصفیہ کی کوئی صورت نکالیں گے۔’’اِنْ یُّرِیْدَآ اِصْلاَحًا‘‘میں مراد حکمین بھی ہو سکتے ہیں کہ اگر وہ اصلاح کی پوری کوشش کریں گے تو اللہ تعالیٰ ان کے مابین موافقت‘پیدا فرما دے گا۔ لیکن میرا رجحان پہلی رائے کی طرف زیادہ ہے کہ اس سے مراد میاںبیوی ہیں۔

             اِنَّ اللّٰہَ کَانَ عَلِیْمًا خَبِیْرًا: ’’یقینا اللہ تعالیٰ سب کچھ جانتا ہے اور باخبر ہے۔‘‘ 

آیت 128:      وَاِنِ امْرَاَۃٌ خَافَتْ مِنْم بَعْلِھَا نُشُوْزًا اَوْ اِعْرَاضًا: ’’اور اگر کسی عورت کو اندیشہ ہو اپنے شوہر سے زیادتی یا بے رُخی کا‘‘

            ایک ’’نشوز‘‘ تو وہ تھا جس کا تذکرہ اسی سورۃ کی آیت: 34 میں عورت کے لیے ہوا تھا:  وَالّٰتِی تَخَافُوْنَ نَشُوْزَھُنَّ.  ’’اور جن عورتوں سے تمہیں سرکشی کا اندیشہ ہو‘‘۔  یعنی وہ عورتیں‘ وہ بیویاں جو خاوندوں سے سرکشی کرتی ہیں‘ ان کے احکام نہیں مانتیں‘ ان کی اطاعت نہیں کرتیں‘ اپنی ضد پر اَڑی رہتی ہیں‘ ان کے بارے میں حکم تھا کہ اُن کے ساتھ کیسا معاملہ کیا جائے۔ اب یہاں ذکر ہے اُس ’’نشوز‘‘ کا جس کا اظہار خاوند کی طرف سے ہو سکتا ہے۔ یعنی یہ بھی تو ہو سکتا ہے کہ خاوند اپنی بیوی پر ظلم کر رہا ہو‘ اس کے حقوق ادا کرنے میں پہلو تہی کر رہا ہو‘ اپنی ’’قوّامیت‘‘  کے حق کو غلط طریقے سے استعمال کر رہا ہو‘ بے جا رعب ڈالتا ہو‘ دھونس دیتا ہو‘ یا بلا وجہ ستاتا ہو‘ تنگ کرتا ہو‘ اور تنگ کر کے مہر معاف کروانا چاہتا ہو‘ یا اگر بیوی کے والدین اچھے کھاتے پیتے ہوں تو ہو سکتا ہے اسے بلیک میل کر کے اس کے والدین سے دولت ہتھیانا چاہتا ہو۔ یہ ساری خباثتیں ہمارے معاشرے میں موجود ہیں اورعورتیں بیچاری ظلم و ستم کی اس چکی میں پستی رہتی ہیں۔ آیت زیر نظر میں اس مسئلے کی وضاحت کی گئی ہے کہ اگر کسی عورت کو اپنے شوہر سے اندیشہ ہو جائے کہ وہ زیادتی کرے گا‘ یا اگر شوہر زیادتی کر رہا ہو اور وہ بیوی کے حقوق ادا نہ کر رہا ہو‘ یا اس کی طرف میلان ہی نہ رکھتا ہو‘ کوئی نئی شادی رچا لی ہو اور اب ساری توجہ نئی دلہن کی طرف ہو۔

             فَلاَ جُنَاحَ عَلَیْہِمَآ اَنْ یُّصْلِحَا بَیْنَہُمَا صُلْحًا: ’’تو ان دونوں پر کوئی الزام نہیں ہو گا کہ وہ آپس میں صلح کر لیں۔‘‘

            یہاں صلح سے مراد یہ ہے کہ سارے معاملات باہم طے کر کے عورت خلع لے لے۔ لیکن خلع لینے میں‘ جیسا کہ ہم پڑھ چکے ہیں جبکہ عورت کو مہر چھوڑنا پڑے گا‘ اور اگر لیا تھا تو کچھ واپس  کرنا پڑے گا۔

