الله تعالى كے سوا اور كوئی معبود نہیں ہے

  آیت 163:    وَاِلٰــہُکُمْ اِلٰـــہٌ وَّاحِدٌ:   اور تمہارا الٰہ ایک ہی الٰہ ہے۔   

             لَآ اِلٰــہَ اِلاَّ ہُوَ الرَّحْمٰنُ الرَّحِیْمُ:   اس کے سوا کوئی الٰہ نہیں ہے،  وہ رحمن ہے،  رحیم ہے۔   

            رحمن اور رحیم کی وضاحت سورۃ الفاتحہ میں گزر چکی ہے۔

 اب وہ آیت آ رہی ہے جو ازروئے فرمانِ نبوی  قرآن حکیم کی عظیم ترین آیت ہے‘ یعنی «آیۃ الکرسی»۔  اس کا نام بھی معروف ہے۔  میں نے آپ کو سورۃ البقرۃ میں آنے والے حکمت کے بڑے بڑے موتی اور بڑے بڑے پھول گنوائے ہیں‘ مثلاً آیۃ الآیات‘ آیۃ البر‘ آیۃ الاختلاف‘ اور اب یہ آیۃ الکرسی ہے جو توحید کے عظیم ترین خزانوں میں سے ہے۔ رسول اللہ  نے اسے تمام آیاتِ قرآنی کی سردار قرار دیا ہے۔  حضرت ابوہریرہ سے روایت ہے کہ رسول اللہ  نے ارشاد فرمایا:

((لِکُلِّ شَیْئٍ سَنَامٌ وَاِنَّ سَنَامَ الْقُرْآنِ سُوْرَۃُ الْبَقَرَۃِ ‘ وَفِیْھَا آیَۃٌ ھِیَ سَیِّدَۃُ آيِ الْقُرْآنِ‘ ھِیَ آیَۃُ الْکُرْسِیِّ))

«ہر شے کی ایک چوٹی ہوتی ہے اور یقینا قرآن حکیم کی چوٹی سورۃ البقرۃ ہے‘ اس میں ایک آیت ہے جو آیاتِ قرآنی کی سردار ہے‘ یہ آیۃ الکرسی ہے۔ »

            جس طرح آیۃ البر اور سورۃ العصر میں ایک نسبت ہے کہ اللہ تعالیٰ نے ہدایت اور نجات کی ساری کی ساری شرائط ایک چھوٹی سی سورۃ میں جمع کر دیں:  وَالْعَصْرِ   اِنَّ الْاِنْسَانَ لَفِیْ خُسْرٍ  اِلَّا الَّذِیْنَ اٰمَنُوْا وَعَمِلُوا الصّٰلِحٰتِ وَتَوَاصَوْا بِالْحَقِِّ  وَتَوَاصَوْا بِالصَّبْرِ .  لیکن اس کی تفصیل ایک آیت میں بیان ہوئی ہے اور وہ آیۃ البر ہے۔  چنانچہ ہم نے مطالعۂ قرآن حکیم کا جو منتخب نصاب مرتب ّکیا ہے اُس میں پہلا درس سورۃ العصر کا ہے اور دوسرا آیۃ البر کا ہے۔  یہی نسبت آیۃ الکرسی اور سورۃ الاخلاص میں ہے۔  سورۃ العصر ایک مختصر سی سورت ہے جبکہ آیۃ البر ایک طویل آیت ہے۔  اسی طرح سورۃ الاخلاص چار آیات پر مشتمل ایک چھوٹی سی سورت ہے اور یہ آیۃ الکرسی ایک طویل آیت ہے۔  سورۃ الاخلاص توحید کا عظیم ترین خزانہ ہے اور توحید کے موضوع پر قرآن حکیم کی جامع ترین سورت ہے‘ چنانچہ رسول اللہ  نے اسے ُثلث ِقرآن قرار دیا ہے‘ جبکہ توحید اور خاص طور پر توحید فی الصفات کے موضوع پر قرآن کریم کی عظیم ترین آیت یہ آیۃ الکرسی ہے۔  

 آیت 255:    اَللّٰہُ لَآ اِلٰــہَ اِلاَّ ہُوَ :   «اللہ وہ معبود ِبرحق ہے جس کے سوا کوئی الٰہ نہیں۔ »

             اَلْحَیُّ الْقَیُّوْمُ :   «وہ زندہ ہے‘ سب کا قائم رکھنے والا ہے۔ »

            وہ از خود اور باخود زندہ ہے۔  اس کی زندگی مستعار نہیں ہے۔  اس کی زندگی ہماری زندگی کی مانند نہیں ہے‘ جس کے بارے میں بہادر شاہ ظفر نے کہا تھا:  

عمر دراز مانگ کے لائے تھے چار دن

دو آرزو میں کٹ گئے    دو انتظار میں!

اللہ تعالیٰ کی زندگی «حیاتِ مستعار» نہیں ہے ‘ وہ کسی کی دی ہوئی نہیں ہے۔  اس کی زندگی میں کوئی ضعف ‘ کوئی کمزوری اور کوئی احتیاج نہیں ہے۔  وہ خود اپنی جگہ زندہ و جاوید ہستی ہے اور باقی ہر شے کا وجود اس کے حکم سے قائم ہے۔  وہ «اَلْقَیُّوْمُ» ہے۔  اُس کے اِذن کے بغیر کوئی شے قائم نہیں ہے۔  سورۃ الاخلاص میں اللہ تعالیٰ کے لیے دو الفاظ «اَلْاَحَدُ» اور «اَلصَّمَدُ» آئے ہیں۔  وہ اپنی جگہ «اَلْاَحَدُ» ہے لیکن باقی پوری کائنات کے لیے «اَلصَّمَدُ» ہے۔  اسی طرح وہ از خود «اَلْحَیُّ» ہے اور باقی پوری کائنات کے لیے «اَلْقَیُّوْمُ » ہے۔

             لاَ تَاْخُذُہ سِنَـۃٌ وَّلاَ نَوْمٌ :   «نہ اس پر اونگھ غالب آتی ہے نہ نیند۔ »

             لَہ مَا فِی السَّمٰوٰتِ وَمَا فِی الْاَرْضِ :   «جو کچھ آسمانوں اور زمین میںہے سب اُسی کا ہے۔ »

            ہر شے کی ملکیت ِتامہ اور ملکیتِ حقیقی اُسی کی ہے۔  

             مَنْ ذَا الَّذِیْ یَشْفَعُ عِنْدَہ اِلاَّ بِاِذْنِہ :   «کون ہے وہ جو شفاعت کر سکے اس کے پاس کسی کی مگر اس کی اجازت سے!»

