ص

صٓ، قسم ہے نصیحت بھرے قرآن کی

کہ جن لوگوں نے کفر اَپنا لیا ہے، وہ کسی اور وجہ سے نہیں ، بلکہ اس لئے اپنایا ہے کہ وہ بڑائی کے گھمنڈ اور ہٹ دھرمی میں مبتلا ہیں

اور ان سے پہلے ہم نے کتنی قوموں کو ہلاک کیا، تواُنہوں نے اُس وقت آوازیں دیں جب چھٹکارے کا وقت رہا ہی نہیں تھا

اور ان (قریش کے) لوگوں کو اس بات پر تعجب ہوا ہے کہ ایک خبردار کرنے والا اُنہی میں سے آگیا۔ اور ان کافروں نے یہ کہہ دیا کہ :’’ وہ جھوٹا جادوگر ہے

کیا اُس نے سارے معبودوں کوایک ہی معبود میں تبدیل کر دیا ہے؟ یہ تو بڑی عجیب بات ہے۔‘‘

اور ان میں کے سردار لوگ یہ کہہ کر چلتے بنے کہ : ’’ چلو، اور اپنے خداؤں (کی عبادت) پر ڈٹے رہو، یہ بات تو ایسی ہے کہ اس کے پیچھے کچھ اور ہی ارادے ہیں

ہم نے تو یہ بات پچھلے دین میں کبھی نہیں سنی۔ اورکچھ نہیں ، یہ من گھڑت بات ہے

کیا یہ نصیحت کی بات ہم سب کو چھوڑ کر اسی شخص پر نازل کی گئی ہے؟‘‘ اصل بات یہ ہے کہ یہ لوگ میری نصیحت کے بارے میں شک میں مبتلا ہیں ، بلکہ انہوں نے ابھی میرے عذاب کا مزہ نہیں چکھا

تمہارا رَبّ جو بڑا داتا، بڑا صاحبِ اِقتدار ہے، کیا اُس کی رحمت کے سارے خزانے انہی کے پاس ہیں؟

یا پھر آسمانوں او زمین اور اُن کے درمیان ہر چیز کی بادشاہت ان کے قبضے میں ہے؟ پھر تو انہیں چاہئے کہ رسیاں تان کر اُوپر چڑھ جائیں