             وَالصُّلْحُ خَیْرٌ وَاُحْضِرَتِ الْاَنْفُسُ الشُّحَّ: ’’ اور صلح بہرحال بہتر ہے۔ البتہ انسانی نفس پر لالچ مسلط رہتا ہے۔‘‘

            مرد  چاہے گا کہ میرا پورا مہر واپس کیا جائے جبکہ عورت چاہے گی کہ مجھے کچھ بھی واپس نہ کرنا پڑے۔ یہ مضامین سورۃ البقرۃ میں بیان ہو چکے ہیں۔

             وَاِنْ تُحْسِنُوْا وَتَتَّقُوْا فَاِنَّ اللّٰہَ کَانَ بِمَا تَعْمَلُوْنَ خَبِیْرًا: ’’اوراگر تم احسان کرو اور تقویٰ اختیار کرو تو جان لو کہ اللہ تمہارے تمام اعمال سے با خبر ہے۔‘‘

            تم مرد ہو‘ مردانگی کا ثبوت دو‘  اس معاملے میں اپنے اندر نرمی پیدا کرو‘ بیوی کا حق فراخ دلی سے ادا کرو۔

آیت 129:   وَلَنْ تَسْتَطِیْعُوْٓا اَنْ تَعْدِلُوْا بَیْنَ النِّسَآءِ وَلَوْ حَرَصْتُمْ:  ’’اور  تمہارے لیے ممکن ہی نہیں کہ تم عورتوں کے درمیان پورا پورا انصاف کر سکو‘ چاہے تم اس کے لیے کتنے ہی حریص ہو‘‘

            سورۃ کے آغاز (آیت: 3)  میں فرمایا گیا تھا: فَاِنْ خِفْتُمْ اَلاَّ تَعْدِلُوْا فَوَاحِدَۃً: یعنی اگر تمہیں اندیشہ ہو کہ تم اپنی بیویوں میں (اگر ایک سے زائد ہیں) عدل نہیں کر سکو گے تو پھرایک پر ہی اکتفا کرو‘ دوسری شادی مت کرو۔ اگر تمہیں کلی طور پر اطمینان ہے‘  اپنے اوپر اعتماد ہے کہ تم عدل کر سکتے ہو تب دوسری شادی کرو‘  ورنہ نہیں۔ لیکن حقیقت یہ ہے کہ کچھ چیزیں تو گنتی اور ناپ تول کی ہوتی ہیں‘ ان میں تو عدل کرنا ممکن ہے‘ لیکن جو قلبی میلان ہے یہ تو انسان کے اختیار میں نہیں ہے۔ حضور نے اپنی تمام ازواج کے لیے ہر چیز گِن گِن کر طے کی ہوئی تھی۔ شب بسری کے لیے سب کی باریاں مقر ر تھیں۔ دن میں بھی آپ ہر گھر میں چکر لگاتے تھے۔ عصر اور مغرب کے درمیان تھوڑی تھوڑی دیر ہر زوجہ محترمہ کے پاس ٹھہرتے تھے۔ اگر کہیں زیادہ دیر ہو جاتی تو گویا کھلبلی مچ جاتی تھی کہ آج وہاں زیادہ دیر کیوں ٹھہر گئے؟ یہ چیزیں انسانی معاشرے میں ساتھ ساتھ چلتی ہیں۔ حضور کی ازواجِ مطہرات  کا آپس کا معاملہ بہت اچھا تھا‘ لیکن سوکناپے کے اثرات کچھ نہ کچھ تو ہوتے ہیں‘ یہ عورت کی فطرت ہے‘  جو اس کے اختیار میں نہیں ہے۔ تو اس لیے فرمایا کہ مکمل انصاف کرنا تمہارے بس میں نہیں۔ اس سے مراد دراصل قلبی میلان ہے ۔ ایک حدیث میں بھی اس کی وضاحت ملتی ہے کہ نبی اکرم  فرمایا کرتے تھے کہ اے اللہ میں نے ظاہری چیز وں میں پورا پورا عدل کیا ہے‘ باقی جہاں تک میرے دل کے میلان کا تعلق ہے تو مجھے امید ہے کہ اس بارے میں تُو مجھ سے مواخذہ نہیں کرے گا۔ اسی لیے یہاں فرمایا گیا کہ تم چاہو بھی تو عدل نہیں کر سکتے۔