            سورۃ البقرۃ میں قبل ازیں تین مرتبہ قیامت کے روز کسی شفاعت کا دو ٹوک انداز میں انکار (categorical denial) کیا گیا ہے کہ کوئی شفاعت نہیں! یہاں بھی بہت ہی جلالی انداز اختیار کیا گیا ہے:  مَنْ ذَا الَّذِیْ یَشْفَعُ عِنْدَہٗ .  یعنی کس کی یہ حیثیت ہے ‘ کس کا یہ مقام ہے‘ کس کو یہ اختیار حاصل ہے کہ وہ اپنی حیثیت کی بنیاد پر اللہ کے حضور کسی کی شفاعت کر سکے؟  اِلاَّ بِاِذْنِہ :  ہاں‘ جس کے لیے اللہ اجازت دے دے! یہاں پہلی مرتبہ استثناء کے ساتھ شفاعت کا ذکر آیا ہے‘ ورنہ سورۃ البقرۃ کے چھٹے رکوع کی دوسری آیت میں ہم الفاظ پڑھ چکے ہیں:  وَّلاَ یُقْبَلُ مِنْہَا شَفَاعَۃٌ .  «اور نہ (اُس روز) کسی کی طرف سے کوئی شفاعت قبول کی جائے گی»۔  اسی طرح پندرہویں رکوع کی دوسری آیت میں الفاظ آئے ہیں:  وَّلاَ تَنْفَعُہَا شَفَاعَۃٌ.  «اور نہ اُس کو کسی کی شفاعت ہی فائدہ دے گی»۔ اور اب اس رکوع کی پہلی آیت میں آ چکا ہے: وََلاَ  شَفَاعَۃٌ .  «اور نہ کوئی شفاعت مفید ہو گی»۔ لیکن یہاں ایک استثناء بیان کیا جا رہا ہے کہ جس کو اللہ کی طرف سے اِذنِ شفاعت حاصل ہو گا وہ اُس کے حق میں شفاعت کر سکے گا جس کے لیے اِذن ہوگا۔ یہ ذرا باریک مسئلہ ہے کہ شفاعت ِحقہ کیا ہے اور شفاعت ِباطلہ کیا ہے۔  دورئہ ترجمہ قرآن کے دوران اس پر تفصیل کے ساتھ بحث نہیں کی جاسکتی ۔  اس پر میں اپنے تفصیلی درس ریکارڈ کرا چکا ہوں۔    

             یَعْلَمُ مَا بَیْنَ اَیْدِیْہِمْ وَمَا خَلْفَہُمْ :   «وہ جانتا ہے جو کچھ ان کے سامنے ہے اور جو کچھ ان کے پیچھے ہے۔ »

            عام طور پر دنیا میں ہم کسی کی سفارش کرتے ہیں تو کہتے ہیں کہ بھئی میں اس شخص کو بہتر جانتا ہوں‘ اصل میں یہ جیسا کچھ نظر آتا ہے ویسا نہیں ہے‘ اس کے بارے میں جو معلومات آپ تک پہنچی ہیں وہ مبنی بر حقیقت نہیں ہیں‘ اصل حقائق کچھ اور ہیں‘ وہ میں آپ کو بتاتا ہوں۔  یہ بات اللہ کے سامنے کون کہہ سکتا ہے؟ جبکہ اللہ تو جانتا ہے جو کچھ ان کے سامنے ہے اور جو کچھ اُن کے پیچھے ہے۔  

             وَلاَ یُحِیْطُوْنَ بِشَیْئٍ مِّنْ عِلْمِہ اِلاَّ بِمَا شَآءَ :   «اور وہ احاطہ نہیں کر سکتے اللہ کے علم میں سے کسی شے کا بھی سوائے اس کے جو اللہ چاہے۔ »

            باقی ہر ایک کے پاس جو علم ہے وہ اللہ کا دیا ہوا‘ عطائی علم ہے۔  بڑے سے بڑے ولی‘ بڑے سے بڑے رسول اور بڑے سے بڑے فرشتے کا علم بھی محدود ہے۔  فرشتوں کا قول:  لَا عِلْمَ لَنَا اِلاَّ مَا عَلَّمْتَنَا .  ہم چوتھے رکوع میں پڑھ آئے ہیں۔  

             وَسِعَ کُرْسِیُّہُ السَّمٰوٰتِ وَالْاَرْضَ :  «اس کی کرسی تمام آسمانوں اور زمین کو محیط ہے۔ »

            یہاں کرسی کے دو مفہوم ہو سکتے ہیں۔  ایک تو یہ کہ اس کا اقتدار‘ اس کی قدرت اور اس کا اختیار (Authority) پوری کائنات کے اوپر حاوی ہے۔  نیز یہ بھی ہو سکتا ہے کہ اللہ تعالیٰ کے اقتدار کی علامت کے طور پر واقعتا کوئی مجسم ّشے بھی ہو جس کو ہم کرسی کہہ سکیں۔  اللہ تعالیٰ کے عرش اور کرسی کے بارے میں یہ دونوں باتیں ذہن میں رکھیں۔  یہ بھی ہو سکتا ہے کہ ان کی کوئی مجسم ّحقیقت ہو جو ہمارے ذہن اور تخیل سے ماورا ہے اور یہ بھی ہو سکتا ہے کہ اس سے استعارہ مراد ہو کہ اس کا اختیار اور اقتدار آسمانوں اور زمین پر چھایا ہوا ہے۔

             وَلاَ یَــــُٔوْدُہ حِفْظُہُمَا :  «اور اس پر گراں نہیں گزرتی ان دونوں کی حفاظت۔ »

            آسمانوں اور زمین کی حفاظت اور اِن کا تھامنا اُس پر ذرا بھی گراں نہیں اور اس سے اس پر کوئی تهکان طاری نہیں ہوتی۔

