الروم

لوگوں نے اپنے ہاتھوں جو کمائی کی، اُس کی وجہ سے خشکی اور تری میں فساد پھیلا، تاکہ انہوں نے جو کام کئے ہیں اﷲ اُن میں سے کچھ کا مزہ اُنہیں چکھائے، شاید وہ باز آجائیں

(اے پیغمبر ! ان سے) کہوکہ : ’’ زمین میں چل پھر کر دیکھو کہ جو لوگ پہلے گذرے ہیں ، اُن کا کیسا انجام ہوا۔ اُن میں سے اکثر مشرک تھے۔‘‘

لہٰذا تم اپنا رُخ صحیح دین کی طرف قائم رکھو، قبل اس کے کہ وہ دن آئے جس کے ٹلنے کا اﷲ کی طرف سے کوئی اِمکان نہیں ہے۔ اُس دن لوگ الگ الگ ہوجائیں گے

جس نے کفر کیا ہے، اُس کا کفر اُسی پر پڑے گا، اور جن لوگوں نے نیک عمل کیا ہے وہ اپنے لئے ہی راستہ بنا رہے ہیں

نتیجہ یہ ہوا کہ اﷲ اُن لوگوں کو اپنے فضل سے جزا دے گا جو ایمان لائے ہیں ، اور اُنہوں نے نیک عمل کئے ہیں ۔ یقینا اﷲ کافروں کو پسند نہیں کرتا

اور اُس (اﷲ کی قدرت) کی ایک نشانی یہ ہے کہ وہ ہوائیں بھیجتا ہے جو (بارش کی) خوشخبری لے کر آتی ہیں ، اور اس لئے بھیجتا ہے تاکہ تمہیں اپنی رحمت کا مزہ چکھائے، اور تاکہ کشتیاں اُس کے حکم سے پانی میں چلیں ، اور تم اُس کا فضل تلاش کرو، اور شکر اَدا کرو

اور (اے پیغمبر !) ہم نے تم سے پہلے بھی بہت سے پیغمبر اُن کی قوموں کے پاس بھیجے، چنانچہ وہ اُن کے پاس کھلے کھلے دلائل لے کر آئے۔ پھر جنہوں نے جرائم کا ارتکاب کیا تھا، ہم نے اُن سے انتقام لیا، اورہم نے یہ ذمہ داری لی تھی کہ ایمان والوں کی مدد کریں

اﷲ ہی وہ ہے جو ہوائیں بھیجتا ہے، چنانچہ وہ بادل کو اُٹھاتی ہیں ، پھر وہ اُس (بادل) کو جس طرح چاہتا ہے، آسمان میں پھیلا دیتا ہے، اور اُسے کئی تہوں (والی گھٹا) میں تبدیل کردیتا ہے۔ تب تم دیکھتے ہو کہ اُس کے درمیان سے بارش برس رہی ہے۔ چنانچہ جب وہ اپنے بندوں میں سے جن کو چاہتا ہے، وہ بارش پہنچاتا ہے تو وہ اچانک خوشی منانے لگتے ہیں

حالانکہ اس سے پہلے جب تک اُن پر بارش نہیں برسائی گئی تھی، وہ نا اُمید ہو رہے تھے

اب ذرا اﷲ کی رحمت کے اثرات دیکھو کہ وہ زمین کو اُس کے مردہ ہونے کے بعد کس طرح زندگی بخشتا ہے ! حقیقت یہ ہے کہ وہ مردوں کو زندہ کرنے والا ہے، اور وہ ہر چیز پر پوری طرح قادر ہے