             فَلاَ تَمِیْلُوْا کُلَّ الْمَیْلِ فَتَذَرُوْہَا کَالْمُعَلَّقَۃِ: ’’تو ایسا نہ ہو کہ تم ایک ہی کی طرف پورے کے پورے جھک جاؤ کہ دوسری بیوی کومعلّق کر کے چھوڑ دو۔‘‘

            دوسری بیوی اس طرح معلّق ہو کر نہ رہ جائے کہ اب وہ نہ شوہر والی ہے اور نہ آزاد ہے۔ اس سے خاوند کا گویا کوئی تعلق ہی نہیں رہا۔

             وَاِنْ تُصْلِحُوْا وَتَتَّقُوْا فَاِنَّ اللّٰہَ کَانَ غَفُوْرًا رَّحِیْمًا: ’’اور اگر تم اصلاح کر لو اور تقویٰ کی روش اختیار کروتو اللہ تعالیٰ بھی غفور اور رحیم ہے۔‘‘

 

            اب اگلی آیت میں طلاق کے معاملے میں ایک اہم نکتہ بیان ہو رہا ہے۔ طلاق یقینا ایک نہایت سنجیدہ مسئلہ ہے‘ اس لیے رسول اللہ  نے فرمایا: «اَبْغَضُ الْـحَلَالِ اِلَی اللّٰہِ تَـعَالٰی الطَّلَاقُ»  ’’حلال چیزوں میں اللہ تعالیٰ کے نزدیک سب سے زیادہ نا پسندیدہ چیز طلاق ہے‘‘۔ لیکن ہمارے معاشرے میں اس کو بسا اوقات کفر تک پہنچا دیا جاتا ہے۔  لڑائیاں ہو رہی ہیں‘ مقدمات چل رہے ہیں‘ مزاجوں میں موافقت نہیں ہے‘ ایک دوسرے کو کوس رہے ہیں‘ دن رات کا جھگڑا ہے‘ لیکن طلاق نہیں دینی۔یہ طرزِ عمل نہایت احمقانہ ہے اور شریعت کی منشاء کے بالکل خلاف بھی۔ اس آیت میں آپ دیکھیں گے کہ ایک طرح سے طلاق کی ترغیب دی گئی ہے۔

 

ٓیت 130:    وَاِنْ یَّـتَفَرَّقَا یُغْنِ اللّٰہُ کُلاًّ مِّنْ سَعَتِہ: ’’اوراگر وہ (میاں بیوی) دونوں علیحدہ ہو جائیں گے تو اللہ ان کو اپنی کشادگی سے غنی کر دے گا۔‘‘

            ہو سکتا ہے کہ اس عورت کو بھی کوئی بہتر رشتہ مل جائے جو اس کے ساتھ مزاجی موافقت رکھنے والا ہو اور اس شوہر کو بھی اللہ تعالی  کوئی بہتر بیوی دے دے۔ میاں بیوی کا ہر وقت لڑتے رہنا‘ دنگا فساد کرنا اور عدمِ موافقت کے باوجود طلاق کا اختیار (option) استعمال نہ کرنا‘ یہ سوچ ہمارے ہاں ہندو معاشرت اور عیسائیت کے اثرات کی وجہ سے پیدا ہوئی ہے۔ ہندومت کی طرح عیسائیت میں بھی طلاق حرام ہے۔ در اصل انجیل میں تو شریعت اور قانون ہے ہی نہیں‘ صرف اخلاقی تعلیمات ہیں۔ چنانچہ جس طرح نبی اکرم  نے فرمایا: «اَبْغَضُ الْحَلَالِ اِلَی اللّٰہِ الطَّلَاقُ» ایسی ہی کوئی بات حضرت مسیح نے بھی فرمائی تھی کہ کوئی شخص بلاوجہ اپنی بیوی کو طلاق نہ دے کہ معاشرے میں اس کے منفی اثرات مرتب ہونے کا اندیشہ ہے۔ طلاق شدہ عورت کی دوسری شادی نہ ہونے کی صورت میں اس کے آوارہ ہو جانے کا امکان ہے اور اگر ایسا ہوا تو اس کا وبال اسے بلاوجہ طلاق دینے والے کے سر جائے گا۔ لیکن یہ محض اخلاقی تعلیم تھی‘ کوئی قانونی شِق نہیں تھی ۔عیسائیت کا قانون تو وہی ہے جو تورات کے اندر ہے اور حضرت مسیح  فرما گئے ہیں کہ یہ نہ سمجھو کہ میں قانون کو ختم کرنے آیا ہوں‘ بلکہ حضرت موسی کی شریعت تم پر بد ستور نافذ رہے گی۔ قانون بہر حال قانون ہے‘ اخلاقی ہدایات کو قانون کا درجہ تو نہیں دیا جا سکتا۔ لیکن عیسائیت میں اس طرح کی اخلاقی تعلیمات کو قانون بنا دیا گیا‘ جس کی وجہ سے بلا جواز پیچیدگیاں پیدا ہوئیں۔ چنانچہ ان کے ہاں کوئی شخص اپنی بیوی کو اُس وقت تک طلاق نہیں دے سکتا جب تک اس پر بدکاری کا جرم ثابت نہ کرے۔ لہٰذا وہ طلاق دینے کے لیے طرح طرح کے طریقے استعمال کر کے بیوی کو پہلے بد کردار بناتے ہیں‘ پھر اس کا ثبوت فراہم کرتے ہیں‘ تب جا کر اس سے جان چھڑاتے ہیں۔ تو شریعت کے درست اور آسان راستے اگر چھوڑ دیے جائیں تو پھر اسی طرح غلط اور مشکل راستے اختیار کرنے پڑتے ہیں۔یہی وجہ ہے کہ اس آیت میں عدمِ موافقت کی صورت میں طلاق کے بارے میں ایک طرح کی ترغیب نظر آتی ہے۔

