الـجـمـعـة

آسمانوں اور زمین میں جو چیز بھی ہے، وہ اﷲ کی تسبیح کرتی ہے جو بادشاہ ہے، بڑے تقدس کامالک ہے، جس کا اِقتدار بھی کامل ہے، جس کی حکمت بھی کامل

وہی ہے جس نے اُمّی لوگوں میں اُنہی میں سے ایک رسول کو بھیجا جو اُن کے سامنے اُس کی آیتوں کی تلاوت کریں ، اور اُن کو پاکیزہ بنائیں ، اور انہیں کتاب اور حکمت کی تعلیم دیں ، جبکہ وہ اس سے پہلے کھلی گمراہی میں پڑے ہوئے تھے

اور (یہ رسول جن کی طرف بھیجے گئے ہیں ) ان میں کچھ اور بھی ہیں جو ابھی ان کے ساتھ آکر نہیں ملے۔ اور وہ بڑے اِقتدار والا، بڑی حکمت والا ہے

یہ ا ﷲ کا فضل ہے، وہ جسے چاہتا ہے، دیتا ہے، اور اﷲ بڑے فضل والا ہے

جن لوگوں پر تورات کا بوجھ ڈالا گیا، پھر انہوں نے اُس کا بوجھ نہیں اُٹھایا، ان کی مثال اُس گدھے کی سی ہے جو بہت سی کتابیں لادے ہوئے ہو۔ بہت بُری مثال ہے اُن کی جنہوں نے اﷲ کی آیتوں کو جھٹلایا، اور اﷲ ایسے ظالموں کو ہدایت تک نہیں پہنچاتا

(اے پیغمبر ! ان سے) کہو کہ : ’’ اے لوگو جو یہودی بن گئے ہو ! اگر تمہارا دعویٰ یہ ہے کہ سارے لوگوں کو چھوڑ کر تم ہی اﷲ کے دوست ہو، تو موت کی تمنا کرو، اگر تم سچے ہو۔‘‘

اور انہوں نے اپنے ہاتھوں جو اَعمال آگے بھیج رکھے ہیں ، اُن کی وجہ سے یہ کبھی موت کی تمنا نہیں کریں گے، اور اﷲ ان ظالموں کو خوب جانتا ہے

کہو کہ : ’’ جس موت سے تم بھاگتے ہو، وہ تم سے آملنے والی ہے، پھر تمہیں اُس (اﷲ) کی طرف لوٹایا جائے گا جسے تمام پوشیدہ اور کھلی ہوئی باتوں کا پورا علم ہے، پھر وہ تمہیں بتائے گا کہ تم کیا کچھ کیا کرتے تھے

اے ایمان والو ! جب جمعہ کے دن نماز کیلئے پکارا جائے تو اﷲ کے ذکر کی طرف لپکو، اور خرید و فروخت چھوڑ دو۔ یہ تمہارے لئے بہتر ہے، اگر تم سمجھو

پھر جب نماز پوری ہوجائے تو زمین میں منتشر ہوجاؤ، اور اﷲ کا فضل تلاش کرو، اور اﷲ کو کثرت سے یاد کرو، تاکہ تمہیں فلاح نصیب ہو