سوائے الله تعالى كے اور كسى سے دعا نه مانگى جائے

آیت 40:  قُلْ اَرءَیْتَـکُمْ اِنْ اَتٰـٹکُمْ عَذَابُ اللّٰہِ اَوْ اَتَتْکُمُ السَّاعَۃُ اَغَیْرَ اللّٰہِ تَدْعُوْنَ اِنْ کُنْتُمْ صٰدِقِیْنَ:   ’’ان سے کہیے،  ذرا غور کرو،  اگر تم پر (کسی وقت) اللہ کا عذاب آ جائے یا تم پر قیامت آ جائے تو (اُس وقت) کیا تم سوائے اللہ کے کسی اور کو پکارو گے؟ اگر تم سچے ہو (تو ذرا جواب دو) !،،

            یہ بھی متجسسانہ  (searching) انداز میں  ان سے سوال کیا جا رہا ہے۔ یہ ان کا معمول بھی تھا اور مشاہدہ بھی ،  کہ جب بھی کبھی کوئی مصیبت آتی ، سمندر میں  سفر کے دوران کبھی طوفان آ جاتا ،  موت سامنے نظر آنے لگتی تو پھر لات ،  منات ، عزیٰ ،  ہُبل وغیرہ میں  سے کوئی بھی دوسراخدا انہیں  یاد نہ رہتا۔  ایسے مشکل وقت میں  وہ صرف اللہ ہی کو پکارتے تھے۔ چنانچہ خود ان سے سوال کیا جا رہا ہے کہ ہر شخص ذرا اپنے دل سے پوچھے ، کہ آخر مصیبت کے وقت ہمیں  ایک اللہ ہی کیوں  یاد آتا ہے؟ گویا ایک اللہ کو ماننا اور اس پر ایمان رکھنا انسان کی فطرت کا تقاضا ہے۔  کسی شخص میں  شرافت کی کچھ بھی رمق موجود ہو تو اس طرح کے سوالات کے جواب میں اس کا دل ضرور گواہی دیتا ہے کہ ہاں  بات تو ٹھیک ہے،  ایسے مواقع پر ہماری اندرونی کیفیت بالکل ایسی ہی ہوتی ہے اور بے اختیار ’’اللہ،،  ہی کا نام زبان پر آتا ہے۔

آیت 41:  بَلْ اِیَّاہُ تَدْعُوْنَ فَیَکْشِفُ مَا تَدْعُوْنَ اِلَـیْہِ اِنْ شَآءَ وَتَنْسَوْنَ مَا تُشْرِکُوْنَ:   ’’بلکہ (مصیبت کی گھڑی میں)  تم اسی کو پکارتے ہو،  پھر اگر وہ چاہتا ہے تو جس تکلیف کے لیے تم اسے پکارتے ہو وہ دُور کر دیتا ہے او ر (ایسے مواقع پر) تم بھول جاتے ہو اُن کو جن کو تم شریک ٹھہراتے ہو۔،، 

آیت 29:  قُلْ اَمَرَ رَبِّیْ بِالْقِسْطِ وَاَقِیْمُوْا وُجُوْہَکُمْ عِنْدَ کُلِّ مَسْجِدٍ:  ’’آپ کہیے کہ میرے رب نے تو حکم دیا ہے انصاف (اور عدل و توازن) کا‘ اور اپنے رُخ سیدھے کر لیا کرو ہر نماز کے وقت‘‘

            مسجد اسم ِظرف ہے اور یہ ظرفِ زمان بھی ہے اور ظرفِ مکان بھی۔ بطور ظرفِ مکان سجدے کی جگہ مسجد ہے اور بطور ظرفِ زمان سجدے کا وقت مسجد ہے۔

            وَّادْعُوْہُ مُخْلِصِیْنَ لَہُ الدِّیْنَ:  ’’اور اُسی کو پکارا کرو اُسی کے لیے اپنی اطاعت کو خالص کرتے ہوئے۔‘‘