             وَکَانَ اللّٰہُ وَاسِعًا حَکِیْمًا: ’’اور اللہ بڑی وسعت رکھنے والا حکمت والاہے۔‘‘

            اللہ کے خزانے بڑے وسیع ہیں اور اس کا ہر حکم حکمت پر مبنی ہوتا ہے۔

آيت 14:   يَا أَيُّهَا الَّذِينَ آمَنُوا إِنَّ مِنْ أَزْوَاجِكُمْ وَأَوْلَادِكُمْ عَدُوًّا لَكُمْ فَاحْذَرُوهُمْ:  «اے ايمان كے دعوے دارو! تمهارى بيويوں اور تمهارى اولاد ميں سے بعض تمهارے دشمن هيں، سو ان سے بچ كر رهو».

يه بهت مشكل اور نازك معامله هے. گذشته سورت ميں رسول الله صلى الله عليه وسلم كو منافقين كى عداوت سے بھى انهى الفاظ ميں خبردار كيا گيا تھا: ﴿هُمُ الْعَدُوُّ فَاحْذَرْهُمْ﴾ {المنافقون: 4} كه يه لوگ تمهارے دشمن هيں، ان سے بچ كر رهيے! جس طرح منافقين كى دشمنى تمهارے ليے نقصان ده هے، اسى طرح تمهارے بيوى بچوں كى محبت بھى تمهيں نقصان پهنچا سكتى هے. نقصان بے شك كسى كى دشمنى كى وجه سے هو يا محبت كى وجه سے، نقصان هى هے، اور جو كوئى بھى آپ كو نقصان پهنچانے كے درپے هو وه ظاهر هے آپ كا دشمن هے. بيوى كى بے جا فرمائشيں اور بچوں كى حد سے بڑھى هوئى ضروريات اگر حلال كى كمائى سے پورى نهيں هوں گى تو انسان كيا كرے گا؟ ظاهر هے حرام ميں منه مارے گا. اور اگر كوئى يه نهيں كرے گا تو ڈالر اور پيٹرو ڈالر كمانے كے چكر ميں ملك سے باهر چلا جائے گا. پيچھے سے بيوى بچے كيا كرتے هيں؟ بوڑھے والدين كس حال ميں هيں؟ انهيں بيمارى كى حالت ميں ڈاكٹر كے پاس كون لے جائے گا؟ اس كى بلا جانے! اس كى اپنى مجبورى هے، مكان بنانا هے، بچوں كو اعلى تعليم دلوانى هے، ان كى شادياں كرنى هيں اور اس سب كچھ كے ليے سرمايه چاهيے. اور ظاهر هے سرمايه گھر بيٹھے تو نهيں ملتا، نه هى حلال كى كمائى سے ملتا هے.

