المؤمنون

اُنہوں نے جس طرح صبر سے کام لیا تھا، آج میں نے اُنہیں اُس کا یہ بدلہ دیا ہے کہ اُنہوں نے اپنی مراد پالی ہے۔‘‘

(پھر) اﷲ (ان دوزخیوں سے) فرمائے گا : ’’ تم زمین میں گنتی کے کتنے سال رہے؟‘‘

وہ کہیں گے کہ : ’’ ہم ایک دن یا ایک دن سے بھی کم رہے ہوں گے۔ (ہمیں پوری طرح یاد نہیں ) اس لئے جنہوں نے (وقت کی) گنتی کی ہو، اُن سے پوچھ لیجئے۔‘‘

اﷲ فرمائے گا : ’’ تم تھوڑی مدت سے زیادہ نہیں رہے۔ کیا خوب ہوتا اگر یہ بات تم نے (اُس وقت) سمجھ لی ہوتی !

بھلا کیا تم یہ سمجھے بیٹھے تھے کہ ہم نے تمہیں یونہی بے مقصد پیدا کر دیا، اور تمہیں واپس ہمارے پاس نہیں لایا جائے گا؟‘‘

غرض بہت اونچی شان ہے اﷲ کی جو صحیح معنی میں بادشاہ ہے ! اُس کے سوا کوئی معبود نہیں ، وہ عزت والے عرش کا مالک ہے

اور جو شخص اﷲ کے ساتھ کسی اور خدا کو پکارے، جس پر اُس کے پاس کسی قسم کی کوئی دلیل نہیں ، تو اُس کا حساب اُس کے پروردگار کے پاس ہے۔ یقین جانو کہ کافر لوگ فلاح نہیں پاسکتے

اور تم (اے پیغمبر !) یہ کہو کہ : ’’ میرے پروردگار ! ہماری خطائیں بخش دے، اور رحم فرمادے، تو سارے رحم کرنے والوں سے بڑھ کر رحم کرنے والا ہے۔‘‘