             وَہُوَ الْعَلِیُّ الْعَظِیْمُ :   «اور وہ بلند و بالا (اور) بڑی عظمت والا ہے۔ »

            یہ آیۃ الکرسی ہے جو تمام آیاتِ قرآنی کی سردار اور توحید الٰہی کا ایک بہت بڑا خزانہ ہے۔  اس کے بعد آنے والی دو آیات بھی حکمت اور فلسفہ ٔدین کے اعتبار سے بڑی عظیم آیات ہیں۔ 

آیت 62:    اِنَّ ہٰذَا لَہُوَ الْقَصَصُ الْحَقُّ:  «یقینا یہی بالکل صحیح سرگزشت ہے۔»

             وَمَا مِنْ اِلٰـہٍ اِلاَّ اللّٰہُ:  «اور نہیں ہے کوئی معبود اللہ کے سوا۔»

             وَاِنَّ اللّٰہَ لَہُوَ الْعَزِیْزُ الْحَکِیْمُ:  «اور یقینا اللہ تعالیٰ ہی زبردست اور کمالِ حکمت والا ہے۔» 

آیت 171:    یٰٓــاَہْلَ الْـکِتٰبِ لاَ تَغْلُوْا فِیْ دِیْنِکُمْ وَلاَ تَقُوْلُوْا عَلَی اللّٰہِ اِلاَّ الْحَقَّ:  ’’اے اہل ِکتاب‘ اپنے دین میں غُلو (مبالغہ) نہ کرو‘ اور اللہ کی طرف کوئی شے منسوب نہ کرو سوائے اس کے جو حق ہو۔‘‘

            تم آپس کے معاملات میں تو جھوٹ بولتے ہی ہو‘ مگر اللہ کے بارے میں جھوٹ گھڑنا‘ جھوٹ بول کر اللہ پر اسے تھوپنا کہ اللہ کا یہ حکم ہے‘  اللہ نے یوں کہا ہے‘  یہ تو وہی بات ہوئی: بازی بازی با ریش ِبا با ہم بازی!

             اِنَّمَا الْمَسِیْحُ عِیْسَی ابْنُ مَرْیَمَ رَسُوْلُ اللّٰہِ: ’’ دیکھو مسیح عیسٰی   ابن ِمریم تو بس اللہ کے رسول تھے‘‘

            وہ اللہ کی طرف سے بھیجے گئے ایک رسول   تھے اور بس! اُلوہیّت میں ان کا کوئی حصّہ نہیں ہے‘  وہ خدا کے بیٹے نہیں ہیں۔

             وَکَلِمَتُہ اَلْقٰہَآ اِلٰی مَرْیَمَ وَرُوْحٌ مِّنْہُ:  ’’اور وہ اُس کا ایک کلمہ تھے‘ جو اُس نے اِلقا کیا مریم  پر اور ایک روح تھے اُس کی طرف سے‘‘

            یعنی حضرت مریم کے رحم میں جو حمل ہوا تھا وہ اللہ کے کلمہ کُن کے طفیل ہوا۔ بچے کی پیدائش کے طبعی عمل میں ایک حصہ باپ کا ہوتا ہے اور ایک ماں کا۔ اب حضرت مسیح  کی ولادت میں ماں کا حصہ تو پورا موجود ہے۔ حضرت مریم  کو حمل ہوا‘ نو مہینے آپ  رحم میں رہے‘ لیکن یہاں باپ والا حصہ بالکل نہیں ہے اور باپ کے بغیر ہی آپ  کی پیدائش ممکن ہوئی۔ ایسے معاملات میں جہاں اللہ کی مشیّت سے ایک لگے بندھے طبعی عمل میں سے اگر کوئی کڑی اپنی جگہ سے ہٹائی جاتی ہے تو وہاں پر اللہ کا مخصوص امر کلمہ ٔکُن  کی صورت میں کفایت کرتا ہے۔ یہاں پر اللہ کے ’’کلمہ‘‘ کا یہی مفہوم ہے۔

             جہا ں تک حضرت مسیح  کو ’’رُوْحٌ مِّنْہُ‘‘ قرار دینے کا تعلق ہے تو اگرچہ سب انسانوں کی روح اللہ ہی کی طرف سے ہے‘ لیکن تمام روحیں ایک جیسی نہیں ہوتیں۔ بعض روحوں کے بڑے بڑے اونچے مراتب ہوتے ہیں۔ ذرا تصور کریں روحِ محمدی کی شان اور عظمت کیا ہو گی! روحِ محمدی کو عام طور پر ہمارے علماء ’’نورِ محمدی‘‘ کہتے ہیں۔ اس لیے کہ روح ایک نورانی شے ہے۔ ملائکہ بھی نور سے پیدا ہوئے ہیں اور انسانی ارواح بھی نور سے پیدا ہوئی ہیں۔ لیکن سب انسانوں کی ارواح برابر نہیں ہیں۔ حضور کی روح کی اپنی ایک شا ن ہے۔ اسی طرح حضرت عیسیٰ  کی روح کی اپنی ایک شان ہے۔

             فَاٰمِنُوْا بِاللّٰہِ وَرُسُلِہ وَلاَ تَقُوْلُــوْا ثَلٰـثَۃٌ:  ’’پس ایمان لاؤ اللہ پر اور اس کے رسولوں پر‘ اور تثلیث (تین خداؤں) کا دعویٰ مت کرو۔‘‘

             اِنْتَہُوْا خَیْرًا لَّــکُمْ:  ’’باز آ جاؤ‘ اسی میں تمہاری بہتری (خیریت) ہے۔‘‘

            یہ مت کہو کہ الوہیت تین میں ہے۔ ایک میں تین اور تین میں ایک کا عقیدہ مت گھڑو۔

             اِنَّمَا اللّٰہُ اِلٰـــہٌ وَّاحِدٌ سُبْحٰنَہٓ اَنْ یَّــکُوْنَ لَــہ وَلَـدٌ: ’’جان لو کہ اللہ تو بس ایک ہی الٰہ ِواحد ہے‘ وہ اس سے پاک ہے کہ اُس کا کوئی بیٹا ہو۔‘‘