اگر كسى كو الله تعالى نے دين كى سمجھ اور آخرت كى فكر عطا كى هے اور وه حرام سے بچتے هوئے روكھى سوكھى كھا كر گزاره كرنا چاهتا هے تو اسے صبح شام بيوى كے طعنے چين لينے نهيں ديتے كه تمهارا دماغ خراب هو گيا هے، تمهيں بچوں كے مستقبل كى فكر بھى نهيں. ذرا همسائے سے هى سبق حاصل كر ليتے، كيا وه مسلمان نهيں هيں؟ وه تم سے زياده نمازيں پڑھتے هيں، ان كى داڑھى بھى تم سے لمبى هے، مگر وه دين كے ساتھ ساتھ دنيا كو بھى نبھا رهے هيں. ذرا ديكھو ان كے بيوى بچے كيسے عيش كر رهے هيں اور كون نهيں جانتا كه يه سب كچھ اوپر كى كمائى سے هو رها هے. اب كيا تم ان سے بھى بڑے ديندار هو كه جو سب كچھ ان كے ليے حلال هے تم اسے اپنے اوپر خواه مخواه حرام كر كے بيٹھ گئے هو؟ وغيره وغيره.

آج همارے هاں كے روايتى مسلمانوں كو تو بيوى بچوں كى دشمنى والى يه بات سمجھ ميں نهيں آئے گى، ليكن اگر كوئى بنده مؤمن الله تعالى كى توفيق سے كسى انقلابى تحريك كے كاركن كى حيثيت سے اقامتِ دين كى جدوجهد ميں مصروف هے تو اس پر يه حقيقت بهت جلد واضح هو جائے گى كه اس راستے ميں بيوى بچوں كى محبت كس طرح پاؤں كى زنجير بنتى هے. يه معامله چونكه بهت نازك اور حساس هے اس ليے اس سخت حكم كے بعد اگلے جملے ميں اس ضمن ميں نرمى اختيار كرنے كى هدايت بھى كى جا رهى هے. قوانين اور احكام كا يه توازن كلامِ الهى كا خاص معجزه هے اور اس اعتبار سے يه آيت اعجازِ قرآن كى بهت بڑى مثال هے. ايك طرف متنبه بھى كر ديا كه تمهيں اپنے اهل وعيال كے معاملے ميں سانپ كى طرح هوشيار رهنے كى ضرورت هے. ايسا نه هو كه بيوى اور اولاد كى محبت تمهيں كسى غلط راستے پر ڈال دے. ليكن اگلے جملے ميں عفو ودرگزر كا حكم بھى دے ديا كه تم اپنے مؤقف پر قائم رهتے هوئے اپنے اهل وعيال كے معاملات كو نرمى اور حكمت سے نپٹاؤ. ايسا نه هو كه تمهارا گھر صبح وشام ميدانِ جنگ كا نقشه پيش كرنے لگے:

وَإِنْ تَعْفُوا وَتَصْفَحُوا وَتَغْفِرُوا فَإِنَّ اللَّهَ غَفُورٌ رَحِيمٌ:  «اور اگر تم معاف كر ديا كرو اور چشم پوشى سے كام لو اور بخش ديا كرو تو الله بهت بخشنے والا، نهايت مهربان هے».

          اگر تم چاهتے هو كه الله تعالى تمهارے ساتھ بھى عفو ودرگزر كا معامله فرمائے تو تم بھى اپنے اهل وعيال كے ساتھ ايسا هى رويه اختيار كرو. سورة النور كى اس آيت ميں بھى بالكل يهى اسلوب نظر آتا هے: ﴿وَلْيَعْفُوا وَلْيَصْفَحُوا أَلَا تُحِبُّونَ أَنْ يَغْفِرَ اللَّهُ لَكُمْ وَاللَّهُ غَفُورٌ رَحِيمٌ﴾    «اور چاهيے كه وه معاف كر ديں اور درگزر سے كام ليں. كيا تم نهيں چاهتے كه الله تمهيں معاف كرے؟ اور الله بهت بخشنے والا، نهايت مهربان هے». يه آيت واقعه افك كے حوالے سے حضرت ابو بكر صديق رضى الله عنه كے بارے ميں نازل هوئى تھى. آپ نے اپنے ايك نادار رشته دار (حضرت مسطح رضى الله عنه) كى كفالت كا ذمه لے ركھا تھا، ليكن جب آپ كو معلوم هوا كه حضرت عائشه رضى الله عنها پر كيچڑ اچھالنے ميں اس كا بھى حصه تھا تو آپ رضى الله عنه نے اس كى مدد سے هاتھ روك ليا. اس پر يه آيت نازل هوئى كه اگر تم خود الله سے معافى كے خواستگار هو تو تم اسے معاف كر دو. بهرحال ان دونوں آيات سے يهى ثابت هوتا هے كه نه صرف الله تعالى خود بهت معاف اور درگزر كرنے والا هے بلكه اپنے بندوں سے بھى وه ايسے هى رويّے كو پسند كرتا هے.