            یعنی اللہ کو پکارنے، اس سے دعا کرنے کی ایک شرط ہے اور وہ یہ کہ اس کی اطاعت کو اپنے اوپر لازم کیا جائے۔ جیسا کہ سورۃ البقرۃ آیت: 186 میں روزے کے احکام اور حکمتوں کو بیان کرنے کے بعد فرمایا: اُجِیْبُ دَعْوَۃَ الدَّاعِ اِذَا دَعَانِ فَلْیَسْتَجِیْبُوْا لِیْ.  کہ میں تو ہر پکارنے والے کی پکار سنتا ہوں، اُس کی دعا کو قبول کرتا ہوں، لیکن انہیں بھی تو چاہیے کہ میرا کہنا مانیں---- اور یہ کہنا ماننا یا اطاعت جزوی طور پر قابل قبول نہیں، بلکہ اس کے لیے «اُدْخُلُوْا فِی السِّلْمِ کَآفَّۃً»  (البقرۃ: 208) کا معیار سامنے رکھنا ہو گا‘ یعنی اللہ تعالیٰ کی اطاعت میں پورے پورے داخل ہونا ہو گا۔ لہٰذا اس حوالے سے یہاں فرمایا گیا کہ اپنی اطاعت کو اُسی کے لیے خالص کرتے ہوئے اسے پکارو۔ یعنی اس کی اطاعت کے دائرے کے اندر کلی طور پر داخل ہوتے ہوئے اس سے دعا کرو۔ یہاں یہ نکتہ بھی قابل توجہ ہے کہ انسان کو اپنی زندگی میں بے شمار اطاعتوں سے سابقہ پڑتا ہے، والدین کی اطاعت‘ اساتذہ کی اطاعت‘ اولوالامر کی اطاعت وغیرہ۔ تو اس میں بنیادی طور پر جو اصول کار فرما ہے وہ یہ ہے کہ ’’لَا طَاعَۃَ لِمَخْلُـوْقٍ فِیْ مَعْصِیَۃِ الْخَالِقِ‘‘۔ یعنی مخلوق میں سے کسی کی ایسی اطاعت نہیں کی جائے گی جس میں خالق حقیقی کی معصیت لازم آتی ہو۔ اللہ کی اطاعت سب سے اوپر اور سب سے برتر ہے۔ اس کی اطاعت کے دائرے کے اندر رہتے ہوئے باقی سب اطاعتیں ہو سکتی ہیں، مگر جہاں کسی کی اطاعت میں اللہ کے کسی حکم کی خلاف ورزی ہوتی ہو توایسی اطاعت نا قابل قبول اور حرام ہو گی۔

            کَمَا بَدَاَکُمْ تَعُوْدُوْنَ:  ’’جیسے اُس نے تمہیں پہلے پیدا کیا تھا اسی طرح تم دوبارہ بھی پیدا ہو جاؤ گے۔‘‘ 

 آیت ۱۰۶:  وَلاَ تَدْعُ مِنْ دُوْنِ اللّٰہِ مَا لاَ یَنْفَعُکَ وَلاَ یَضُرُّکَ فَاِنْ فَعَلْتَ فَاِنَّکَ اِذًا مِّنَ الظّٰلِمِیْنَ:  «اور مت پکاریئے اللہ کے سوا اس کو جو نہ تمہیں نفع دے سکے نہ نقصان، اور اگر (بالفرض) آپ نے ایسا کیا تو پھرآپ بھی ظالموں میں سے ہو جائیں گے۔» 

 آیت ۱۴:  لَہ دَعْوَۃُ الْحَقِّ: «اُسی کا پکارنا حق ہے۔»

            یعنی اللہ ہی ایک ہستی ہے جس کو پکارنا، جس سے دعا کرنا برحق ہے، کیونکہ ایک وہی ہے جو تمہاری پکار کو سنتا ہے، تمہاری حاجت کو جانتا ہے، تمہاری حاجت روائی کرنے پر قادر ہے، اس لیے اس کو پکارنا حق بھی ہے اور سودمند بھی۔ اسے چھوڑ کر کسی اور کو پکارو گے، چاہے وہ کوئی فرشتہ ہو، ولی ہو یا نبی، کوئی تمہاری پکار اور فریاد کو نہیں سنے گا، اور جیسا کہ اگلی آیت میں فرمایا گیا ہے، تمہاری ہر ایسی پکار اکارت جائے گی۔ اس فقرے کا دوسرا مفہوم یہ بھی ہے کہ «اُسی کی دعوت حق ہے»۔ یعنی جس چیز کی دعوت وہ دے رہا ہے، جس راستے کی طرف وہ بلا رہا ہے وہی حق ہے۔

             وَالَّذِیْنَ یَدْعُوْنَ مِنْ دُوْنِہ لاَ یَسْتَجِیْبُوْنَ لَہُمْ بِشَیْئٍ: «اور جن کو یہ لوگ پکار رہے ہیں اُس کے سوا، وہ ان کی دعا کو کسی طرح بھی قبول نہیں کرتے»

            وہ ان کی کوئی بھی داد رسی نہیں کر سکتے۔

             اِلاَّ کَبَاسِطِ کَفَّیْہِ اِلَی الْمَآءِ لِیَبْلُغَ فَاہُ وَمَا ہُوَ بِبَالِغِہ: «مگر جیسے کوئی پھیلا دے اپنے دونوں ہاتھ پانی کی طرف کہ وہ اُس کے منہ تک پہنچ جائے، حالانکہ وہ اس (کے منہ) تک پہنچنے والا نہیں ہے۔»

