النمل

طٰسٓ۔یہ قرآن کی اور ایک ایسی کتاب کی آیتیں ہیں جو حقیقت کھول دینے والی ہے

یہ اُن مومنوں کیلئے سراپا ہدایت اور خوشخبری بن کر آئی ہے

جو نماز قائم کرتے ہیں ، اور زکوٰۃ اداکرتے ہیں ۔ اور وہی ہیں جو آخرت پر یقین رکھتے ہیں

حقیقت یہ ہے کہ جو لوگ آخرت پر ایمان نہیں رکھتے، ہم نے اُن کے اعمال کو اُن کی نظروں میں خوشنما بنادیاہے، اس لئے وہ بھٹکتے پھر رہے ہیں

یہی وہ لوگ ہیں جن کیلئے بر اعذاب ہے، اور وہی ہیں جو آخرت میں سب سے زیادہ نقصان اُٹھانے والے ہیں

اور (اے پیغمبر !) بلاشبہ تمہیں یہ قرآن اُس (اﷲ) کی طرف سے عطا کیا جارہا ہے جو حکمت کا بھی مالک ہے، علم کا بھی مالک

اُس وقت کو یاد کرو جب موسیٰ نے اپنے گھروالوں سے کہا تھا کہ : ’’ مجھے ایک آگ نظر آئی ہے۔ میں ابھی تمہارے پاس وہاں سے کوئی خبر لے کر آتا ہوں ، یا پھر تمہارے پاس آگ کا کوئی شعلہ اُٹھا کر لے آؤں گا، تاکہ تم آگ سے گرمی حاصل کرسکو۔‘‘

چنانچہ جب وہ اُس آگ کے پاس پہنچے تو اُنہیں آواز دی گئی کہ : ’’ برکت ہو اُن پر بھی جو اس آگ کے اندر ہیں ، اور اُس پر بھی جو اس کے آ س پاس ہے، اور پاک ہے اﷲ جو سارے جہانوں کا پروردگار ہے

اے موسیٰ ! بات یہ ہے کہ میں اﷲ ہوں ، بڑے اقتدا ر والا، بڑی حکمت والا

اور ذرا اپنی لاٹھی کو نیچے پھینکو۔‘‘ پھر جب اُنہوں نے لاٹھی کو دیکھا کہ وہ اس طرح حرکت کر رہی ہے جیسے وہ کوئی سانپ ہوتو وہ پیٹھ پھیر کر بھاگے، اور پیچھے مڑکر بھی نہ دیکھا۔ (ارشاد ہوا :) ’’موسیٰ ! ڈرو نہیں ، جن کو پیغمبر بنایاجاتا ہے، ان کو میرے حضور کوئی اندیشہ نہیں ہوتا