          زير مطالعه آيات ميں اب تك ايمان كے چار ثمرات كا ذكر هوا هے. ان ميں سے پهلے تين كا تعلق تو ايك فرد كى انفرادى زندگى سے هے، جبكه چوتھا ثمره فرد كے گرد بننے والى اجتماعيت كے پهلے حلقے يعنى اس كے افراد خانه سے متعلق هے. انفرادى سطح كے تين ثمرات كو ميں نے بنده مؤمن كى شخصيت كے چمن ميں كھلنے والے خوبصورت پھولوں سے تشبيه دى هے. ان ميں سے دو پھول تو وه هيں جو اس كے دل كے اندر كھلتے هيں اور باهر سے هر كسى كو نظر نهيں آتے، يعنى خوئے تسليم ورضا اور توكل على الله. جبكه تيسرا پھول الله اور اس كے رسول صلى الله عليه وسلم كى اطاعت كا پھول هے، جو شخصيت كے خارج ميں كھلتا هے. ظاهر هے  ﴿أَطِيعُوا اللَّهَ وَأَطِيعُوا الرَّسُولَ﴾  كے حكم ميں تو پورے كے پورے دين كا احاطه هو جاتا هے. اس ليے معاشرے ميں رهتے هوئے يه پھول بجا طور پر بنده مؤمن كى شخصيت كا طره امتياز بنتا هے.

ايمان كے چوتھے ثمرے كا تعلق بنده مؤمن كى عائلى زندگى سے هے. اس حوالے سے آيت زير مطالعه هميں انتهائى متوازن اور معتدل رويے كا شعور عطا كرتى هے. اس نصيحت پر عمل كرتے هوئے هميں اهل وعيال كى طبعى محبتوں كے منفى اثرات سے هوشيار بھى رهنا هے اور ساتھ هى ساتھ عفو ودرگزر كى حكمت عملى اپناتے هوئے گھر كى فضا كو محاذ آرائى اور نفرت كے تكدر سے محفوظ ركھنے كى كوشش بھى كرتے رهنا هے. اب اسى حوالے سے دوسرى اصولى اور انتهائى اهم بات:

آيت 6:  أَسْكِنُوهُنَّ مِنْ حَيْثُ سَكَنْتُمْ مِنْ وُجْدِكُمْ:  «اور ان عورتوں كو وهيں ركھو جهاں تم خود رهتے هو اپنى حيثيت كے مطابق»

پهلى آيت ميں واضح حكم آ چكا هے: ﴿لَا تُخْرِجُوهُنَّ مِنْ بُيُوتِهِنَّ وَلَا يَخْرُجْنَ﴾ كه طلاق كے بعد انهيں فورى طور پر گھر سے مت نكالو اور نه هى وه ازخود نكليں. اسى حوالے سے اس آيت ميں مزيد وضاحت كى جا رهى هے كه عدت كے دوران مطلقه خاتون كو بدستور ويسى هى رهائش فراهم كى جائے جيسى كه تمهارے اپنے استعمال ميں هے. ايسا نه هو كه اسے تو گھر سے نه نكالو ليكن كسى ملازمه كى كوٹھڑى ميں ڈال دو.

وَلَا تُضَارُّوهُنَّ لِتُضَيِّقُوا عَلَيْهِنَّ:  «اور انهيں كوئى تكليف نه پهنچاؤ انهيں تنگ كرنے كے ليے».