             لَــہ مَا فِی السَّمٰوٰتِ وَمَا فِی الْاَرْضِ وَکَفٰی بِاللّٰہِ وَکِیْلاً: ’’آسمانوں اورزمین میں جو کچھ ہے سب کچھ اُسی کا ہے‘ اور اللہ کافی ہے بطور ِکارساز۔‘‘

             اب عیسائیوں  کے شرک کی ایک دوسری شکل کا ذکر ہو رہا ہے۔  ان کا ایک عقیدہ تو God incarnate کا تھا۔  یہ ان میں  سے ایک فرقے  Jacobites کا عقیدہ تھا کہ خود اللہ تعالیٰ ہی نے عیسٰی  کی شکل میں  انسانی روپ دھار لیا ہے۔  اوپر اسی عقیدے کا ذکر ہوا ہے،  لیکن عیسائیوں  کے ہاں  ایک عقیدہ ،،تثلیث،، کا بھی ہے،  اور اس عقیدہ کی بھی ان کے ہاں  دو شکلیں  ہیں۔  ابتدا میں  جو تثلیث تھی اس میں  اللہ،  حضرت مریم اور حضرت مسیح شامل تھے۔  یعنی ،،God the Father, God the Mother and God the Son. ،،دراصل یہ تثلیث مصر میں  فراعنہ کے زمانے سے چلی آ رہی تھی۔  اسی کے اندر انہوں  نے عیسائیت کو ڈھال دیا،  تاکہ مصر کے لوگ آسانی سے عیسائیت قبول کر لیں۔  اس کے بعد حضرت مریم کو اس تثلیث میں  سے نکال دیا گیا اور  Holy Ghost  یا  Holy Spirit (روح القدس) کو ان کی جگہ شامل کر لیا گیا اور اس طرح  "God the father, God the Son and God the Holy Ghost"  پر مشتمل تثلیث وجود میں  آئی۔

آیت 73:   لَقَدْ کَفَرَ الَّذِیْنَ قَالُوْٓا اِنَّ اللّٰہَ ثَالِثُ ثَلٰـثَۃٍ:  ،،یقینا کفر کیا اُن لوگوں  نے جنہوں  نے کہا کہ اللہ تین میں  کا تیسرا ہے۔ ،،

             وَمَا مِنْ اِلٰہٍ اِلَّآ اِلٰــہٌ وَّاحِدٌ:   ،،جبکہ حقیقتاً نہیں  ہے کوئی الٰہ سوائے ایک ہی الٰہ کے۔ ،،

             وَاِنْ لَّــمْ یَنْـتَھُوْا عَمَّا یَـقُوْلُوْنَ:  ،،اور اگر یہ باز نہ آئے اس سے جو کچھ یہ کہہ رہے ہیں ،،

             لَـیَمَسَّنَّ الَّذِیْنَ کَفَرُوْا مِنْہُمْ عَذَابٌ اَلِیْـمٌ:  ،،تو ان میں  سے جو کافر ہیں  ان پر بہت دردناک عذاب آ کر رہے گا۔ ،،

آیت 46:  قُلْ اَرَءَیْتُمْ اِنْ اَخَذَ اللّٰہُ سَمْعَکُمْ وَاَبْصَارَکُمْ وَخَتَمَ عَلٰی قُلُوْبِکُمْ مَّنْ اِلٰــہٌ غَیْرُ اللّٰہِ یَاْتِیْکُمْ بِہ:   ’’(اے نبي ان سے) پوچھئے! کیا تم نے کبھی غور کیا کہ اگر اللہ تمہاری آنکھیں  اور تمہارے کان چھین لے اور تمہارے دلوں  پر مہر کردے تو اللہ کے سوا کون سا معبود ہے جو دوبارہ تمہیں  یہ (ساری صلاحیتیں )  دلائے گا؟،،

            اُنْظُرْ کَیْفَ نُصَرِّفُ الْاٰیٰتِ ثُمَّ ہُمْ یَصْدِفُوْنَ:   ’’دیکھئے ہم کس طرح ان کے لیے اپنی آیات مختلف پہلوؤں  سے پیش کرتے ہیں ، پھر بھی وہ کنارہ کشی کرتے ہیں ۔،،

            ع:  ’’اِک پھول کا مضموں  ہو تو سو رنگ سے باندھوں،،  کے مصداق ہم یہ سارے مضامین پھرا پھرا کر، مختلف انداز سے مختلف اسالیب سے ان کے سامنے لا رہے ہیں ،  مگر اس کے باوجود یہ لوگ اعراض کر رہے ہیں  اور ایمان نہیں لا رہے۔

آیت 65:  وَاِلٰی عَادٍ اَخَاہُمْ ہُودًا:  ’’اور قومِ عاد کی طرف (ہم نے) ان کے بھائی ہود کو بھیجا۔‘‘

            قَالَ یٰـقَوْمِ اعْبُدُوا اللّٰہَ مَا لَـکُمْ مِّنْ اِلٰہٍ غَیْرُہ اَفَلاَ تَتَّـقُوْنَ:  ’’اُس نے کہا اے میری قوم کے لوگو! اللہ کی بندگی کرو‘ تمہارا کوئی الٰہ اس کے سوا نہیں ہے، تو کیا تم لوگ ڈرتے نہیں؟‘‘

            حضرت ہود نے بھی اپنی قوم کو وہی پیغام دیا جو حضرت نوح نے اپنی قوم کو دیا تھا۔ 

 آیت ۵۲:  ہٰذَا بَلٰغٌ لِّلنَّاسِ: «یہ پہنچا دینا ہے لوگوں کے لیے»

            اس قرآن اور اس کے احکام کو لوگوں تک پہنچانے کی ذمہ داری ہم نے محمد ٌرسول اللہ پر ڈالی تھی۔ آپ نے یہ ذمہ داری احسن طریقے سے پوری کر دی ہے۔ اب یہ ذمہ داری آپ کی اُمت کے ہر فرد پر عائد ہوتی ہے کہ وہ یہ پیغام تمام انسانوں تک پہنچائے۔

             وَلِیُنْذَرُوْا بِہ: «تا کہ وہ اس کے ذریعے سے خبردار کر دیے جائیں»