            جیسے اپنے ہاتھ پھیلا کر پانی کو اپنے منہ کی طرف بلانا ایک کارِ عبث ہے، اسی طرح کسی غیر اللہ کو پکارنا، اُس کے سامنے گڑ گڑانا اور اس سے داد رسی کی امید رکھنا بھی کارِ عبث ہے۔

             وَمَا دُعَآءُ الْکٰفِرِیْنَ اِلاَّ فِیْ ضَلٰلٍ : «اور کافروں کی دعا تو بالکل بے کار ہے۔»

            یہ لوگ جو اللہ کے علاوہ کسی کو پکارتے ہیں ان کی یہ پکار لا حاصل ہے، ایک تیر بے ہدف اور صدا بہ صحرا ہے۔ 

آیت ۶۸   وَالَّذِیْنَ لَا یَدْعُوْنَ مَعَ اللّٰہِ اِلٰہًا اٰخَرَ: ’’اور وہ لوگ جو نہیں پکارتے اللہ کے ساتھ کسی اور معبود کو‘‘

      وَلَا یَقْتُلُوْنَ النَّفْسَ الَّتِیْ حَرَّمَ اللّٰہُ اِلَّا بِالْحَقِّ وَلَا یَزْنُوْنَ: ’’اور نہ ہی قتل کرتے ہیں کسی جان کو جس کو اللہ نے محترم ٹھہرایا ہے مگر حق کے ساتھ، اور نہ ہی کبھی وہ زنا کرتے ہیں‘‘

      حق سے مراد یہاں وہ قانونی صورتیں ہیں جن صورتوں میں کسی انسان کی جان لی جا سکتی ہے، یعنی قتل کے بدلے قتل، مرتدکا قتل، حربی کافر کا قتل اور شادی شدہ زانی کا رجم۔

      اس آیت میں تین کبیرہ گناہوں کا ذکر ہوا ہے : شرک، قتل ِنا حق اور زنا۔ شرک کے بارے میں تو اللہ تعالیٰ نے قرآن میں دو دفعہ فرما دیا کہ مشرک کو ہر گز معاف نہیں کیا جائے گا۔ اور قتل ایسا بھیانک گناہ اور جرم ہے جس سے تمدن کی جڑ کٹتی ہے، جبکہ زنا سے معاشرہ گندگی کا ڈھیر بن جاتا ہے۔ اللہ تعالیٰ نے سورۃ النساء میں ایسے کبیرہ گناہوں سے بچنے والوں کے لیے چھوٹے گناہوں سے معافی کی خوشخبری سنائی ہے: (اِنْ تَجْتَنِبُوْا کَبٰٓئِرَ مَا تُنْہَوْنَ عَنْہُ نُکَفِّرْ عَنْکُمْ سَیِّاٰتِکُمْ وَنُدْخِلْکُمْ مُّدْخَلاً کَرِیْمًا) (النساء) ’’اگر تم لوگ بچتے رہو کبیرہ گناہوں سے جن سے تمہیں منع کیا گیا ہے تو ہم تمہارے چھوٹے گناہ بخش دیں گے اور تمہیں عزت والی جگہ داخل کریں گے۔‘‘

      وَمَنْ یَّفْعَلْ ذٰلِکَ یَلْقَ اَثَامًا: ’’اور جو کوئی بھی یہ کام کرے گا وہ اس کی سزا کو حاصل کر کے رہے گا۔‘‘

آیت ۱۴:   فَادْعُوا اللّٰہَ مُخْلِصِیْنَ لَہُ الدِّیْنَ وَلَوْ کَرِہَ الْکٰفِرُوْنَ:  ’’پس تم پکارو اللہ کو اُسی کے لیے اطاعت کو خالص کرتے ہوئے‘ خواہ یہ کافروں کو کتنا ہی ناگوار ہو۔‘‘

        مُخْلِصِیْنَ لَہُ الدِّیْنَ کے یہ کلمات سورۃ الزمر اور اس سورت کے درمیان مماثلت اور مشابہت کی علامت ہیں۔ دونوں سورتوں میں یہ کلمات بار بار آئے ہیں۔ ظاہر ہے توحید خالص کا عملی مظاہرہ اللہ کے نافرمانوں اور طاغوتی کارندوں کو تو کبھی بھی اچھا نہیں لگے گا۔ وہ تو چاہیں گے کہ ’’اللہ کا حصہ اللہ کو دیا جائے اور قیصر کا حصہ قیصر کو!‘‘ یعنی توحید کا ذکر بھی ہوتا رہے اور کاروبارِ شرک بھی چلتا رہے۔ کبھی کبھارکوئی حکم اللہ کا بھی مان لیا جائے‘ مگر ساتھ ہی ساتھ دوسرے خدائوں اور حاجت روائوں کو بھی خوش رکھا جائے۔