گھر سے نكالنے كا ايك طريقه يه بھى هو سكتا هے كه حيلے بهانے سے اسے بار بار اس قدر ستايا جائے كه وه تنگ آكر خود هى گھر سے نكل جائے. چنانچه بدنيتى پر مبنى يه طريقه استعمال كرنے سے بھى منع كر ديا گيا.

وَإِنْ كُنَّ أُولَاتِ حَمْلٍ فَأَنْفِقُوا عَلَيْهِنَّ حَتَّى يَضَعْنَ حَمْلَهُنَّ:  «اور اگر وه حامله هوں تو ان پر خرچ كرتے رهو يهاں تك كه وه حمل سے فارغ هو جائيں».

دين اسلام همدردى اور غم گسارى كا دين هے اور اس كا ايك ثبوت مندرجه بالا حكم هے. حامله عورت كو انتهائى نگهداشت كى ضرورت هوتى هے، اس ليے يهاں خصوصى طور پر حكم كيا گيا كه طلاق دينے كے بعد بھى حامله عورت كا خيال ركھتے هوئے اس كى تمام ضرورتوں كو پورا كرتے رهو.

فَإِنْ أَرْضَعْنَ لَكُمْ فَآتُوهُنَّ أُجُورَهُنَّ:  «پھر اگر وه تمهارے ليے (تمهارے بچے كو) دودھ پلائيں تو انهيں ان كا معاوضه ادا كرو».

وَأْتَمِرُوا بَيْنَكُمْ بِمَعْرُوفٍ:  «اور آپس ميں مشوره كر ليا كرو بھلے طريقے سے».

يعنى دودھ پلانے كى اجرت اور عدت سے متعلق معاملات مناسب طور سے آپس كے مشورے سے طے كيے جانے چاهييں. اگر طلاق كے بعد وه دونوں مياں بيوى نه رهے تو كيا هوا؟ آخر دونوں انسان تو هيں. چنانچه انهيں چاهيے كه تمام معاملات باهمى گفت وشنيد سے طے كريں اور ايك دوسرے سے ايسا رويّه اختيار كريں جيسا كه ايك شريف انسان كو دوسرے شريف انسان سے اختيار كرنا چاهيے.

وَإِنْ تَعَاسَرْتُمْ:  «اور اگر تم ايك دوسرے سے تنگى محسوس كرو»

مثلًا خاتون ضد ميں آ كر دودھ پلانے سے انكار كر دے يا اس قدر معاوضه مانگے جو مرد ادا نه كر سكے، يا مرد معاوضه دينے سے انكار كر دے، يا كسى اور طريقے سے ايك فريق دوسرے پر زيادتى كرنے كى ٹھان لے:

فَسَتُرْضِعُ لَهُ أُخْرَى:  «تو پھر كوئى اور عورت اس كے ليے دودھ پلائے گى».

آيت 7:  لِيُنْفِقْ ذُو سَعَةٍ مِنْ سَعَتِهِ:  «چاهيے كه خرچ كرے وسعت والا اپنى وسعت كے مطابق».

وَمَنْ قُدِرَ عَلَيْهِ رِزْقُهُ فَلْيُنْفِقْ مِمَّا آتَاهُ اللَّهُ:  «اور جس پر اس كا رزق تنگ كر ديا گيا هے وه خرچ كرے اس ميں سے جو الله نے اس كو ديا هے».

لَا يُكَلِّفُ اللَّهُ نَفْسًا إِلَّا مَا آتَاهَا:  «الله كسى جان كو ذمه دار نهيں ٹھهراتا مگر اُسى قدر جو اُس نے اسے دے ركھا هے».

يعنى عدت كے دوران مطلقه كى رهائش، حمل كے دوران اس كا نان نفقه، رضاعت كى اجرت وغيره كے معيار كا انحصار مرد كى مالى حيثيت كے مطابق هونا چاهيے. اگر كشادگى هے تو مطلقه پر بھى اسے اسى انداز سے خرچ كرنا چاهيے اور اگر تنگ دستى كى كيفيت هے تو ظاهر هے وه اسى حد تك مكلف هے جس حد تك اس كى استطاعت هے. الله تعالى هر كسى كے حالات سے باخبر هے.

سَيَجْعَلُ اللَّهُ بَعْدَ عُسْرٍ يُسْرًا:  «عنقريب الله تنگى كے بعد آسانى بھى پيدا كر دے گا».