            یعنی اس قرآن کے ذریعے سے تمام انسانوں کی تذکیر و تنذیر کا حق ادا ہو جائے۔ اس حوالے سے سورۃ الانعام کی  آیت: ۱۹ کے یہ الفاظ بھی یاد کر لیجیے: وَاُوْحِیَ اِلَیَّ ہٰذَا الْقُرْاٰنُ لِاُنْذِرَکُمْ بِہ وَمَنْ بَلَغَ. «یہ قرآن میری طرف سے وحی کیا گیا ہے تا کہ میں خبردار کردوں اس کے ذریعے سے تمہیں بھی اور (ہر اُس شخص کو) جس تک بھی یہ پہنچ جائے۔»

             وَلِیَعْلَمُوْٓا اَنَّمَا ہُوَ اِلٰــہٌ وَّاحِدٌ وَّلِیَذَّکَّرَ اُولُوا الْاَلْبَابِ: «اورتا کہ وہ جان لیں کہ صرف وہی معبود ہے اکیلا، اور اس لیے کہ نصیحت اخذ کریں عقل والے لوگ۔»

****بارک اللّٰہ لی ولکم فی القرآنِ العظیم، ونفعنی وایاکم بالایات والذکر الحکیم****

 آیت ۲۲:  اِلٰہُکُمْ اِلٰــہٌ وَّاحِدٌ:  «تمہارا معبود ایک ہی معبود ہے۔»

             فَالَّذِیْنَ لاَ یُؤْمِنُوْنَ بِالْاٰخِرَۃِ قُلُوْبُہُمْ مُّنْکِرَۃٌ وَّہُمْ مُّسْتَکْبِرُوْنَ:  «تووہ لوگ جوآخرت پر ایمان نہیں رکھتے اُن کے دل منکر ہیں اور وہ تکبر کرتے ہیں۔»

            اس نکتے کو اچھی طرح سمجھنے کی ضرورت ہے کہ جن لوگوں کے دلوں میں آخرت کا یقین نہیں ہے وہ حق بات کو قبول کرنے سے کیوں جھجکتے ہیں اور ان کے اندر استکبار کیوں پیدا ہو جاتا ہے۔ اس سلسلے میں قرآن کا فلسفہ یہ ہے کہ جو شخص فطرتِ سلیمہ کا مالک ہے اس کے اندر اچھائی اور برائی کی تمیز موجود ہوتی ہے۔ اس کا دل اس حقیقت کا قائل ہوتا ہے کہ اچھائی کا اچھا بدلہ ملنا چاہیے اور برائی کا برا ع:   «گندم از گندم  بروید، جو زجو!»

            یہی فلسفہ یا تصور منطقی طور پر ایمان بالآخرت کی بنیاد فراہم کرتا ہے۔ مگر دنیا میں جب پوری طرح نیکی کی جزا اور برائی کی سزا ملتی ہوئی نظر نہیں آتی تو ایک صاحب شعور انسان لازماً سوچتا ہے کہ اعمال اور اس کے نتائج کے اعتبار سے دنیوی زندگی ادھوری ہے اور اس دنیا میں انصاف کی فراہمی کماحقہ ممکن ہی نہیں۔ مثلاً اگر ایک ستر سالہ بوڑھا ایک نوجوان کو قتل کر دے تو اس دنیا کا قانون اسے کیا سزا دے گا؟ ویسے تو یہاں انصاف تک پہنچنے کے لیے بہت سے کٹھن مراحل طے کرنے پڑتے ہیں، لیکن اگر یہ تمام مراحل طے کر کے انصاف مل بھی جائے تو قانون زیادہ سے زیادہ اس بوڑھے کو پھانسی پر لٹکا دے گا۔ لیکن کیا اس بوڑھے کی جان واقعی اس نوجوان مقتول کی جان کے برابر ہے؟ نہیں، ایسا ہرگز نہیں ہے۔ وہ نوجوان تو اپنے خاندان کا واحد سہارا تھا، اس کے چھوٹے چھوٹے بچے یتیم ہوئے، ایک نوجوان عورت بیوہ ہوئی، خاندان کا معاشی سہارا چھن گیا۔ اس طرح اس کے لواحقین اور خاندان کے لیے اس قتل کے اثرات کتنے گھمبیر ہوں گے اور کہاں کہاں تک پہنچیں گے، اس کا اندازہ لگانا مشکل ہے۔ دوسری طرف وہ بوڑھا شخص جو اپنی طبعی عمر گزار چکا تھا، جس کے بچے خود مختار زندگیاں گزار رہے ہیں، جس کی کوئی معاشی ذمہ داری بھی نہیں ہے، اس کے پھانسی پرچڑھ جانے سے اس کے پس ماندگان پر ویسے اثرات مرتب نہیں ہوں گے جیسے اس نوجوان کی جان جانے سے اس کے پس ماندگان پر ہوئے تھے۔ ایسی صورت میں دنیا کا کوئی قانون مظلوم کو پورا پورا بدلہ دے ہی نہیں سکتا۔ ایسی مثالیں عقلی اور منطقی طور پر ثابت کرتی ہیں کہ یہ دُنیا نا مکمل ہے۔ اس دنیا کے معاملات اور افعال کا ادھورا پن ایک دوسری دنیا کا تقاضا کرتا ہے جس میں اس دنیا کے تشنہ تکمیل رہ جانے والے معاملات پورے انصاف کے ساتھ اپنے اپنے منطقی انجام کو پہنچیں۔ اب ایک ایسا شخص جو فطرتِ سلیمہ کا مالک ہے، اس کے شعور میں نیکی اور بدی کا ایک واضح اور غیر مبہم تصور موجود ہے، وہ لازمی طور پر آخرت کے بارے میں مذکورہ منطقی نتیجے پر پہنچے گا اور پھر وہ قرآن کے تصور آخرت کوقبول کرنے میں بھی پس وپیش نہیں کرے گا، مگر اس کے مقابلے میں ایک ایسا شخص جس کے شعور میں نیکی اور بدی کا واضح تصور موجود نہیں، وہ قرآن کے تصورِ آخرت پر بھی دل سے یقین نہیں رکھتا اورفکر ِآخرت سے بے نیاز ہو کر غرور اور تکبر میں بھی مبتلا ہو چکا ہے، اُس کا دل پیغامِ حق کوقبول کرنے سے بھی منکر ہو گا۔ ایسے شخص کے سامنے حکیمانہ درس اور عالمانہ وعظ سب بے اثر ثابت ہوں گے۔ 

 آیت ۵۱:  وَقَالَ اللّٰہُ لاَ تَتَّخِذُوْٓا اِلٰہَیْنِ اثْنَیْنِ اِنَّمَا ہُو اِلٰــہٌ وَّاحِدٌ فَاِیَّایَ فَارْہَبُوْنِ:  «اور اللہ نے فرمایا ہے کہ دو معبود مت بناؤ، یقینا وہ تو ایک ہی معبود ہے، پس تم مجھ ہی سے ڈرو۔» 

 آیت ۲۲:  لاَ تَجْعَلْ مَعَ اللّٰہِ اِلٰہًا اٰخَرَ فَتَقْعُدَ مَذْمُوْمًا مَّخْذُوْلاً:   «اللہ کے ساتھ کسی اور کو معبود نہ بناؤ، کہ پھر بیٹھے رہ جاؤ گے مذموم و بے سہارا ہو کر۔»

            آئندہ دو رکوع اس لحاظ سے بہت اہم ہیں کہ ان میں تورات کے احکامِ عشرہ  (Ten Commandments) کو قرآنی اسلوب میں بیان کیا گیا ہے۔ حضرت عبد اللہ بن عباس کے نزدیک ان احکام کے اندر تورات کی تعلیمات کا نچوڑ ہے۔ ان احکام کا خلاصہ ہم سورۃ الانعام کے آخری حصے میں بھی پڑھ آئے ہیں۔  یہاں پر وہی باتیں ذرا تفصیل سے بیان ہوئی ہیں۔ 

 آیت :۱۱۰   قُلْ اِنَّمَآ اَنَا بَشَرٌ مِّثْلُکُمْ یُوْحٰٓی اِلَیَّ اَنَّمَآ اِلٰہُکُمْ اِلٰــہٌ وَّاحِدٌ:   «(اے نبی!) آپ کہہ دیجیے کہ میں تو بس تمہاری ہی طرح کا ایک انسان ہوں، مجھ پر وحی کی جاتی ہے کہ تمہارا معبود بس ایک ہی معبود ہے۔»

               فَمَنْ کَانَ یَرْجُوْا لِقَآءَ رَبِّہِ فَلْیَعْمَلْ عَمَلًا صَالِحًا وَّلَا یُشْرِکْ بِعِبَادَۃِ رَبِّہِٓ اَحَدًا:   «پس جو کوئی بھی اُمید رکھتا ہو اپنے رب سے ملاقات کی تو اسے چاہیے کہ نیک اعمال کرے اور اپنے رب کی عبادت میں کسی کو بھی شریک نہ کرے۔»

            یعنی عبادت خالص اللہ کی ہو۔ یہ توحید عملی ہے۔ اس بارے میں سوره بنی اسرائیل آیت: ۲۳ میں یوں فرمایا گیا ہے:  وَقَضٰی رَبُّکَ اَلاَّ تَعْبُدُوْٓا اِلآَّ اِیَّاہُ.  «اور فیصلہ کر دیا ہے آپ کے رب نے کہ تم لوگ نہیں عبادت کرو گے کسی کی سوائے اُس کے»۔ سورۃ الکہف کی اس آخری آیت اور سوره بنی اسرائیل کی آخری آیت کا بھی آپس میں معنوی ربط و تعلق ہے۔ موازنہ کے لیے سوره بنی اسرائیل کی آیت ملاحظہ کیجیے:  وَقُلِ الْحَمْدُ لِلّٰہِ الَّذِیْ لَمْ یَتَّخِذْ وَلَدًا وَّلَمْ یَکُنْ لَّہُ شَرِیْکٌ فِی الْْمُلْکِ وَلَمْ یَکُنْ لَّہُ وَلِیٌّ مِّنَ الذُّلِّ وَکَبِّرْہُ تَکْبِیْرًا:   «اور کہہ دیجیے کہ کل حمد اور کل شکر اللہ کے لیے ہے جس نے نہیں بنائی کوئی اولاد، اور نہیں ہے اس کا کوئی شریک بادشاہی میں، اور نہ ہی اس کا کوئی دوست ہے کمزوری کی وجہ سے اوراُس کی تکبیر کرو جیسے کہ تکبیر کرنے کا حق ہے»۔ اس آیت میں اللہ تعالیٰ کا بلند مقام اور اُس کی شان بیان کر کے شرک کی نفی کی گئی ہے۔ دراصل اللہ کے ساتھ شرک کی دو صورتیں ہیں۔ یا تو اللہ کو مرتبہ الوہیت سے نیچے اتار کر مخلوقات کے ساتھ کھڑا کر دیا جاتا ہے یا پھر مخلوقات کی صف میں سے کسی کو اٹھا کر اللہ کے برابر بٹھا دیا جاتا ہے۔ چنانچہ سوره بنی اسرائیل کی آخری آیت میں اللہ کی کبریائی کا اعلان کرنے کا حکم دے کر شرک کی پہلی صورت کا ابطال کیا گیا ہے جبکہ سورۃ الکہف کی آخری آیت میں شرک کی دوسری صورت یعنی مخلوقات میں سے کسی کو اللہ کے برابر کرنے کی نفی کی گئی ہے۔

            دیکھا جائے تو اللہ کی مخلوق میں سے اس کے شریک بنانے کی روایت ہر زمانے میں رہی ہے۔ عیسائیوں نے حضرت مسیح کو خدا کا درجہ دے دیا اور اہل عرب نے فرشتوں کو خدا کی بیٹیاں قرار دے دیا۔ ہمارے ہاں بھی بعض لوگوں نے حضور کو (نعوذ باللہ) خدا بنا دیا:

وہی جو مستویٔ عرش تھا  خدا ہو کر

اُتر پڑا وہ مدینے میں مصطفی ہو کر!

اورکسی نے حضرت علی کو خدا کی ذات سے ملا دیا:

ہر چند علی کی ذات نہیں ہے خدا کی ذات

لیکن  نہیں  ہے  ذاتِ خدا  سے جدا  علی

 اور مرزا غالب تو اس سلسلے میں یہاں تک کہہ گئے:

غالب ندیم دوست سے آتی ہے بوئے دوست

مشغولِ حق ہوں    بندگی ٔ   بو تراب میں

یعنی جب میں ابو تراب (حضرت علی) کی بندگی کرتا ہوں تو درحقیقت اللہ ہی کی بندگی کر رہا ہوتا ہوں۔ اسی طرح آغا خانیوں کے ہاں حضرت علی کو «دشم اوتار» قرار دیا گیا۔ ہندوؤں کے ہاں نو (۹) اوتار تسلیم کیے جاتے تھے، انہوں نے حضر ت علی کو «دسواں اوتار» مان لیا۔ اعاذنا اللّٰہ من ذٰلک!!

**** بارک اللّٰہ لي ولکم في القرآن العظیم، ونفعني وایاکم بالآیات والذِّکر الحکیم ****

 آیت ۱۰۸:  قُلْ اِنَّمَا یُوْحٰٓی اِلَیَّ اَنَّمَآ اِلٰہُکُمْ اِلٰہٌ وَّاحِدٌ فَہَلْ اَنْتُمْ مُّسْلِمُوْنَ:   «(اے نبی!) آپ ان کو بتائیے کہ میری طرف تو یہی وحی کی جاتی ہے کہ تمہارا معبود بس ایک ہی معبود ہے، تو کیا تم (اس کی) فرمانبرداری اختیار کرتے ہو؟» 

 آیت ۳۴:  وَلِکُلِّ اُمَّۃٍ جَعَلْنَا مَنْسَکًا لِّیَذْکُرُوا اسْمَ اللّٰہِ عَلٰی مَا رَزَقَہُمْ مِّنْم بَہِیْمَۃِ الْاَنْعَامِ:   «اور ہر اُمت کے لیے ہم نے قربانی کا ایک نظام مقرر کیا ہے تا کہ وہ اللہ کا نام لیا کریں ان مویشیوں پر جو اُس نے انہیں عطا کیے ہیں۔»

            فَاِلٰہُکُمْ اِلٰہٌ وَّاحِدٌ فَلَہُٓ اَسْلِمُوْا:   «تو (جان لو کہ) تمہارا معبود ایک ہی معبود ہے، تو تم اُسی کے سامنے سر ِتسلیم خم کرو۔»

            اس کے ہر حکم کو تسلیم کرو اور اس کی مکمل اطاعت قبول کرو۔ ایسا نہ ہو کہ ایک طرف تو قربانی دی جا رہی ہو اور دوسری طرف حرام خوری بھی جاری ہو۔ حرام کے مال سے ہی قربانی کے جانور خریدے جائیں اورپھر فوٹو بنوا کر اخباروں میں خبریں لگوائی جائیں۔ یہ سب کچھ اللہ کے ہاں قابل قبول نہیں ہے۔ اس کو معبود ماننا ہے تو پھر اس کی مکمل اطاعت قبول کرو اور اُس کی حرام کردہ چیزوں میں منہ نہ مارو۔

            وَبَشِّرِ الْمُخْبِتِیْنَ:   «اور (اے نبی!) بشارت دے دیجیے عاجزی اختیار کرنے والوں کو۔»

            «اخبات» کے معنی اپنے آپ کو پست کرنے اور تواضع و انکساری اختیار کرنے کے ہیں۔

 آیت ۹۱: مَا اتَّخَذَ اللّٰہُ مِنْ وَّلَدٍ وَّمَا کَانَ مَعَہُ مِنْ اِلٰہٍ: «اللہ نے ہرگز کسی کو اپنی اولاد نہیں بنایا اور نہ ہی اس کے ساتھ اور کوئی معبود ہے»

            : اِذًا لَّذَہَبَ کُلُّ اِلٰہٍ بِمَا خَلَقَ وَلَعَلَا بَعْضُہُمْ عَلٰی بَعْضٍ: «(اگر ایسا ہوتا) تب تو ہر معبود اپنی مخلوق کو لے کر الگ ہو جاتا اور ان میں سے ایک دوسرے پر چڑھائی کر دیتا۔»

            : سُبْحٰنَ اللّٰہِ عَمَّا یَصِفُوْنَ: «اللہ پاک ہے اس سے جو یہ بیان کر رہے ہیں۔»

            اللہ تعالیٰ کے بارے میں یہ لوگ جس طرح کی باتیں کرتے ہیں وہ ان سے پاک اور بہت ارفع و اعلیٰ ومنزّہ ہے۔ 

آیت ۶۰   اَمَّنْ خَلَقَ السَّمٰوٰتِ وَالْاَرْضَ وَاَنْزَلَ لَکُمْ مِّنَ السَّمَآءِ مَآءً: ’’ بھلا کون ہے جس نے پید اکیا آسمانوں اور زمین کو اور آسمان سے تمہارے لیے پانی اتارا!‘‘

      فَاَنْبَتْنَا بِہٖ حَدَآئِقَ ذَاتَ بَہْجَۃٍ: ’’پھر اس کے ذریعے سے ہم نے ُپررونق باغات اُگائے۔‘‘

      مَا کَانَ لَکُمْ اَنْ تُـنْبِتُوْا شَجَرَہَا: ’’تمہارے لیے ممکن نہیں تھا کہ ان کے درختوں کو خود اُگا سکتے۔‘‘

متجسسانہ سوالات (searching questions) کا یہ انداز بہت مؤثر ہے۔ علامہ اقبالؔ ؔنے اپنے ان اشعار میں یہی مضمون بالکل اسی انداز میں پیش کیا ہے: ؎

پالتا ہے بیج کو مٹی کی تاریکی میں کون

کون دریاؤں کی موجوں سے اٹھاتا ہے سحاب؟

کون لایا کھینچ کر پچھم سے بادِ سازگار

خاک یہ کس کی ہے؟ کس کا ہے یہ نورِ آفتاب؟

کہ اللہ ہی ہواؤں کو چلاتا ہے، بارش برساتا ہے، موسموں کو سازگار بناتا ہے، اناج اگاتا ہے، غرض تمام امور اسی کے حکم اور اسی کی قدرت سے انجام پاتے ہیں۔ اللہ کی قدرت کاملہ کے بیان کا یہی انداز سورۃ الواقعہ میں بھی ملتا ہے۔

      ءَاِلٰـــہٌ مَّعَ اللّٰہِ: ’’کیا کوئی اور معبود بھی ہے اللہ کے ساتھ ؟‘‘

      کیا ان سارے کاموں میں اللہ کے ساتھ کوئی اور الٰہ بھی شریک ہے؟

      بَلْ ہُمْ قَوْمٌ یَّعْدِلُوْنَ: ’’بلکہ یہ ایسے لوگ ہیں جو (حق سے) انحراف کر رہے ہیں۔‘‘

آیت ۷۱   قُلْ اَرَءَیْتُمْ اِنْ جَعَلَ اللّٰہُ عَلَیْکُمُ الَّـیْلَ سَرْمَدًا اِلٰی یَوْمِ الْقِیٰمَۃِ: ’’آپؐ کہیے: کیا تم لوگوں نے کبھی غور کیا کہ اگر اللہ تم پر رات مسلط کر دے ہمیشہ کے لیے قیامت کے دن تک‘‘

      مَنْ اِلٰــہٌ غَیْرُ اللّٰہِ یَاْتِیْکُمْ بِضِیَآءٍ اَفَلَا تَسْمَعُوْنَ: ’’تو کون معبود ہو گا اللہ کے سوا جو تمہارے لیے روشنی لائے گا؟ تو کیا تم لوگ سنتے نہیں ہو؟‘‘ 

آیت ۶۵   وَیَوْمَ یُنَادِیْہِمْ فَیَقُوْلُ مَاذَآ اَجَبْتُمُ الْمُرْسَلِیْنَ: ’’اور جس دن اللہ انہیں پکارے گا اور پوچھے گا کہ تم لوگوں نے کیا جواب دیا تھا رسولوں کو؟‘‘ 

آیت ۶:  قُلْ اِنَّمَآ اَنَا بَشَرٌ مِّثْلُکُمْ: ’’آپؐ کہہ دیجیے کہ میں تو بس ایک انسان ہوں تمہاری طرح کا‘‘

        مخالفین کی طرف سے چیلنج کا گستاخانہ انداز دیکھئے اور حضور کا جواب ملاحظہ فرمائیے۔ یعنی میں نے تم لوگوں کے سامنے نہ تو خدائی کا دعویٰ کیا ہے اور نہ ہی میں نے کہا ہے کہ میں فرشتہ ہوں۔ میں تو بس ایک انسان ہوں۔ ہاں یہ ضرور ہے کہ میرے پاس اللہ کی طرف سے وحی آتی ہے۔

         یُوْحٰٓی اِلَیَّ اَنَّمَآ اِلٰہُکُمْ اِلٰہٌ وَّاحِدٌ: ’’میری طرف وحی کی جا رہی ہے کہ تمہارا معبود ایک ہی معبودہے‘‘

        ان سورتوں کا مرکزی مضمون چونکہ توحید ہے، اس لیے سورت کے آغاز میں ہی اس مضمون کو نمایاں کیا جا رہا ہے۔

         فَاسْتَقِیْمُوْٓا اِلَیْہِ وَاسْتَغْفِرُوْہُ: ’’تو اُسی کی طرف سیدھا رکھو اپنے رخ کو اور اس سے استغفار کرو۔‘‘

        جو خطائیں اور غلطیاں اس سے پہلے ہو چکی ہیں ان کی معافی مانگو اور کفر و شرک کے عقائد سے توبہ کرو۔

         وَوَیْلٌ لِّلْمُشْرِکِیْنَ: ’’اور بڑی تباہی اور ہلاکت ہو گی مشرکین کے لیے۔‘‘

آیت ۸۴ {وَہُوَ الَّذِیْ فِی السَّمَآءِ اِلٰــہٌ وَّفِی الْاَرْضِ اِلٰــہٌ وَہُوَ الْحَکِیْمُ الْعَلِیْمُ} ’’اور وہی ہے جو آسمان میں بھی الٰہ ہے اور زمین میں بھی اِلٰہ ہے ۔اور وہ بہت حکمت والا‘ ہر چیز کا علم رکھنے والا ہے۔‘‘
یعنی پوری کائنات میں ہر جگہ اُسی کا اقتدار ہے۔ بائبل میں عیسائیوں کی جو Lord's Prayerہے اس کا مفہوم اس آیت کے بہت قریب ہے:
Thy Kingdom come
Thy will be done on Earth as it is in Heavens
کہ اے اللہ! تیری ہی سلطنت اور تیری حاکمیت قائم ہو جائے اور تیری مرضی جیسے آسمانوں پر پوری ہو رہی ہے ویسے ہی زمین پر بھی پوری ہو۔ بہر حال الٰہ تو آسمانوں میں بھی وہی ہے اور زمین پر بھی وہی ہے۔ لیکن زمین پر انسانوں کو اس نے تھوڑی سی آزادی دے رکھی ہے کہ اگر کوئی انسان چاہے تو وہ نافرمانی اور ناشکری کی روش بھی اختیار کر سکتا ہے۔ بس زمین پر جو بھی فساد نظر آ رہا ہے وہ اس ’’ذرا سی ‘‘آزادی کا نتیجہ ہے۔ سورۃ الروم کی اس آیت میں یہی حقیقت بیان کی گئی ہے: ظَہَرَ الْفَسَادُ فِی الْْبَرِّ وَالْبَحْرِ بِمَا کَسَبَتْ اَیْدِی النَّاسِ.(آیت ۴۱) چنانچہ بحر و بر میں اگر ہر جگہ فساد ہی فساد نظر آتا ہے تو وہ لوگوں کے کرتوتوں کے سبب ہے ورنہ حکومت تو زمین پر بھی اللہ ہی کی ہے۔

آيت 43:  أَمْ لَهُمْ إِلَهٌ غَيْرُ اللَّهِ سُبْحَانَ اللَّهِ عَمَّا يُشْرِكُونَ:  «كيا ان كے ليے الله كے سوا كوئى اور اله بھى هے؟ پاك هے الله اس سے جو شرك يه كر رهے هيں».